4
कहातीतय्त ब्यूगु जिम्मा
1 परमप्रभुं मोशा व हारूनयात धयादिल,
2 लेवीया सन्तान कहातीतय्त इमिगु वंश व परिवारकथं ल्याःखा।
3 “नापलायेगु पालय् सेवा यायेबहःपिं स्वीदंनिसें नेय्दँ तक याःपिं सकसितं ल्याःखा।
4 “पवित्र पालय् तसकं पवित्रगु ज्वलं स्वयेगु ज्या कहातीतय्गु खः।
5 छाउनी मेथाय् न्ह्याइबलय् हारून व वया काय्पिन्सं महा-पवित्रगु थासय् दुहां वनाः बाचा चिनातःगु सनूया न्ह्यःने पर्दा क्वकयाः उकिं सनूयात त्वपुयाबीमाः।
6 अले इमिसं उकिया द्यःने डल्फिन न्याया छेंगुलिं त्वपुयाः उकी वँचुगु रंग छिनातःगु कापतं भुनाबीमाः। अले न्वःत थासय् तयाबीमाः।
7 “परमप्रभुयात छाःगु मरि ब्वयातइगु तेबिलय् इमिसं वँचुगु कापः लायाः भु, थल, ख्वला, त्वँसाबलिया आम्खुरा व परमप्रभुयात छायेहःगु मरि तयेमाः।
8 अले इमिसं उकी द्यःने ह्याउँगु कापः लायाः डल्फिन न्याया छेंगुलिं त्वपुयाः न्वःत थासय् तयाबीमाः।
9 “अले इमिसं वँचुगु कापतं त्वाःदेवा व उकिया पाल्चात, चिम्तात, किस्तित व चिकं तयेगु थल त्वपुयाबीमाः।
10 अले इमिसं थ्व फुक्कयात डल्फिन न्याया छेंगुलिइ प्वःचिनाः दुवालय् तयाबीमाः।
11 “अनंलि इमिसं लुँया वेदीयात वँचुगु कापतं त्वपुयाः द्यःने डल्फिन न्याया छेंगुलिं भुनाः न्वःत थासय् तयाबीमाः।
12 “इमिसं पवित्र पालय् दुगु फुक्क ज्वलं वँचुगु कापतय् प्वःचिनाः डल्फिन न्याया छेंगुलिं त्वपुयाः दुवालय् तयाबीमाः।
13 “इमिसं कँय्या वेदीं नउ लिकयाः उकी द्यःने प्याजीगु रंगया कापः लायाबीमाः।
14 अले इमिसं उकिया द्यःने वेदीया सेवा यायेत छ्यलिगु ज्वलं नापं मिथल, ला लिकायेगु नतू, नउ तुइगु चतं व हि छ्वाकेगु बाता तयाः द्यःने डल्फिन न्याया छेंगुलिं त्वपुयाः न्वःत नं थासय् तयाबीमाः।
15 “हारून व वया काय्पिन्सं पवित्र पालयागु फुक्क पवित्र ज्वलंत त्वपुइ धुंकाः छाउनी न्ह्याइबलय् जक कहातीत फुक्क ज्वलं क्वबीत पालया दुने दुहां वये दइ। कहातीतय्सं तसकं पवित्रगु ज्वलं थीमज्यू, मखुसा इपिं सी। पवित्र पालया फुक्क ज्वलं कहातीतय्सं क्वबीमाः।
16 “हारून पुजाहारीया काय् एलाजारयात त्वाःदेवाया चिकं, नस्वाःगु गुँगू, न्हियान्हिथंया अन्नबलि व अभिषेकया चिकं, अले पवित्र पाल व उकिया फुक्क पवित्र सामान व ज्वलं जिम्मा बियातःगु खः।”
17 परमप्रभुं मोशा व हारूनयात धयादिल,
18 “लेवीतय् दथुं कहातीतय् वंश नाश जुइके बी मते।
19 इपिं तसकं पवित्रगु सामान दुथाय् वइबलय् मसीमा तर म्वानाच्वनेमा धकाः इमिगु लागि थथे या। हारून व वया काय्पिन्सं पवित्र थाय्या दुने वनाः इमिसं यायेमाःगु ज्या व क्वबी माःगु सामान क्यनाबीमाः।
20 तर कहातीत पवित्र ज्वलं स्वयेत पलखया लागि जक नं दुहां मवनेमा, मखुसा इपिं सी।”
गेर्शोनीतय्त ब्यूगु जिम्मा
21 परमप्रभुं मोशायात धयादिल,
22 “गेर्शोनीतय्त नं इमि वंश व परिवारकथं ल्याःखा।
23 नापलायेगु पालय् ज्या याःवइपिं स्वीदंनिसें नेय्दँ तक दुपिं फुक्क मनूतय्त छं ल्याःखा।
24 “गेर्शोनी वंशयापिन्सं यायेमाःगु ज्या व इमिसं क्वबी माःगु कु थुकथं दु –
