3
धात्थें धर्मी ठहरय् जुइगु
1 यःपिं दाजुकिजापिं, मूखँ छु धाःसा -- छिपिं प्रभुलिसे लय्ताया च्वँ। न्हापा च्वये धुनागु हे खँ हानं लिसा कयाः च्वयेत जिं थाकु मचाया। थुकिं छिमित हे भिं याइ।
2 खिचात थें ल्वाना जुइपिं, मभिंगु ज्या याना जुइपिं व मुक्ति कायेत म्हय् चिं तयेमाः धाइपिं लिसे होश याना जु।
3 धात्थेंगु चिं तइपिं ला झीपिं खः, छाय्धाःसा झीसं परमेश्वरयात पवित्र आत्मां सेवा यानाच्वना। येशू ख्रीष्टयाके भरोसा तयाच्वना, अले शरीरयागु ज्याखँय् झीसं भरोसा मतया।
4 शरीरयागु ज्याखँय् हे भरोसा तयेगु खःसां जिं दकलय् अप्वः भरोसा तये फु।
5 बुयाः च्यान्हु दुखुन्हु हे जितः म्हय् चिं तय्कूगु खः। जि बूसांनिसें हे इस्राएली खः, अज्ज ला बेन्यामीन कुलयाम्ह हिब्रू खः। धर्मयागु खँय् हे नं व्यवस्था मानय् याइम्ह फरिसी खः।
6 धर्मयागु ज्याखँय् नं जि विश्वासीतय्त दुःखकष्ट बीगुलिइ न्ह्यज्याना च्वनाम्ह खः। अले हानं जि यहूदीतय्गु थितिकुति मानय् यानाः धर्मी जुया च्वनाम्ह नं खः।
7 जिं अबलय् थःत फाइदा दुगु धकाः ताय्काच्वनागु फुक्कं येशू ख्रीष्टयागु निंतिं ज्यालगय् मजूगु धकाः ताय्का।
8 थुलि जक मखु, ख्रीष्ट येशू जिम्ह प्रभुयात म्हसीकेगु हे तःधंगु खः धकाः थुइकाः जिं मेगु फुक्कं ज्यालगय् मजू धकाः ताय्का। वय्कःयागु हे निंतिं जिं फुक्कं त्वःता, अले वय्कःयात लुइके फयेमा धकाः जिं अज्याःगु फुक्कं ज्यालगय् मजू धकाः ताय्कागु दु।
9 व्यवस्थां धाः थें याना जुयागुलिं जि धर्मी ठहरय् जूगु मखु बरु येशू ख्रीष्टयात विश्वास यानागुलिं परमेश्वरं हे जितः धर्मी ठहरय् यानादीगु खः।
10 आः ला जिं ख्रीष्टयात म्हसीकेगु, वय्कः हानं म्वाना वइगु शक्तियात सीकेगु व वय्कलं थें दुःखकष्ट सियाः वय्कः थें जुयाः सिना वनेगु हे जक मनं तुनागु दु।
11 जि सिनाः हानं म्वाना वइतिनि धकाः जिं आशा यानागु दु।
निशाना स्वयाः ब्वाँय् वनेगु
12 जिं फुक्कं काये धुन अले जि सिद्ध जुइ धुन धकाः जिं धायेत्यनागु मखु। थ्व हे सिरपाः कायेत जिं कुतः यानाच्वनागु खः। थुकिया निंतिं ख्रीष्ट येशूं जितः न्हापा हे थः मनू यानादी धुंकल।
13 यःपिं दाजुकिजापिं, थ्व फुक्कं काये धुन धकाः मखु। अय्नं जिं छता ज्या याये -- न्हापायागु खँ फुक्कं ल्वःमंकाः न्ह्यःने स्वयाः वनेत कुतः याये।
14 परमेश्वरं येशू ख्रीष्टपाखें सःताः बीत तयादीगु स्वर्गया सिरपाः कायेत जि निशानापाखे ब्बाँय् वने।
15 झीपिं बांलाक स्यूपिन्सं थथे मतिइ तये माः। छिपिं मध्ये सुयां छुं खँय् बिचाः पात धाःसा परमेश्वरं छिमित थ्व नं क्यनादी।
16 थन तक झीपिं गुकथं थ्यंकः वया उकथं हे न्ह्यज्याये।
17 यःपिं दाजुकिजापिं, छिमिसं नं जिं थें या। गथे जिपिं छिमिगु निंतिं नमुना जुया, अथे याइपिं मेपिनिगु पाखें नं स्यना का।
18 जिं छिमित न्हापा नं तःकःमछि धाये धुन। आः नं मिखाय् ख्वबि तयाः जिं धयाच्वना -- ख्रीष्टयागु क्रूसया शत्रु जुयाच्वंपिं नं यक्व हे दु।
19 थज्याःपिं मनूत नाश जुया वनी। छाय्धाःसा प्वाः हे थुमिगु द्यः खः, लज्या चायेमाःगु खँय् नं थुमिसं घमण्ड याना जुइ। अले थुमिसं थ्व संसारयागु ज्याखँय् जक मन तया जुइ।
20 झीपिं ला स्वर्गया नागरिकत खः। झीपिं मुक्ति बीम्ह झी प्रभु येशू ख्रीष्ट स्वर्गं झाइतिनि धकाः लँ स्वया च्वनापिं खः।
21 वय्कलं फुक्कयात थःगु ल्हातय् कयादी फु। थ्व हे शक्तिं वय्कलं झीगु थ्व बमलाःगु व सिना वनिगु म्हयात वय्कःयागु थें सिना मवनिगु यानादी।