18
पुजाहारीत व लेवीतय्गु ज्या
1 परमप्रभुं हारूनयात धयादिल, “पवित्र लागाय् जुइगु अपराधया जिम्मा छंगु, छिमि काय्पिनिगु व छिमि परिवारयागु जुइ। पुजाहारीया ज्या लिसे स्वापु दुगु ज्याखँयागु जिम्मा जक छंगु व छिमि काय्पिनिगु जुइ।
2 छ व छिमि काय्पिन्सं नापलायेगु पालय् सेवा याः वनीबलय् छिमि लेवी कुलयापिं थःथितिपिन्त नं थःनापं ब्वनाहयेगु या। इमिसं छिमिगु ज्याय् ग्वाहालि बी।
3 इमिसं छं धाःथें ज्या यायेमाः, अले नापलायेगु पालया ज्यायागु जिम्मा कायेमाः। तर इपिं पवित्र पालया सामान व वेदीया सतिक तक नं मवनेमाः, मखुसा इपिं नापं छिपिं नं सी।
4 इमिसं छिमिगु क्वय् च्वनाः ज्या यायेमाः, अले नापलायेगु पालया ज्या यायेमाः। छिपिं दुथाय् मेपिं सुं नं मवयेमाः।
5 “छं हे पवित्र पाल व वेदीया रेखदेख यायेगु जिम्मा कायेमाः। गुकिं यानाः जिगु तं हाकनं इस्राएलीतय्त मलायेमा।
6 जिं हे इस्राएलीतय्गु दथुं छिमि लेवी थःथितिपिन्त ल्ययागु दु। जिं इमित कोस्यालिकथं छन्त बियागु दु। इपिं नापलायेगु पालय् सेवा यायेत परमप्रभुयात अर्पण याःपिं खः।
7 अय्नं छ व छिमि काय्पिन्सं जक वेदी व पवित्र पालया दुने वनाः पुजाहारीया ज्या याये फइ। जिं छिमित पुजाहारीया ज्या कोसेलिकथं बियागु दु। मेपिं सुं मनू अन वल धाःसा वयात स्यानाछ्वयेमाः।”
पुजाहारीयागु ब्व
8 हाकनं परमप्रभुं हारूनयात धयादिल, “इस्राएलीतय्सं जितः छायेहःगु फुक्क पवित्र देछा जिं छंगु जिम्माय् बियागु दु। छ पुजाहारी जुयाः ज्या याःगुलिं उपिं देछा छ व छिमि काय्पिन्त न्ह्याबलेंया भागकथं अलग यानागु दु।
9 मिपाखें अलग यानातःगु तसकं पवित्रगु देछात छंगु हे जुइ। मनूतय्सं जितः छाय्हःगु तसकं पवित्रगु देछात अर्थात फुक्क अन्नबलि, पापबलि, व दोषबलिया व हे ब्व छ व छिमि काय्पिनिगु निंतिं जुइ।
10 थ्व तसकं पवित्रगु ब्वकथं छं व न। फुक्क मिजंतय्सं व नयेमाः। थुकियात छं पवित्र ताय्केमाः।
11 “थुपिं नं छंगु जुइ, इस्राएलीतय्सं जितः छायेहःगु फुक्क संकाबीगु बलितपाखें अलग यानातःगु बलि। जिं थुकियात छ व छिमि काय् म्ह्याय्पिन्त न्ह्याबलेंया भागकथं बियागु दु। विधिकथं शुद्ध जूपिं छं छेँजःपिं फुक्कसिनं थ्व नये फइ।
12 “इस्राएलीतय्सं दँय्दसं जितः छायेहइगु न्हापांगु बालीया भिंगु भिंगु फुक्कं जिं छन्त हे बियागु दु, गथेकि, जैतूनया चिकं, न्हूगु दाखमद्य व अन्न।
13 इमिसं परमप्रभुयात छायेहःगु सःगु फुक्ककथंयागु न्हापांगु फल छंगु हे जुइमाः। छंगु छेँजःयापिं शुद्ध जूपिं फुक्कसिनं व नयेफु।
14 “इस्राएलय् परमप्रभुयात देछाःगु न्ह्यागुं नं छंगु हे खः।
15 परमप्रभुयात देछाःपिं न्हापां बूपिं मनू जूसां वा पशु जूसां छन्त हे खः। अय्नं काय्पिं वा अशुद्ध पशुतय् न्हापां बूपिन्त धाःसा छं लिफ्यायेमाः।
