11
परमेश्वरयागु भलसा
दाऊदया भजन
1 जि परमप्रभुया शरणय् वने,
उकिं छिमिसं जितः
गथे धाये फइ,
“झंगः थें ब्वयाः गुँच्वकाय् हुँ!”
2 स्व, दुष्टतय्सं सुलाः
भिं मनूतय्त कय्केत
थःपिनिगु धनुखय् बाण तयाः
साले धुंकल।
3 सारा संसार हे नाश जुइगु खःसा,
भिं मनूतय्सं
छु याये फइ धकाः?
4 परमप्रभु थःगु पवित्र देगलय् दी,
परमप्रभु स्वर्गया थःगु
सिंहासनय् च्वनादीगु दु,
वय्कलं मनूतय्सं याःगु ज्या
फुक्कं स्यू,
छाय्धाःसा वय्कलं
फुक्कं स्वयाच्वनादीगु दु।
5 परमप्रभुं भिंपिं व मभिंपिं
सकसितं जाँचय् यानादी।
वय्कलं मभिंपिं व मनू
स्यानाजुइपिन्त
यय्कादी मखु।
6 वय्कलं दुष्टतय्थाय्
मि व गन्धक गाय्कादी।
तच्वकं क्वाःगु फय् छ्वयाः
इमित सजाँय बियादी।
7 परमेश्वर धर्मी खः,
उकिं वय्कलं
भिंगु ज्या यय्कादी।
भिंगु ज्या याइपिन्सं
वय्कःयात खंकेफइ।