मर्कूसं च्वःगु भिंगु खँ
म्हसीका
मर्कूसं थ्व सफुलिइ पुलांगु नियमया अगमवक्ता यशैयां याःगु अगमवाणी कथं प्रभु येशू झाःगु व वय्कःयात लँ छिंका बीम्ह यूहन्ना वःगु खँ न्ह्यथनातःगु दु। मर्कूसं च्वःगु सुसमाचारय् “भिंगु खँ परमेश्वरया काय् येशू ख्रीष्टया बारे खः” धकाः नं न्ह्यथनातःगु दु। थुकी येशूयात अधिकार दुम्ह मनूकथं न्ह्यब्वयातःगु दु। वय्कःयागु अधिकार, वय्कलं स्यनेकने यानादीगु खं, वय्कलं भूतआत्मातय्त ख्यानाः छ्वयादीगुलिं व वय्कलं मनूतय्त पापं क्षमा यानादीगुलिं क्यं। येशूं थःत “मनूया काय्” धकाः धयादी – वय्कः मनूतय्त इमिगु पापं मुक्त यायेत थःगु जीवन बीत झाःगु खः।
मर्कूसं येशूं यानादीगु ज्याखँयात वय्कलं स्यनादीगु खँ स्वयाः अप्वः बःबियाः न्ह्यब्वयातःगु दु। मर्कूसं येशूया बारे थुपिं निता खँ नं न्ह्यब्वयातःगु दु।
१. येशू मनूतय्सं ताःइलंनिसें पियाच्वंम्ह मसीह खः।
२. येशू परमेश्वरया दुःख फइम्ह सेवक खः।
थ्व सफुलिइ बप्तिस्मा बीम्ह यूहन्नायागु खँ व येशूं बप्तिस्मा कयादीगु अले वय्कःयात जाँचय् याःगु खँ चिहाकय्क जक न्ह्यथनातःगु दु। येशूं स्यनेकने यानादीगु व ल्वय् लाय्कादीगु खँ धाःसा ताःहाकय्क च्वयातःगु दु। वय्कः यरूशलेमय् झाःगु अले अन वय्कःया विरोधीतय्सं वय्कःयात क्रूसय् यख्खानाः स्यायेत ताःलाःगु खँ न्ह्यथनातःगु दु। येशूयात क्रूसय् यख्खायाः स्याःगु अय्नं हानं म्वानावःगु थ्व सफूया मू खँ खः।
मर्कूस पत्रुसयात ग्वाहालि याइम्ह खः। वं थ्व सफू रोमय् पत्रुसयात मृत्यु दण्ड बी धुनेवं पत्रुसं स्यनेकने याःगु खँ लुमंकाः च्वःगु खः। रोमया मण्डलीइ यहूदीत नापनापं यहूदीमखुपिं नं यक्व मुनीगु खः। उबलय् मेपिन्सं इमित तसकं दुःखकष्ट बियाच्वंगुलिं मर्कूसं थ्व सफू इमित साहस बीत च्वःगु खः। मर्कूस प्रभु येशूया शुरुया झिंनिम्ह चेलात मध्ये छम्ह मखु।
मर्कूसया सफू ई.सं. ५० निसें ६८ या दथुइयागु छगू इलय् च्वःगु जुइफु।
धलः पौ
सुसमाचारया न्ह्यखँ १:१-१३
गालीलय् येशूयागु ज्या १:१४–९:५०
गालीलं येशू यरूशलेमय् झाःगु १०:१-५२
येशू यरूशलेमय् व अन लिक्क दुगु बेथानियाय् ११:१–१५:४७
येशू सिनाः म्वानाझाःगु १६:१-८
म्वानावःम्ह प्रभु खनेदुगु व स्वर्गय् झाःगु १६:९-२०
मर्कूस
1
बप्तिस्मा बीम्ह यूहन्नां स्यनेकने याःगु
मत्ती ३:१-१२; लूक ३:१-१८; यूह १:१९-२८
1 परमेश्वरया काय् येशू ख्रीष्टयागु भिंगु खँ थुकथं शुरु जुइ।
2 यशैया अगमवक्तां थथे च्वयातःगु दु –
“परमेश्वरं धयादिल –
‘स्व, जिं जिम्ह दूतयात
छंगु न्ह्यः न्ह्यः छ्वयाबी।
वं हे छंगु निंतिं लँ दय्काबी।’
3 मरुभूमिइ छम्ह मनू
थथे धकाः हाला वइ –
‘परमप्रभुया लँपु तयार या,
वय्कःयात लँ छिंकाब्यु।’ ”
