पुजाहारी जुइत माःगु खँ
8
हारून व वया काय्पिनिगु अभिषेक
प्रस २९:१-३७
1 हानं परमप्रभुं मोशायात धयादिल,
2 “छं हारून व वया काय्पिं नापं इमिगु वसः, अभिषेक याइगु चिकं, पापबलिया द्वहं, निम्ह भ्याःचा व सोडा मतःगु मरिया दाला
3 नापलायेगु पालया ध्वाखाय् हजि। अले फुक्क खलःयात नं अन हे मुंकि।”
4 थथे परमप्रभुं मोशायात उजं बियादीगु थें मोशां यात, अले नापलायेगु पालया ध्वाखाय् फुक्क खलः मुन।
5 मोशां इमित धाल, “परमप्रभुं या धकाः उजं बियादीगु ज्या थ्व हे खः।”
6 अले मोशां हारून व वया काय्पिन्त हयाः विधिकथं म्वःल्हुइकल।
7 वं हारूनयात जामालं फिकाः जँनी चिनाबिल। पुजाहारीया लं फिकाः उकी एपोद तयाबिल। एपोदया बांलाःगु बुत्ता दुगु जँनिखं हिनाबिल।
8 अनं लिपा वं हारूनयात छातिपाता फिकाः उकी हे ऊरीम व तुम्मीम तयाबिल।
9 अले वयागु छेनय् फेटा चिनाः फेटाया च्वय् न्ह्यःने पवित्र चिं लुँपाता तयाः परमप्रभुं मोशायात उजं बियादीगु थें मोशां यानाबिल।
10 अनंलि मोशां अभिषेक याइगु चिकं ज्वनाः पवित्र पाल व अन दुने दुगु फुक्क ज्वलंयात अभिषेक यानाः शुद्ध यानाबिल।
11 उकिं भतिचा चिकं कयाः व वेदीइ न्हय्कः तक छ्वाकल। अले वेदी व अनया फुक्क थलबल, ल्हाःतुति सिलेगु बाता व उकिया लिधंसा नापं शुद्ध यायेत अभिषेक यानाबिल।
12 हानं वं अभिषेक यायेगु चिकं ज्वनाः हारूनया छेनय् प्वंकाः वयात शुद्ध यायेत अभिषेक यानाबिल।
13 अनंलि परमप्रभुं मोशायात उजं बियादीगु थें मोशां हारूनया काय्पिन्त न्ह्यःने हयाः जामालं फीकाबिल, अले जँनी चिकाः इमित बेतालिं हिनाबिल।
14 अनं लिपा वं पापबलिया द्वहं हल, अले हारून व वया काय्पिन्सं पापबलिया द्वहंया छेनय् थथःगु ल्हाः तल।
15 अले मोशां द्वहंयात स्यात। वं हि भतिचा कयाः थःगु पतिंचां वेदीया प्यंगू नेकुलिइ तिकाः वेदीयात शुद्ध यानाबिल। ल्यं दुगु हि धाःसा वं वेदीया तःलय् प्वंकल। थथे यानाः वं वयागु लागिं प्रायश्चित यायेत वेदी शुद्ध यानाबिल।
16 अले मोशां आतापुति भ्वरि त्वपुइगु फुक्क दाः, सेँया भिंगु ब्व व दाःनापया निगः जलासेँ कयाः वेदीइ छ्वय्कल।
17 परमप्रभुं मोशायात उजं बियादी थें वं द्वहंयागु छेंगू, ला व सौ नापं छाउनी पिने यंकाः मिं छ्वय्काबिल।
18 अनं लिपा मोशां होमबलि छायेत भ्याःचा हल। हारून व वया काय्पिन्सं थथःगु ल्हाः भ्याःचाया छेनय् तल।
19 अले मोशां भ्याःचायात स्यात। अनं लिपा मोशां हि वेदीया जःखः छ्वाकल।
20 वं भ्याःचाया ला कुचा कुचा ध्यनाः अले छ्यं व दाः नापं छ्वय्कल।
