20
ल्वहँतं लः पिहां वःगु
प्रस १७:१-७
1 इस्राएलीतय् फुक्क खलः न्हापांगु लाय् जीनयागु मरुभूमिइ थ्यंकः वयाः कादेशय् बाय् च्वन। मिरियम अन हे सित अले वयात अन थुनाबिल।
2 खलःया निंतिं अन लः मदु। अले मोशा व हारूनया विरोधय् मनूत मुन।
3 इमिसं मोशालिसे कचकच हालाः थथे धाल, “परमप्रभुया न्ह्यःने जिमि थःथितिपिं सीबलय् हे जिपिं नं सीगु जूसा ज्यूगु नि!
4 आः ला जिमि पशुत नापं जिपिं सीगु जुल। छाय् परमप्रभुया खलःयात छिं थ्व मरुभूमिइ हयादियागु?
5 छाय् जिमित मिश्रं थ्व ग्यानपुसे च्वंगु थासय् हयादियागु? थ्व थासय् अन्न, यःमरिसि, दाख व धालेसि छुं नं मदु। थन त्वनेगु लः नं मदु।”
6 मोशा व हारून मूंपिं मनूतय्गु न्ह्यःनं नापलायेगु पालया ध्वाखाय् वनाः बँय् थ्यंक क्वछुनाः भ्वपुल। अन परमप्रभुया महिमा इमिथाय् खनेदत।
7 परमप्रभुं मोशायात धयादिल,
8 “थ्व कथि कयाः छ व छिमि दाजु हारून वनाः खलःयात मुंकि। इमिगु न्ह्यःने हे थ्व ल्वहंयात उजं ब्यु, अले ल्वहँतं लः पिहां वइ। छं थ्व ल्वहँतं इमित लः पिकाइ। थुकथं छं खलः व इमि सा द्वहंतय्त लः बी।”
9 अले परमप्रभुं उजं बियादीगु थें मोशां वय्कःया न्ह्यःनं कथि काल।
10 मोशा व हारूनं ल्वहंधीया न्ह्यःने खलःयात मुंकल। अले मोशां इमित धाल, “न्यँ, विद्रोही मनूत, छु जिमिसं छिमिगु निंतिं थ्व हे ल्वहँतं लः लिकयाबी ला?”
11 मोशां थःगु ल्हाः ल्ह्वनाः निकः थःगु कथिं ल्वहँतय् दाल। उकिं लः पिहां वल। अले खलः व इमि पशुतय्सं त्वन।
12 तर परमप्रभुं मोशा व हारूनयात धयादिल, “छिमिसं जितः विश्वास मयाःगुलिं अले जिगु पवित्रतायात इमिगु न्ह्यःने ब्वयेमफुगुलिं छिमिसं थ्व खलःयात जिं बियागु देशय् यंकेखनी मखु।”
13 थ्व थाय्यात मेरीबाया लः धकाः धाल। थन हे इस्राएलीत परमप्रभुनापं कचकच याःगु खः। अन हे वय्कलं इमिगु दथुइ थःत पवित्र क्यनादीगु खः।
एदोमया जुजुं लँ मब्यूगु
14 मोशां कादेशं एदोमया जुजुयाथाय् थथे धकाः दूतत छ्वल,
“छिमि इस्राएली थःथितिपिन्सं थथे धयाच्वन, जिमित जूगु दुःख छिं सी हे स्यू।
15 जिमि पुर्खात मिश्र देशय् वंगु खः। अले जिपिं ताःई तक मिश्र देशय् च्वना। मिश्रीतय्सं जिपिं व जिमि पुर्खालिसें बांमलाःगु व्यवहार यात।
16 अले परमप्रभुयात ग्वाहालिया निंतिं बिन्ति याना, वय्कलं जिमिगु बिन्ति न्यनादिल, अले छम्ह स्वर्गदूत छ्वयाहयाः जिमित मिश्र देशं लिगना हयादिल।
“थुबलय् जिपिं छिगु देशया सिमाना लिक्क लाःगु कादेश शहरय् दु।
17 दया यानाः जिमित छिगु देश जुयाः वनेबियादिसँ। जिपिं बुँ व दाखक्यब जुयावने मखु। जिमिसं छिगु तुंयागु लः त्वने मखु। जिपिं जुजुया मू लँ जक जुयाः वने। अले छिगु देशं पिहां मवंतले जिपिं जवय् खवय् वने मखु।”
18 अय्नं एदोमं इमित धाल,
“छिपिं जिमिगु देश जुयावने दइ मखु, मखुसा तरवार ज्वनाः जिमिसं छिमित हमला याः वये।”
19 इस्राएलीतय्सं जुजुयाथाय् हानं धाय्के छ्वल,
“जिपिं मू लँ जुया जक वने, अले जिमिसं व जिमि पशुतय्सं छिगु लः त्वंसा उकिया मू पुले। जिमित मेगु छुं मखु। छिगु देशं न्यासि वने जक बियादिसँ।”
20 हानं इमिसं लिसः बिल,
“छिपिं वये दइ मखु।”
अले एदोमं छगू तःधंगु व बल्लाःगु सेना ज्वनाः इपिं लिसे ल्वायेत वल।
21 थुकथं एदोमं इमिगु देश दुने जुयाः वने मब्यूगुलिं इस्राएलीत अनं लिहां वल।
हारून सीगु
22 इस्राएलया फुक्क खलः कादेशं न्ह्यानाः होर पर्वतय् थ्यंकः वल।
23 एदोम देशया सिमाना लिक्क होर पर्वतय् परमप्रभुं मोशा व हारूनयात थथे धयादिल,
24 “हारून सिनाः थः पुर्खातनापं मिलय् जू वनी। छिपिं निम्हं मेरीबाया लखय् जिगु वचनया विरोधय् वंगुलिं जिं इस्राएलीतय्त बीत्यनागु देशय् व वने दइ मखु।
25 हारून व वया काय् एलाजारयात होर पर्वतया च्वय् ब्वनायंकि।
26 अन हारूनयागु पुजाहारीया वसः त्वयेकाः वया काय् एलाजारयात फिकाब्यु। अनंलि हारून सिनाः थः पुर्खानापं मिलय् जू वनी, व अन हे सी।”
27 परमप्रभुं उजं बियादीगु थें मोशां यात। फुक्क खलःया मिखाया न्ह्यःने हे इपिं होर पर्वतय् थहां वन।
28 मोशां हारूनयागु पुजाहारीया वसः त्वय्काः वया काय् एलाजारयात फीकाबिल। अन हे पर्वतया च्वकाय् हारून सित। अले मोशा व एलाजार पर्वतं क्वय् कुहां वल।
29 हारून सिनावंगु खँ फुक्क खलकं सिल, अले फुक्क इस्राएलीत स्विन्हु तक दुखं च्वन।