4 अले बप्तिस्मा बीम्ह यूहन्ना मरुभूमिइ खनेदय्कः वल। वं पापयागु पश्चाताप यानाः परमेश्वरपाखें क्षमा कायेत बप्तिस्मा का धकाः न्यंकाजुल।
5 यहूदियायागु फुक्क गां व यरूशलेमयापिं सकल मनूत यूहन्नायाथाय् वल। अले यूहन्नां थःगु पाप मानय् याःपिं फुक्कसित यर्दन खुसिइ बप्तिस्मा बिल।
6 यूहन्ना ऊँटया सँयागु लं फिनाजुइम्ह व जँय् छेंगूयागु जनी चिनाजुइम्ह खः। वं क्वःबुइँचा व गुँ कस्ति जक नइगु खः।
7 वं इमित थथे धयाजुल – “जिगु लिपा जि स्वयाः तःधंम्ह झायाच्वंगु दु। जि ला क्वछुनाः वय्कःयागु लाकां पुतु फ्यनेत तकं मल्वः।
8 जिं ला छिमित लखं बप्तिस्मा बियाच्वना। वय्कलं छिमित पवित्र आत्मां बप्तिस्मा बियादी।”
येशूं बप्तिस्मा कयादीगु व वय्कःयात जाँचय् याःगु
मत्ती ३:१३–४:११; लूक ३:२१-२२; ४:१-१३
9 अबलय् येशू गालीलयागु नासरतं झाल, अले यूहन्नां वय्कःयात यर्दन खुसिइ बप्तिस्मा बिल।
10 लखं थाहां झाःबलय् वय्कलं स्वर्ग चालावंगु व पवित्र आत्मा सुकुभतु जुयाः थःपाखे कुहां वयाच्वंगु खन।
11 अले स्वर्गं थथे धकाः धयाहःगु सः ताल – “छ जि यःम्ह काय् खः। छ खनाः जि तसकं लय्ताः।”
12 परमेश्वरयागु आत्मां वय्कःयात उबलय् हे मरुभूमिइ छ्वयादिल।
13 अन शैतानं पिइन्हु तक वय्कःयात जाँचय् यात। वय्कः गुँपशुतनापं च्वनादिल, स्वर्गदूततय्सं धाःसा वय्कःयागु सेवा याना हे च्वन।
प्यम्ह न्या लाइपिन्त सःतादीगु
मत्ती ४:१२-२२; लूक ५:१-११
14 यूहन्नायात ज्वने धुंकाः येशूं भिंगु खँ न्यंकुं न्यंकुं गालीलय् झायाः थथे धयादिल –
15 “ई जुइ धुंकल, परमेश्वरयागु राज्य न्ह्यःने थ्यने धुंकल। पश्चाताप या, भिंगु खँय् विश्वास या।”
16 गालील समुद्र सिथय् चाःहिला च्वंबलय् वय्कलं न्या लाइपिं निम्ह मनू सिमोन व वया दाजु अन्द्रियासयात जाः ह्वानाच्वंगु खन।
17 अले इमित धयादिल – “जि नाप वा, जिं छिमित मनू लाइपिं यानाबी।”
18 थ्व न्यनेवं इपिं थथःगु जाः त्वःताः वय्कः नाप वन।
19 अनं भचा उखे वय्कलं जब्दिया निम्ह काय् याकूब व वया किजा यूहन्नायात नांचाय् च्वनाः पुलांगु जाः ल्ह्वनाच्वंगु खन।
20 वय्कलं इमित नं सःतादिल। न्यनेवं इपिं थः अबु जब्दीयात ज्यामितनापं नांचाय् त्वःताः वय्कः नाप वन।
भूत दुब्यूम्ह मनूयात लाय्कादीगु
लूक ४:३१-३७
21 अले वय्कःपिं कफर्नहुमय् झाल। अन वय्कलं विश्रामबार खुन्हु धर्मशास्त्र स्यनीगु छेँय् झायाः स्यनेकने यानादिल।
22 वय्कःयागु खँ न्यनाः फुक्क मनूत छक्क जुल। छाय्धाःसा वय्कलं शास्त्रीतय्सं थें मखु, बरु अधिकार दुम्ह मनुखं थें स्यनादिल।
23 अबलय् अन भूत दुब्यूम्ह छम्ह मनू वयाः थथे धकाः हाल –
