11
येशू यरूशलेमय् झाःगु
मत्ती २१:१-११; लूका १९:२८-४०; यूहन्ना १२:१२-१९
1 वय्कःपिं यरूशलेमया सत्तिक लाःगु जैतून डाँडायागु बेतफागे व बेथानिया धाःगु गामय् थ्यंकः झाःबलय् येशूं निम्ह चेलातय्त थथे धकाः
2 खँ स्यनाः छ्वयादिल -- “छिपिं न्ह्यःनेसं च्वंगु गामय् हुँ। अन दुहां वनेवं हे सुनानं मगःनिम्ह छम्ह गधाया मचायात चिना तःगु खनी। वयात फ्यनाः थन हजि।
3 छिमित सुनानं छुं धाल धाःसा, छिमिसं -- ‘प्रभुयात मालाच्वन’ धकाः धा। अले वं बिया हइ।”
4 इपिं वनाः छम्ह गधाया मचायात लँय् लाःगु लुखाय् पिने चिना तःगु खनाः इमिसं वयात फ्यन।
5 अन दना च्वंपिन्सं इमित थथे धाल -- “गधायात फ्यनाः छु यानाच्वनागु हं?”
6 वय्कलं स्यना हःथें इमिसं लिसः बिल। अले इमित गधा बिया हल।
7 इमिसं व गधाया मचायात वय्कःया थाय् हयाः थःपिनिगु गा वयागु म्हय् लाया बिल। अले वय्कः गधाया म्हय् च्वनादिल।
8 यक्वसिनं थः थःगु गा हयाः लँय् लाया बिल, अले गुलिसिनं ख्यलय् च्वंगु स्याउला हः हयाः लँय् लाय् हल।
9 वय्कःया न्ह्यः न्ह्यः वंपिं व ल्यू ल्यू वःपिं थथे हाल --
“होसन्ना,
प्रभुया नामं झाःम्ह धन्यम्ह खः।
10 झी तापाःबाज्या दाऊदयागु
वयाच्वंगु राज्यया
जय जय जुइमा।
स्वर्गय् च्वनादीम्ह परमेश्वरयात
होसन्ना।”
11 थुकथं वय्कः यरूशलेमय् थ्यंकाः अन च्वंगु देगःया चुकय् झाल। छचाखेलं फुक्कं स्वये धुंकाः लिबाय् धुंकूगुलिं वय्कः झिंनिम्ह चेलात नाप बेथानियाय् लिहां झाल।
यःमरिमायात सराः बियादीगु
मत्ती २१:१८-१९
12 कन्हय्खुन्हु वय्कःपिं बेथानियां झाया च्वंबलय् येशूं नयेपित्याकल।
13 तापाकं हे वय्कलं छमा वाँउसे च्वंगु यःमरिमा खनाः उकी छुं सयाच्वंगु दइ ला धकाः स्वः झाल। अन थ्यंकाः छुं हे सया मच्वंगु व हः जक खन। थुबलय् यःमरि सइगु ई मजूनि।
14 अले वय्कलं थ्व सिमायात थथे धयादिल -- “आवंलि छंगु फल सुनानं नये मखनेमा।” थथे धयादीगु चेलातय्सं नं ताल।
बंजाःतय्त देगलं ख्याना छ्वःगु
मत्ती २१:१२-१७; लूका १९:४५-४८; यूहन्ना २:१३-२२
15 वय्कःपिं हानं यरूशलेमय् थ्यंकः झाल। येशूं देगलय् झायाः अन च्वनाः मीगु व न्यायेगु ज्या यानाच्वंपिं फुक्कसितं ख्याना छ्वयादिल। धिबा हिलीपिं सराफितय्गु टेबिल ग्वारा तुइकाबिल, सुकुभतु मीपिनिगु ताथ फाता पुइका बिल।
16 हानं देगःया चुकं जुकाः सुयातं नं छुं यंकेगु हयेगु याके बिया मदिल।
17 वय्कलं इमित थथे धयाः स्यनादिल -- “थ्व खँ च्वया तःगु, मस्यू ला? ‘जिगु छेँ फुक्क मनूतय् प्रार्थना याइगु छेँ खः।’ छिमिसं ला थुकियात खुँ व दाखुँतय्गु छेँ धकाः यानाच्वन।”
