27
भाकल पूवंकेगु खँ
1 परमप्रभुं मोशायात धयादिल,
2 “इस्राएलीतय्त धा, ‘सुं मनुखं भाकल पूवंकेत परमेश्वरयात सुं मनू देछाल धाःसा व मनूयागु मू थुकथं क्वःछ्यु।
3 व मिजं निइदँनिसें खुइदँतकयाम्ह जूसा वयागु मू पवित्र पालयागु शेकेलकथं वहःयागु नेय्गू शेकेल जुइ।
4 अले मिस्तय्गु मू धाःसा स्विगू शेकेल जुइ।
5 न्यादँ निसें निइदँ तकयाम्ह मिजंया मू वहःया निइगू शेकेल व मिस्तय्गु मू धाःसा झिगू वहःया शेकेल जुइ।
6 “ ‘लच्छि निसें न्यादँ तकयाम्ह मिजं मचाया मू वहःया न्यागू शेकेल, अले मिसा मचायागु मू धाःसा स्वंगू शेकेल जुइ।
7 खुइदँ स्वयाः अप्वः दँ दये धुंकूम्ह मिजंया मू झिंन्यागू वहःया शेकेल व मिस्तय्गु मू धाःसा झिगू शेकेल जुइ।
8 सुं मनुखं क्वःछ्यूगु मू पुले मफुत धाःसा अर्पण जुइम्ह मनूयात पुजाहारीयाथाय् हयेमाः। अले पुजाहारीं भाकल याःम्ह मनुखं मू पुले फइगुकथं क्वःछियेमाः।
9 “ ‘व भाकल परमप्रभुयात छाये ज्यूम्ह पशु खःसा व परमप्रभुयात छाःम्ह पशु पवित्र थहरय् जुइ।
10 परमप्रभुयात छायेत भाकलयाम्ह पशुयात गुगुकथं नं महिलेमाः। वं बांलाःम्ह पशुयात बांमलाःम्ह पशुलिसें अले बांमलाःम्ह पशुयात बांलाःम्ह पशुलिसे महिलेमाः। वं भाकलयाम्ह पशुया पलेसा मेम्ह पशु छाल धाःसा निम्हं पशु पवित्र जुइ।
11 व छाये मज्यूम्ह अशुद्ध पशु खःसा व पशुयात पुजाहारीयाथाय् हयेमाः।
12 बांलाःम्ह पशु जूसां बांमलाःम्ह जूसां पुजाहारीं वया मू क्वःछिनाबीगु। अले पुजाहारीं गुलि मू तल उलि हे वया मू जुइ।
13 व मनुखं मू पुलाः पशुयात लिफ्याइगु खःसा, क्वःछीगु मुलय् मेगु न्याब्वय् छब्व तनाबीमाः।
14 “ ‘सुनानं परमप्रभुयात थःगु छेँ देछाल धाःसा पुजाहारीं व छेँ बांलाः वा बांमलाः स्वयाः उकिया मू क्वःछिना बीमाः। पुजाहारीं गुलि क्वःछित उकिया मू उलि हे जुइमाः।
15 तर छाःम्हय्सिनं मू पुलाः व लिफ्यायेगु इच्छायात धाःसा, क्वःछीगु मुलय् मेगु न्याब्वय् छब्व तनाः वं बीमाः। अले व छेँ हानं वयागु हे जुइ।
16 “ ‘सुनानं थः पुर्खाया सम्पत्तिया छुं ब्व परमप्रभुया निंतिं छाल धाःसा उकी गुलि पुसा वनी वःकथं उकिया मू क्वःछ्यु। गथेकि छगू होमेर तछ्वया पुसा वनीगु बुँया नेय्गू वहःयागु शेकेल।
17 वं लुँदँ हनीगु नखःया दँनिसें हे थःगु बुँ छायेगु खःसा उकियागु मू पुजाहारीं क्वःछीगुकथं हे जुइमाः।
