108
दुःखया इलय्
ग्वाहालिया निंतिं प्रार्थना
1 जिगु नुगः क्वातु हे
परमेश्वर,
जिगु नुगः क्वातु।
जिं दुनुगलं निसें छितः
तःधंकाः म्ये हालांच्वने,
छितः तःधंकाच्वने।
2 अय् वीणा दँ, अय् सारंगी दँ।
जिं सुथयात नं थनाबी।
3 जिं फुक्क मनूतय्गु न्ह्यःने
छितः सुभाय् बी,
हे परमप्रभु।
जिं जाति जातियापिनिगु न्ह्यःने
छितः तःधंकाः म्ये हाले।
4 छिगु सदां दयाच्वनिगु
दया माया
आकाश स्वयाः तःधं,
छिगु विश्वास याये बहःसू
आकाश तक थ्यनी।
5 हे परमेश्वर!
छि आकाश स्वयाः नं तःधनेमा।
छिगु महिमा पृथ्वी
ब्याक्क न्यनेमा।
6 छिं थःगु बल्लाःगु जव ल्हातं
जिमित बचय् यानादिसँ,
जिमिगु प्रार्थनाया
लिसः बियादिसँ।
छिं माया यानातःपिं मनूत
बचय् जुइमा।
7 परमेश्वरं थःगु पवित्र थासं
थथे धयादीगु दु --
“जिं त्याके धुंकाः शकेमयात
ब्वथले।
अले सुक्कोतया गाःयात
थः मनूतय्त इनाबी।
8 गिलाद व मनश्शे नं
जिगु हे खः।
एफ्राइम जिगु
छ्यंया सुरक्षा खः।
यहूदा जिगु राजदण्ड खः।
9 मोआब जिगु
ल्हाः सिलेगु थल खः,
एदोमय् जिं
थःगु लाकां वांछ्वये।
थुकथं थ्व जिगु खः
धकाः क्यने।
पलिश्त देशयात त्याकाः
जि चिल्लाय् दनाः हाले।”
10 हे परमेश्वर!
सुनां जितः प्यखें पःखाः दुगु
शहरय् यंकाबी?
सुनां जितः एदोमय् यंकाबी?
11 हे परमेश्वर!
छु धात्थें हे छिं जिमित
त्वःतादियागु ला?
आः छि जिमि सेनालिसे
जुइ मखुत ला?
12 शत्रुतलिसें ल्वायेत जिमित
ग्वाहालि यानादिसँ।
छाय्धाःसा मनूतय्गु ग्वाहालि
ज्याख्यलय् मदु।
13 परमेश्वरया ग्वाहालिं
जिमिसं त्याके,
वय्कलं जिमि शत्रुतय्त
बुकादी।