24 “हे नासरतयाम्ह येशू, छि जिमिथाय् झायेमाःगु हे छाय्? छि जिमित नाश यायेत झायागु ला? जिं छितः म्हस्यू, छि परमेश्वरया पवित्रम्ह मनू खः।”
25 वय्कलं वयात थथे धकाः ब्वःबियादिल – “सुम्क च्वँ। वयागु म्हं पिहां वा।”
26 भूतं व मनूयात फ्यारा फ्यारा खाकल। अले तसकं हालाः वया म्हं पिहां वल।
27 थ्व खनाः फुक्क मनूत अजू चाल। अले थःथवय् थथे खँ ल्हात – “थ्व छु जूगु? थ्व ला अधिकारं जाःगु न्हूगु खँ खः। वय्कःयागु खँ ला भूतं नं न्यं।”
28 थुकिं यानाः वय्कःयागु नां गालीलयागु फुक्क थासय् बय्बय् जुल।
यक्व मनूतय्त लाय्कादीगु
मत्ती ८:१४-१७; लूक ४:३८-४१
29 धर्मशास्त्र स्यनीगु छेँनं पिहां झायाः वय्कः याकूब व यूहन्ना नाप सिमोन व अन्द्रियासयागु छेँय् झाल।
30 सिमोनया ससःमां ज्वरं म्हंमफय्का च्वन। इमिसं थ्व खँ वय्कःयात धाल।
31 वय्कलं अन झायाः वयात ल्हाः ज्वनाः थन, अले वयागु ज्वर क्वलाना वन। अले वं दना वनाः वय्कःपिन्त नके त्वंके याः जुल।
32 बहनी निभाः बीधुंकाः अन च्वंपिन्सं उसाँय् मदुपिन्त व भूत दुब्यूपिन्त वय्कःयाथाय् हल।
33 शहरय् च्वंपिं दक्व मनूत लुखाय् मुंवल।
34 वय्कलं तसकं म्हंमफय्का च्वंपिन्त व तःतामछि ल्वय् दुपिन्त लाय्कादिल। वय्कलं यक्व भूततय्त पितिनादिल। भूततय्सं वय्कःयात म्हस्यूगुलिं वय्कलं इमित नवाके मब्यू।
येशूं प्रार्थना यानादीगु
लूक ४:४२-४४
35 येशू सुथ न्हापां खिउँसे च्वंबलय् हे दनाः सुं मदुगु थासय् झायाः प्रार्थना यानादिल।
36 सिमोन अले वनापं दुपिन्सं वय्कःयात माः जुल।
37 अले वय्कःयात लुइकाः थथे धाल – “फुक्कसिनं छितः मालाच्वंगु दु।”
38 वय्कलं इमित धयादिल – “लिक्क लिक्क लाःगु मेमेगु गामय् नं वनेनु, जिं अन नं स्यनेकने यायेमाः, छाय्धाःसा जि थ्व हे ज्या यायेत वयाम्ह खः।”
39 अले गालीलया फुक्क धर्मशास्त्र स्यनीगु छेँय् न्यंकु न्यंकुं व भूत दुब्यूपिन्त लाय्केगु ज्या यायां चाःहिलादिल।
कोह्रियात लाय्कादीगु
मत्ती ८:१-४; लूक ५:१२-१६
40 छम्ह कोह्रिम्ह मनुखं येशूयाथाय् वयाः पुलिं चुयाः थथे बिन्ति यात – “प्रभु, छिं यय्कादीसा जितः शुद्ध यानादी फु।”
41 येशूं माया यानाः थःगु ल्हातं वयात थियाः धयादिल – “ज्यू, छंगु ल्वय् लाया वनेमा।”
42 थुलि धाय्वं हे व कोह्रिम्ह मनूया ल्वय् लाया वन अले व शुद्ध जुल।
43 वय्कलं ख्याच्वः बियाः धयादिल –
44 “स्व, थ्व खँ सुयातं कनादी मते। पुजाहारीयाथाय् वनाः छं थःगु ल्वय् लाःगु क्यँ। अले फुक्कसित क्यनेत मोशां धाःथें शुद्ध जुइत माःगु ज्वलं छायाब्यु।”
45 व मनुखं धाःसा वनाः फुक्क थासय् थ्व खँ बय्बय् यानाबिल। थुकिं यानाः येशूयात शहरय् वयेत थाकुल अले वय्कः सुं मदुथाय् च्वंझाल। मनूत धाःसा प्यखेरं वय्कःयाथाय् वयाच्वन।