101
जुजु व वया बचं
दाऊदया भजन
1 जिं छिगु सदां दयाच्वनीगु
दया माया व न्याययागु
म्ये हाले,
हे परमप्रभु,
जिं म्ये हालाः
छिगु प्रशंसा याये।
2 जिगु पहःचहः द्वं मदुगु जुइ
छि जिथाय् गुबलय् झायेगु?
जिं थःगु छेँय् शुद्ध जीवन हने।
3 जिं मभिंयात
गुबलें सह याये मखु,
परमेश्वरपाखें फहिला
वनिपिनिगु ज्या
जितः तसकं मयः।
इपिं जिलिसें प्यपुनी मखु।
4 मभिंगु मति दुपिं मनूतपाखें
जि तापाक च्वने।
जिं मभिं ज्या नाप
छुं स्वापु तये मखु।
5 थः जःलाखःलाया बारे
मखुगु खँ ल्हाइम्हय्सित
जिं नाश यानाबी।
फुइँ यानाजुइपिं व घमण्डी
मनूतय्त
जिं सह याये मखु।
6 जिं परमेश्वरयात विश्वास याइपिं
मनूतय्त जक ल्ययाः
थःगु दरबारय् तये।
अले द्वं मदय्कः जुइपिन्सं जक
जिगु सेवा याइ।
7 ध्वंलाइम्ह मनू जिगु छेँय्
च्वने दइ मखु।
मखुगु खँ ल्हाइम्ह मनू
जिगु मिखाया न्ह्यःने
च्वने दइ मखु।
8 जिं न्हियान्हिथं सुथ पतिकं
देशय् च्वंपिं दुष्टतय्त
न्हंकेगु याये।
परमप्रभुया शहरं मभिं ज्या याइपिं
सकसितं पितिनाछ्वये।