3
निनवेयात सजाँय
1 हिया हि दुगु शहरयात धिक्कार दु!
व मखुगु खँ व
लाकाहःगु सम्पत्तिं जाःगु दु,
अन गुब्सं शिकार कम जुइ मखु।
2 न्यँ! कोर्रायागु सः,
पांग्रा गुर्र याःगु सः,
सलत ब्वाय्वंगु सः,
रथत थर्केजूइक तसकं ब्वाकूगु सः।
3 सल गइपिनिगु हमला,
प्वालाक्क वइगु तरवार
व ज्वाल्लच्वंगु भाला।
स्याना तःपिनिगु द्वँ,
सीम्हतय्गु द्वँ
अल्याख सीम्हत,
सीपिंके मनूत लुफिंहाना क्वदली।
4 थ्व फुक्क छम्ह वेश्याम्ह मिसा, जादु मन्तरया
छम्ह मालिकनीया घच्चायाइपुगु ज्यां याना जूगु खः,
गुम्हं थःगु वेश्याया ज्यां जात जातितय्त
व जादु मन्तरया ज्यां वंशतय्त दास याना तइ।
5 दक्व शक्ति दुम्ह परमप्रभुं घोषणा यानादी,
“स्व! जि छंगु विरोधय् दु।
छंगु पर्सि ख्वालय् थ्यंक उला बी। जात जातितय्त जिं छंगु नांगासू
व राज्यतय्त छंगु मछासू क्यनाबी।
6 छन्त फोहरं कय्काः,
जिं छन्त क्वह्यंगु व्यवहार याये,
जिं छन्त मनूत न्हिइकीगु खँ यानाबी।
7 छन्त खंपिं मनूत छपाखें बिस्युं वनी अले धाइ,
‘निनवे ला नाश जुइ धुंकल। वयागु निंतिं सु दुखं च्वनी?’
छन्त सान्त्वना बिइम्ह गन दु?”
8 अय् निनवे, छ नील खुसिया सिथय् च्वंगु
थेबेस शहर स्वयाः बांला ला?
वयागु प्यखरं लः दु,
वयागु किल्ला खुसि
अले पःखाः धाःसा लः खः।
9 कूश व मिश्र देश वयागु तःधंगु बल खः,
पूत व लिबिया वयात ग्वाहालि याइपिं देश खः।
10 अय्नं वयात ज्वना यंकल,
मेगु देशय् यंकल,
वया चिचीधिकःपिं मस्तय्त
गल्लि गल्लिइ बँय् बस्वाना स्यानाबिल।
वया मनूतय्त चिट्ठा तल,
अले दक्व तःधिंकःपिं मनूतय्त सिखलं चिनाबिल।
11 अय् निनवे! छ नं अय्लाःगुलुत थें जुइ,
छ नं सुलाच्वनी,
अले शत्रुतपाखें बिस्युं वनेत छं शरण कायेगु थाय् माली।
12 छंगु दक्व किल्लात न्हापा सःगु फल
यःमरिया सिमात थें च्वं।
व संकीबलय् यःमरिया फल नइपिनिगु
म्हुतिइ हे कुतुंवइ।
13 छंगु सिपाइँत बल्लाइ मखु
व ग्वाहालि मदुपिं मिसात थें जूगु दु।
छंगु देशया मू ध्वाखात
शत्रुतय्गु निंतिं चालाच्वंगु दु।
ध्वाखाया गजबारत मिं नःगु दु।
14 शत्रुतय्सं घेरय् याय् न्ह्यः लःजाय्का ति।
छंगु किल्लात बल्लाका ति।
चा न्हायाः अप्पा दय्कि,
अले पःखाःत मर्मत या।
15 तर छं न्ह्यागु याःसां छन्त मिं भस्म याइ,
अले छन्त तरवारं स्याइ,
थुकिं छिमित क्वःबुइँचां थें नयाबी।
छ क्वःबुइँचां थें ल्याखय् यक्व दःसां
सुं बचय् जुइ फइ मखु।
16 आकाशया नगुत स्वयाः अप्वः
छं थः व्यापारीतय्गु ल्याः अप्वकूगु दु।
तर क्वःबुइँचातय्सं याः थें
इमिसं देशयात पचिनांगा यानाः ब्वयावनी।
17 छंगु सुरक्षाया निंतिं तयातःपिं ला क्वःबुइँचां थें खः,
छंगु हाकिमत लाः क्वःबुइँचाया बथां थें खः,
गुपिं चिकुलाबलय् अंगलय् प्यपुना च्वनी,
निभाः लुया वइबलय् उपिं दक्वं ब्वयावनी,
इपिं गन वन धकाः सुनानं सी मखु।
18 अय् अश्शूरया जुजु, छं फैजवाःत ला न्ह्यः वय्काच्वंगु दु,
छं भारदारत ला आराम यानाच्वनी,
छं मनूत ला पहाड पर्वतय् थुखेला उखेला जुइ धुंकल,
इमित छथाय् मुंकीम्ह सुं हे मदु।
19 छंगु घाःयात छुं वासलं नं लंके फइ मखु।
छंगु घाः तसकं ग्यानापुगु घाः खः।
सुनां सुनां छंगु बांमलागु खँ न्यनी इमिसं लय्तायाः ल्हाःपा थाइ,
छाय्धाःसा छंगु गुबलें मदीगु सास्ती सुनां भोगे याःगु मदु धकाः?