फिलेमोनयात पावलं च्वःगु पौ
म्हसीका
फिलेमोन छम्ह नांजाःम्ह विश्वासी खः। व कलस्सीइ च्वंगु मण्डलीया दुजः जुइमा। व ओनेसिमस धाःम्ह दासया मालिक खः। व दास फिलेमोनया छेँनं बिस्युं वंगु खः। वं पावलयात नाप लात। उबलय् पावलयात झ्यालखानाय् कुनातःगु खः। पावलया पाखें व विश्वासी जुल। पावलं फिलेमोनयात थ्व पौ व हे दासया बारे च्वयातःगु खः। पावलं पतिइ फिलेमोनयात व दासयात लितछ्वया हयाच्वना, उकिं वयात दास थें मखु बरु थः हे किजा थें यानाः छेँय् दुका, छाय्धाःसा आः व नं छम्ह विश्वासी जुइ धुंकल धकाः इनाप यानातःगु दु।
धलः पौ
न्ह्यखँ .......................................... १-३
फिलेमोनया निंतिं प्रार्थना याःगु ....... ४-७
ओनेसिमसया बारे इनाप याःगु ........ ८-२२
क्वचाय्कूगु .................................. २३-२५
फिलेमोन
1
पावलपाखें ज्वजलपा
1 ख्रीष्ट येशूया निंतिं कैदी जुया च्वनाम्ह पावल व झी विश्वासी किजा तिमोथीयापाखें जिमि यःम्ह पासा व छगू हे ज्या याना च्वंम्ह फिलेमोन,
2 व विश्वासी केहेँ अप्पिया व झीपिं थें ख्रीष्टयागु ज्या याना च्वंम्ह अर्खिप्पस व छिमिगु छेँय् मुं वइपिं विश्वासीतय्त ज्वजलपा।
3 झी परमेश्वर बाः व प्रभु येशू ख्रीष्टं छिमित दया माया व शान्ति बियादीमा।
फिलेमोनयागु माया व विश्वास
4 प्रार्थना यायेबलय् जिं छन्त लुमंकाः न्ह्याबलें प्रभुयात सुभाय् बियाच्वनागु दु।
5 प्रभु येशू ख्रीष्ट व फुक्क विश्वासीतय्त छं उतिकं माया व विश्वास यानाच्वंगु खँ जिं न्यनागु दु।
6 ख्रीष्टयात विश्वास यानाः काःगु ज्ञानयात छं अज्ज बांलाक थुइका वने फयेमा धकाः जिं प्रार्थना यानाच्वनागु दु।
7 यःम्ह किजा, छं विश्वासीतय्त माया याःगु खँ न्यनाः जि तसकं लय्तायागु दु, अले साहस नं कयागु दु। छं परमेश्वरया मनूतय्त तसकं लय्ताय्कूगु दु।
ओनेसिमसया निंतिं बिन्ति याःगु
8 विश्वासय् किजा जूगुलिं जिं छन्त माःमाःगु खँय् उजं बी फु।
9 अय्नं माया यानाः जिं छन्त बिन्ति यानाच्वना। आः ला जि बुह्रा नं जुइ धुंकल, अले ख्रीष्टया निंतिं थथे कुंका नं च्वनागु दु।
10 जिं छन्त जि काय् ओनेसिमसयागु निंतिं थथे बिन्ति यानाच्वनागु खः। जिं वयात झ्यालखानाय् हे विश्वास याकाः जिम्ह काय् यानागु खः।
11 न्हापा ला व मनू छन्त छुं हे ज्यालगय् मजूम्ह खः। आः धाःसा व छन्त नं जितः नं ज्यालगय् जुल।
12 जिं वयात छन्थाय् हे लिछ्वयाहया च्वना। व जिगु नुगःचु थें खः।
13 वयात जि नाप हे तये मास्ति वःगु खः। भिंगु खँ न्यंकाः झ्यालखानाय् लाःबलय् छंगु पलेसा वयात हे जितः ग्वाहालि यायेत जिथाय् तयेगु खः।
14 अय्नं छंके मन्यंकं थथे यायेगु जितः बांलाः मताल। जिं छन्त छुं नं ज्याय् कर याये मखु, छं स्वयाः यःथें या।
15 छुं ई तक ओनेसिमस छ लिसे बाया च्वने माल। उकिं छं आः वयात सदां थः थाय् तये दइ।
16 आः वयात दास धकाः मतिइ तये मते, बरु थः हे किजा धकाः मतिइ ति। जितः व खनाः तसकं माया वं। थः दासं नापं विश्वास याःगुलिं छन्त व खनाः झन गुलि माया वन जुइ।
17 छं जितः पासा धकाः गथे दुकायेगु खः, वयात नं अथे हे दुका।
18 वं छन्त छुं मखुगु याःगु दुसा, अले छंके छुं कयातःगु दुसा जिगु नामय् च्वया ति।
19 जि पावलं, थःगु हे ल्हातं च्वयाच्वना -- जिं छन्त पुले माक्व पुला बी। छं जिगु पाखें हे जीवन काये खन धकाः ला धया च्वने माःगु मदु।
20 छ जिम्ह किजा जूगुलिं जिं छंके प्रभुया नामय् छता ज्या याना ब्यु धकाः फ्वनाच्वना। जिगु मन लय्ताय्का ब्यु।
21 छं जिं धयागु स्वयाः नं अप्वः याइ धकाः विश्वास दुगुलिं थथे च्वयाच्वनागु खः।
22 मेगु छता खँ नं धाये -- छिमिसं प्रार्थना यानाच्वंगुलिं जि हानं छिमिथाय् वये दइ ला धकाः आशा यानाच्वनागु दु। अय्जूगुलिं जितः क्वथा छकू स्वयाः तया ति।
23 येशू ख्रीष्टयागु निंतिं जि नापं तुं कुंका च्वंम्ह इपाफ्रासं छिमित ज्वजलपा धया हःगु दु।
24 जि नापं ख्रीष्ट येशूयागु ज्या याना च्वंपिं मर्कूस, अरिस्तार्खस, डेमस व लूकां नं छिमित ज्वजलपा धया हःगु दु।
25 प्रभु येशू ख्रीष्टं छिमित दया माया यानादीमा।