25 पवित्र पालया लुखाया पर्दा, पवित्र पालया इलां, उकिया द्यःने च्वंगु डल्फिन न्याया छेंगूयागु इलां, नापलायेगु पालया ध्वाखाया पर्दा,
26 पवित्र पाल व वेदीया छचाःखेरं दुगु चुकया प्यखेरं च्वंगु क्वातूगु कापः व उकिया खिपः व अन माःगु फुक्क ज्वलं इमिसं क्वबीमाः। थ्व ज्वलंयागु फुक्क ज्या गेर्शोनीतय्सं यायेमाः।
27 क्वबीगु थजु वा मेगु न्ह्यागु हे ज्या थजु इमिसं हारून व वया काय्पिन्सं धाःथें यायेमाः। इमिगु फुक्क ज्या छिमिसं हे इमित जिम्मा ब्यु।
28 नापलायेगु पालय् गेर्शोनीतय् वंशयागु ज्या थ्व हे खः। इमिसं हारून पुजाहारीया काय् ईतामारं धाःथें ज्या यायेमाः।”
मरारीतय्त ब्यूगु जिम्मा
29 परमप्रभुं धयादिल, “मोशा, मरारीतय्त इमि वंश व परिवारकथं ल्याःखा।
30 नापलायेगु पालय् ज्या याःवइपिं स्विदंनिसें नेय्दँ दुपिं तक फुक्क मनूतय्गु नां धलखय् ति।
31 इमिसं नापलायेगु पालय् यायेमाःगु ज्या थुकथं दु – पवित्र पालया सिँपौत, उकिया खगः, थांत व लिधंसात,
32 चुकया प्यखेरं च्वंगु थांत व उकिया लिधंसात, पालया निंतिं माःगु नकिंत व खिपः, अले ज्याय् छ्यलिगु थीथी कथंया सामान क्वबीगु। अले छम्ह छम्हय्सिगु नां कयाः इमिसं यायेमाःगु ज्या व क्वबिये माःगु सामान क्वःछिनाब्यु।
33 मरारीतय् वंशं नापलायेगु पालय् हारून पुजाहारीया काय् ईतामारं धाःथें यायेमाःगु ज्या थ्व हे खः।”
लेवीतय्त ल्याः खाःगु
34 मोशा, हारून व खलःया थकालितय्सं कहातीतय्त वंश व परिवारकथं ल्याः खात।
35 नापलायेगु पालय् ज्या याःवइपिं स्विदंनिसें नेय्दँ तक दुपिं फुक्क मनूतय्त ल्याः खात।
36 वंश वंशकथं इमिगु मुक्कं ल्याः २,७५० म्ह दु।
37 परमप्रभुं उजं ब्यूगुकथं मोशा व हारूनं ल्याःखाःपिं नापलायेगु पालय् ज्या याइपिं कहातीतय् वंशयापिनिगु मुक्क ल्याः थ्व हे खः।
38 गेर्शोनीतय्त इमिगु वंश व परिवारकथं ल्याः खात।
39 स्वीदंनिसें नेय्दँ तक दुपिं नापलायेगु पालय् ज्या याःवइपिं,
40 वंश वंश व परिवार परिवारकथं मिजंत मुक्कं यानाः २,६३० म्ह दु।
41 परमप्रभुया उजंकथं मोशा व हारूनं ल्याःखाःपिं नापलायेगु पालय् ज्या याइपिं गेर्शोनीतय् वंशयापिनिगु मुक्क ल्याः थुलि हे खः।
42 मरारीतय्त इमिगु वंश व परिवारकथं ल्याः खात।
43 स्विदंनिसें नेय्दँ तक दुपिं मनूत नापलायेगु पालय् ज्या यायेत ल्यःपिं
44 वंश वंशकथं मुक्कं ३,२०० म्ह दु।
45 माशापाखें ब्यूगु परमप्रभुया उजंकथं मोशा व हारूनं ल्याःखाःपिं नापलायेगु पालय् ज्या याइपिं मरारीतय् वंशयापिनिगु मुक्क ल्याः थुलि हे खः।
46 थुकथं मोशा, हारून व इस्राएलया थकालितय्सं फुक्क लेवीतय्त इमिगु वंश व परिवारकथं ल्याः खात।
47 स्वीदंनिसें नेय्दँ तक दुपिं नापलायेगु पालय् ज्या यायेत व कु क्वबीत वःपिं
48 मनूतय्गु ल्याः मुक्कं ८,५८० म्ह दु।
49 परमप्रभुं मोशायात बियादीगु उजंकथं इपिं छम्ह छम्हय्सित ज्या यायेत व कु क्वबीत ल्यःगु खः।
थुकथं परमप्रभुं मोशायात बियादीगु उजंकथं हे वं इमित ल्याः खात।