18 तर वं थःगु बुँ लुँदँ हनीगु नखःया दँ लिपा छायेगु खःसा, मेगु नखःया दँ वयेत गुलि ल्यंदनि पुजाहारीं वःकथं हे उकिया मू ति। अले क्वःछीगु मुलय् व क्वकायाबीमाः।
19 व बुँ छाःम्हय्सिनं हे मू पुलाः लिफ्याइगु खःसा क्वःछीगु मुलय् मेगु न्याब्वय् छब्व तनाबीमाः। अले व वयागु हे जुइ।
20 तर वं व जमिन मू पुलाः लिमफ्याइगु धाःसा वा मेम्ह सुं मनूयात व बुँ मिल धाःसा वं गुबलय् नं उकियात लिफ्याना काये फइ मखु।
21 व बुँ लुँदँया नखःया दँय् स्वतन्त्र जुइबलय् देछाःगु बुँ थें व परमप्रभुया निंतिं पवित्र जुइ। व पुजाहारीया हे सम्पत्ति थहरय् जुइ।
22 “ ‘सुं मनुखं बुँ देछाल धाःसा, गुगु बुँ न्यानाकाःगु खः थः पुर्खायागु मखु,
23 पुजाहारीं लुँदँया नखःया दँ ल्याःखनाः उकिया गुलि मू क्वःछी वं परमप्रभुया निंतिं पवित्र भाःपियाः उखुन्हु हे क्वःछ्यूगु मू बीमाः।
24 लुँदँया नखःया दँय् व बुँ छाःम्हय्सिनं सुयाके न्यानाकाःगु खः अले व बुँ सुयागु पुर्खौली सम्पत्ति खः वयात हे लितबीमाः।
25 क्वःछ्यूगु मू फुक्कं पवित्र पालया वहःया शेकलकथं जुइमाः। निइगू गेराया छगू शेकेल खः।
26 “ ‘पशुतय्सं बुइकूम्ह न्हापायाम्ह मचा, सा वा द्वहंया जुइमा वा फैया जुइमा, इपिं न्हापांनिसें हे परमप्रभुया खः, वयात धाःसा देछाये मते।
27 व अशुद्ध पशुं दकलय् न्हापा बुइकूम्ह खःसा क्वःछ्यूगु मुलय् हानं मेगु न्याब्वय् छब्व मू तनाः उकियात लिफ्याना कायेमाः। तर मू पुलाः लिफ्याइगु मखुसा क्वःछ्यूगु मुलय् मिया छ्वयेमाः।
28 “ ‘तर परमप्रभुया निंतिं देछाःम्ह मनू, पशु वा थः पुर्खाया जमिन मी फइ मखु, अले देछाये नं फइ मखु। देछाःगु फुक्कं परमप्रभुया निंतिं तसकं पवित्र खः।
29 मनूत मध्ये सुं मनूयात स्यायेगु लागिं देछाःगु खःसा वयात मू पुलाः लिफ्याये मज्यू। वयात स्याना हे छ्वयेमाः।
30 “ ‘थुकथं बुँयागु अन्न व सिमाया फलयागु झिब्वय् छब्व परमप्रभुयागु हे खः अले व परमप्रभुया निंतिं पवित्र खः।
31 अले सुनां झिब्वय् छब्वयागु छुं मू पुलाः लिफ्याइगु खःसा वं उकियागु न्याब्वय् छब्व तनाबीमाः।
32 पशुत ल्याः खाइगु कथिया क्वय् जुयावनीपिं बथांयापिं सा द्वहं, फै दुगुचा झिम्हय् छम्ह परमप्रभुया निंतिं पवित्र जुइ।
33 भिंम्ह वा मभिंम्ह पशु वं छुतय् याये मज्यू व हिले नं मज्यू। हिलेगु हे खःसा ह्यूपिं निम्हं हे पशु पवित्र जुइ। व मू पुलाः इमित लिफ्यने फइ मखु।’ ”
34 परमप्रभुं इस्राएलीतय्गु निंतिं सीनै पर्वतय् मोशायात बियादीगु आज्ञा थुपिं हे खः।