21 परमप्रभुं मोशायात उजं बियादी थें वं आतापुति-भ्वरी व तुति लखं सिल, अले व परमप्रभुया निंतिं विशेष देछा, नस्वाः वःगु होमबलिकथं वं भ्याःचाया फुक्क म्ह वेदीइ छ्वय्कल।
22 अनंलि वं अर्पणयाम्ह भ्याःचा न्ह्यःने यंकल। थ्व भ्याःचायागु छेनय् हारून व वया काय्पिन्सं नं थथःगु ल्हाः तल।
23 अले मोशां वयात स्यात। वं हि कयाः हारूनया जव न्हाय्पं फ्वलय्, जव ल्हाःया बुरा-पतिंचाय् व जव तुतिया बुरा-पतिंचाय् तिकाबिल।
24 अनं लिपा मोशां हारूनया काय्पिन्त हल, इमिगु जव न्हाय्पं फ्वलय्, जव ल्हाःया बुरापतिंचाय् व जव तुतिया बुरापतिंचाय् हि तिकाबिल। अले हि वेदीया जःखः छ्वाकाबिल।
25 अले वं दाः, दाःखाःगु न्हिप्यं, आतपुति-भ्वरी त्वपुइगु फुक्क दाः, सेँया भिंगु ब्व, दाः नापंया निगः जलासेँ व जव खम्पा काल।
26 अले परमप्रभुया न्ह्यःने दुगु दालां सोडा ल्वाकमछ्याःगु ल्वहंचा मरि छपा, सोडा मतःगु चिकनय् बुलातःगु घः मरि छपा अले सालुगु मरि छपा कयाः दाः व जव खम्पाया द्यने तयाबिल।
27 थ्व फुक्क हारून व वया काय्पिनिगु ल्हातिइ तयाबिल। अले इमिसं परमप्रभुया न्ह्यःने संकाबीगु बलिकथं छाल।
28 अनं लिपा मोशां इमिगु ल्हातिं व कयाः परमप्रभुया निंतिं विशेष देछा, नस्वाःगु अर्पण बलिकथं होमबलिया वेदीइ छ्वय्कल।
29 परमप्रभुं मोशायात उजं बियादीगु थें हे वं ह्याकुला कयाः संकाबीगु बलिकथं परमप्रभुया न्ह्यःने छाल। थ्व अर्पण बलियाम्ह मिजंम्ह फैया ब्व मोशायागु हे खः।
30 अले मोशां अभिषेकया भतिचा चिकं व वेदीं हि भतिचा कयाः हारून व वया वसतय् अले वया काय्पिं व इमिगु वसतय् नापं छ्वाकल। थथे वं हारून व वया काय्पिनिगु वसः नापं शुद्ध यानाबिल।
31 अले मोशां हारून व वया काय्पिन्त धाल, “छिमिसं नापलायेगु पालया चुक दुने ध्वाखाया लिक्क ला दय्काः व अभिषेक बलिया दालाय् दुगु मरिनापं अन हे च्वनाः न।
32 ल्यं दुगु ला व मरि धाःसा छ्वय्काब्यु!
33 छिमिगु अभिषेकया विधि पूमवंतले न्हय्न्हु तक छिपिं नापलायेगु पालया ध्वाखां पिने वने मते, छाय्धाःसा छिमिगु अभिषेक न्हय्न्हु तक दयाच्वनी।
34 छिमिगु निंतिं प्रायश्चित यायेत गथे थौं याःगु खः अथे हे यायेगु उजं परमप्रभुं बियादीगु दु।
35 अथे जुयाः छिपिं नापलायेगु पालया चुकय् न्हय्न्हु तक चां न्हिं च्वनेमाः। छिपिं सिना मवनेमा धकाः परमप्रभुयागु उजंयात मानय् यायेमाः छाय्धाःसा जितः थज्याःगु हे उजं बियादीगु खः।”
36 अले परमप्रभुं मोशापाखें ब्यूगु फुक्क उजं हारून व वया काय्पिन्सं पालन यात।