16 लच्छि दये धुंकाः पवित्र पालया शेकेलकथं छं क्वःछीगु न्यागू शेकेल मू पुलाः इमित लिफ्यायेमाः, छगू शेकेलया तौल निइगू गेरा दइ।
17 “अय्नं द्वहं, फै वा दुगुया न्हापां बूपिन्त लिफ्याये मते! इपिं पवित्रपिं खः। इमिगु हि वेदीइ छ्वाकि। अले परमप्रभुया निंतिं यःगु नस्वाः जुइत विशेष देछाकथं इमिगु दाः छ्वय्का छ्व।
18 अले संकाबीगु बलिया ह्याकुला व जव खम्पा थें थुकियागु ला नं छंगु हे जुइमाः।
19 इस्राएलीतय्सं परमप्रभुयात देछाइगु पवित्र बलिपाखें अलग तयातःगु फुक्क ब्व जिं छ व छिमि काय् म्ह्याय्पिन्त दया हे च्वनीगु भागकथं बियागु दु। परमप्रभुया न्ह्यःने छ व छिमि सन्तानया लागिं थ्व लिपाथ्यंक दयाच्वनीगु चियागु बाचा खः।”
20 हानं परमप्रभुं हारूनयात धयादिल, “इस्राएलीतय् देशया जग्गा-जमिनय् छंगु सर्बय दइ मखु। इपिं नाप नापं छंगु छुं नं ब्व दइ मखु। इस्राएलीतय्गु दथुइ छंगु ब्व व सर्बय जि हे खः।
लेवीतय्गु भाग
21 “लेवीया सन्तानतय्सं नापलायेगु पाललय् सेवा याःगुलिं इस्राएलीतय्सं जिथाय् हःगु झिब्वय् छब्व जिं इमित सर्बयकथं बियागु दु।
22 आवंलि इस्राएलीत नापलायेगु पालया न्ह्यःने मवयेमाः। मखुसा इमिगु पापया कारणं इपिं सी।
23 नापलायेगु पालया ज्या धाःसा लेवीतय्सं यायेमाः। उकिया विरोधय् जूगु अपराधया जिम्मा इमिसं हे कायेमाः। थ्व न्ह्याबलें इमिगु सन्तानया जिम्मा खः। इस्राएलीतय्गु दथुइ धाःसा इमिगु छुं नं सर्बय दइ मखु।
24 थुकिया पलेसा जिं लेवीतय्त इमिगु सर्बयकथं इस्राएलीतय्सं परमप्रभुयात छाःगु झिब्वय् छब्व बी। अथे जुयाः ‘इस्राएलीतय् दथुइ इमित सर्बय दइ मखु’ धकाः जिं इमिगु बारे धयागु दु।”
25 अले परमप्रभुं मोशायात धयादिल,
26 “लेवीतय्त धा, ‘जिं छिमिगु सर्बयया निंतिं इस्राएलीतय्सं बी हःगु झिब्वय् छब्व कयाः वपाखें नं छिमिसं परमप्रभुयात झिब्वय् छब्व देछाकथं छायेमाः।
27 छिमिगु बलि खलाया अन्न व दाख तिस्सिगु सालया दाखमद्य थें ल्याः खाइ।
28 थुकथं इस्राएलीतय्सं छिमित ब्यूगु झिब्वय् छब्वं छिमिसं नं परमप्रभुयात झिब्वय् छब्व देछा छायेमाः। उकिं परमप्रभुयात देछाःगु पुजाहारी हारूनयात बीमाः।
29 छिमित ब्यूगु दकलय् भिंगु व पवित्र ब्व धाःसा देछाकथं परमप्रभुयात छायेमाः।’
30 “छं लेवीतय्त धाः, ‘छिमिसं दकलय् भिंगु ब्व छाल धाःसा व छिमिगु निंतिं खलाया अन्न व दाख तिस्सिगु सालं दाखमद्य थें ल्याः खाइ।
31 छिपिं व छिमि छेँजःपिन्सं न्ह्यागु हे थासय् थुकिया ल्यं दुगु नयेफु, छाय्धाःसा नापलायेगु पालय् छिमिसं याइगु ज्याया निंतिं थ्व छिमिगु ज्याला खः।
32 छिमिसं भिंगु ब्व देछाये धुंकूगुलिं छिमित दोष लाइ मखु। अय्नं इस्राएलीतय् पवित्र देछा अशुद्ध मजुइमाः। अले छिपिं सी मखु।’ ”