21
जुजु लडाइँनं लिहां वये धुंकाः
ब्यूगु सुभाय्
दाऊदया भजन
1 हे परमप्रभु,
छिं बल बियादीगुलिं
जुजु लय्ताःगु दु।
वयात त्याकेबियादीगुलिं
तसकं लय्ताःगु दु।
2 वं मनंतुंगु फुक्कं छिं
पूवंकादीगु दु।
वं फ्वंगु छुं नं
छिं मब्यू धयागु मदु।
3 छिं तःधंगु आशिष बियाः
वयात लसकुस यानादिल।
छिं वयागु छेनय्
भिंगु लुँयागु श्रीपेच
पुइकादिल।
4 वं छिके जीवन फ्वन,
अले छिं वयात
जीवन बियादिल,
छिं वयात ताःहकःगु आयु
व गुबलें मफुइगु जीवन
बियादिल।
5 छिगु विजय इमिगु निंतिं
तःधंगु इज्जत जूगु दु।
छिं इमित नां
व इज्जत बियादीगु दु।
6 छिगु आशिष वयाके
सदां दयाच्वनी,
अले छिनापं च्वनेदयाः
व तसकं लय्ताःगु दु।
7 जुजुं परमप्रभुयाके
भलसा तःगुलिं
अले दकसिबय् तःधंम्हसिया
सदां दइगु दया मायां यानाः
व गुबलें लिचिलेमाली मखु।
8 जुजुं थःगु शक्तिं
शत्रुत फुक्कसित
मात्तुमालाः ज्वनी।
जुजुं थःत महीपिं फुक्कसित
जव ल्हातं ज्वनी।
9 जुजुं थः खनेदय्कः वइबलय्
मिप्वालं कय्काः
इमित नाश याइ।
परमप्रभुं तमय् इमित मिं
भस्म यानादी।
10 इमि मचाखाचा
सुं नं ल्यनी मखु,
जुजुं इपिं फुक्कसित
सिधय्की।
11 इमिसं जुजुया विरोधय्
जाः ग्वःसां
इमिगु मभिंगु ग्वसाः
पूवनि मखु।
12 जुजुं इमित बाणं कय्की।
अले इपिं लिफः स्वयाः
बिस्युं वनी।
13 हे परमप्रभु!
छिगु तःधंगु शक्तिया निंतिं
जिमिसं छिगु प्रशंसा याये।
छिगु शक्तियात तःधंकाः
जिमिसं भजन हाले।