18 तःधंपिं पुजाहारीत व शास्त्रीतय्सं थ्व खँ न्यनाः वय्कःयात स्यायेगु ग्वसाः ग्वल। तर मनूत खनाः ग्यानाः इमिसं याये मफुत, छाय्धाःसा मनूतय्सं वय्कःयागु खँ तसकं यय्कू।
19 बहनी जूगुलिं वय्कःपिं शहरं पिने बेथानियाय् लिहां झाल।
गना वंगु यःमरिमा
मत्ती २१:१८-२२
20 कन्हय्खुन्हु सुथय् वय्कःपिं हानं यरूशलेमपाखें वना च्वंबलय् लँय् यःमरिमा गना च्वंगु खन।
21 अले पत्रुसयात लुमंसे वयाः थथे धाल -- “गुरूजु, स्वयादिसँ, छिं सराः बियादीगु सिमा ला गना वने धुंकल।”
22 अले वय्कलं लिसः बियादिल -- “परमेश्वरयात विश्वास या।
23 जिं छिमित धात्थें धाये -- छिमिसं नं छुं हे संका मयासे थःम्हं मतिइ तःगु खँ पूवनी धकाः विश्वास यानाः थ्व पहाडयात ‘ल्यहेँ दनाः समुद्रय् कुतुं हुँ’ धकाः धाल धाःसा अथे हे जुइ।
24 अय्जूगुलिं जिं छिमित धाये -- प्रार्थना यानाः छिमिसं छु फ्वंगु खः व जितः दये धुंकल धकाः विश्वास यात धाःसा छिमित व द हे दइ।
25 सुनानं छिमित छुं याःगु दुसा प्रार्थना यायेबलय् छिमिसं इमित न्ह्याबलें क्षमा या, अले स्वर्गय् च्वनादीम्ह छिमि परमेश्वर बाःनं नं छिमित अथे हे क्षमा याइ।
26 छिमिसं वयात क्षमा मबिल धाःसा छिमि स्वर्गय् च्वनादीम्ह बाःनं नं छिमिसं याःगु पाप क्षमा यानादी मखु।”
येशूयात सुनां अधिकार बिया तल धकाः न्यंगु
मत्ती २१:२३-२७; लूका २०:१-८
27 वय्कःपिं हाकनं यरूशलेमय् थ्यंकः झाल। येशू देगःया चुकय् चाःहिला च्वनादीबलय् तःधंपिं पुजाहारीत, शास्त्रीत, व थकालिपिन्सं वयाः वय्कःयात
28 थथे धाल -- “छिं थथे याना दीत गनं अधिकार कयादिया? अले छितः थ्व अधिकार सुनां बिल?”
29 वय्कलं इमित धयादिल -- “जिं नं छिमिके छगू खँ न्यने, छिमिसं लिसः बिल धाःसा जितः सुनां थ्व अधिकार बिया हःगु खः धकाः धाये।
30 बप्तिस्मा बीगु अधिकार यूहन्नां सुयापाखें काल? स्वर्गपाखें ला कि मनूतय्पाखें?”
31 थ्व न्यनाः इमि थःथवय् थथे खँ जुल -- “स्वर्गपाखें काःगु धाल कि झन झीत वं ‘अय्सा, छिमिसं वयात छाय् विश्वास मयानागु लय्?’ धकाः धाइ।
32 मनूतय्पाखें काःगु धाल कि मनूतय्सं झीत स्याइ, छाय्धाःसा फुक्कसिनं यूहन्नायात अगमवक्ता धकाः मानय् याना तःगु दु।”
33 थथे जूगुलिं इमिसं वय्कःयात लिसः बिल -- “जिमिसं मस्यू।”
अले वय्कलं धयादिल -- “अय्सा, जिं नं छिमित थ्व ज्या यायेत जितः सुनां अधिकार बिया हःगु खः धकाः धाये मखु।”