5
बेथलेहेमं शासक वइगु बचं
1 हे यक्व सिपाइँत दुगु शहर,
छंगु सिपाइँतय्त मुंकि,
छाय्धाःसा झीत घेरय् याःगु दु।
इमिसं इस्राएलया शासकयात कथिं न्यतालय् दाइ।
2 “तर, हे बेथलेहेम एप्राता,
छ यहूदाया कुलत मध्ये दकलय् चिधंगु जूसां
जिगु लागिं छंकेनं छम्ह मिजं पिहां वइ
गुम्हय्सिनं इस्राएलयात शासन याइ,
गुम्हय्सिगु शुरु पुलांगु इलंनिसें हे,
अर्थात दकलय् न्हापाया इलंनिसें हे दु।”
3 अथे जुयाः मचाबू ब्यथा जूम्ह मिसां
मचा मबुइकूतले इस्राएलयात शत्रुया ल्हातय् त्वःता तइ।
अले वया दाजुकिजापिं लिहां वयाः
इस्राएलीतलिसें मिलय् जुइ।
4 वय्कलं परमप्रभुयागु शक्तिं
थः परमप्रभु परमेश्वरया नांया गौरवय् दनाः
थः बथांयात ज्वयादी।
अले इपिं सुरक्षित जुयाच्वनी,
छाय्धाःसा पृथ्वीया तातापाःगु थासय् तक वय्कःयात इज्जत याइ।
5 अले वय्कःपाखें जक इमित शान्ति दइ।
अश्शूरीत झीगु देशय् वयाः
झीगु किल्लाय् हमला याइबलय्
झीसं न्हय्म्ह जवाःत वा च्याम्ह नायःत
इपिंलिसें ल्वायेत छ्वये।
6 इमिसं अश्शूर देशयात तरवारं व निम्रोद देशयात नांगागु तरवारं शासन याइ।
अश्शूरीत झीगु देशय् हमला यायेत वइबलय्
अले झीगु सिमानाया दुने पलाः तइबलय्
वय्कलं झीत अश्शूरीतपाखें बचय् यानादी।
ल्यंदुपिन्त शुद्ध याःगु
7 यक्व मनूतय्गु दथुइ
याकूबया ल्यंदुपिं
परमप्रभुं छ्वयाहयादीगु सुतिलः
व घाँसय् द्यःने लाःगु लः थें जुइ।
इमिसं सुयात नं पियाच्वनी मखु,
वा न मनूतय्के भलसा तइ।
8 यक्व जात जाति व यक्व मनूतय् दथुइ
याकूबया ल्यंदुपिं मनूत
जंगलय् च्वंपिं पशुतय्गु दथुइ सिंह थें
अले फैतय्गु दथुइ च्वंम्ह ल्याय्मम्ह सिंह थें जुइ।
इमिसं थुखे उखे वनाः झाताझिति यानाः जुइ,
अले इमित सुनानं बचय् याये फइ मखु।
9 छिमिगु ल्हाः छिमि शत्रुतय् स्वयाः च्वय् थाहांवनी।
छिमि फुक्क शत्रुत नाश जुइ।
10 परमप्रभुं थथे धयादी
“व दिं, जिं छिमि सलतय्त छिमि दथुइनं न्हंकाबी,
अले छिमिगु रथत नाश यानाबी।
11 जिं छिमिगु देशया शहरत नाश यानाबी
अले छिमिगु किल्लात नं थुनाबी।
12 जिं छिमिगु तन्त्रमन्त्र दक्व नाश यानाबी
अले छिमिसं हाकनं थथे याये फइ मखु।
13 छिमिसं दय्कातःगु मूर्ति
अले च्वखगु ल्वहंत नं नाश यानाबी।
अले हाकनं छिपिं छिमिसं हे दय्कातःगु
मूर्तिया न्ह्यःने क्वछुइ मखु।
14 जिं छिमिथाय् च्वंम्ह अशेरा द्यःमय्जुया थांतय्त लिनाः वांछ्वयाबी
अले छिमिगु शहर नं नाश यानाबी।
15 जिगु आज्ञा पालन याइमखुपिं
जाति जातितय्त जिं तच्वःगु तम्वय् बदला काये।”