130
क्षमा व दया माया लागि प्रार्थना
यरूशलेमय् थहां वनेत हाःगु म्ये
1 हे परमप्रभु!
जि तसकं दुःख सियाच्वनागुलिं
तःसलं हालाः छिगु नां
कया च्वनागु दु।
2 हे प्रभु!
जिगु बिन्ति न्यनादिसँ।
दयाया लागि यानागु
जिगु बिन्ति न्यनादिसँ।
3 हे परमप्रभु!
छिं पापया ल्याःचा कयादीसा
सु दनाच्वने फइ?
4 तर छि क्षमा बियादीम्ह खः,
अथे जुयाः हे छिगु भय काइ।
5 जिं परमप्रभुयात पियाच्वना,
जिं दुनुगलंनिसें हे
वय्कःया लँ स्वयाच्वना।
अले जिगु आशा
वय्कःया वचनय् दु।
6 पालेतय्सं सुथय् पियाच्वंगु थें,
पालेतय्सं सुथय्
पियाच्वंगु स्वयाः अप्वः
जिं परमप्रभुयात पियाच्वना।
7 हे इस्राएल,
परमप्रभुयाके थःगु आशा तयाच्वँ,
छाय्धाःसा परमप्रभु सदां
दयाच्वनिगु दया माया दुम्ह
व उद्धार यानादीम्ह खः।
8 वय्कलं हे मू पुलाः
इस्राएलयात फुक्क पापं
छुतय् यानादी।