39
मनूतय्गु आयु चिहाकः
दाऊदया भजन, लय् तइम्ह यदूतूनया निंतिं
1 जिं थःम्हं थःत धया,
“जिं थःम्हं यानागु ज्या यात
बांलाक दुवाले,
अले जिगु म्हुतुं
पाप नवाकेबी मखु।
मभिंपिं मनूत न्ह्यःने दइबलय्
जिं पिचा तयाः म्हुतुप्वाः तिनाच्वने।”
2 जि अथे नमवासे च्वनाबलय्
अज्ज ला भिंगु खँ तक नं
नमवासे च्वनाबलय्
जितः झन सह याये
थाकुयावल।
3 जितः झन छु याये छु याये
जुयावल।
गुलि बिचाः यात
उलि हे मिं पूथें जुयावल।
अले जिं थथे मधासे
च्वने मफुत,
4 “हे परमप्रभु!
जिगु जीवन गुबलय् फुइ धकाः
क्यनादिसँ।
जि गुबलय् तक म्वानाच्वनी,
अले जिगु जीवन पलखया लागि
जक खः धकाः
जितः सीकेबियादिसँ।
जितः धयादिसँ, जि गुबलय् सी?
5 छिं जिगु जीवनयात
गुलि चिहाकः यानादियागु!
छिगु न्ह्यःने ला
जिगु आयु छु हे खः धकाः!
छिगु न्ह्यःने ला
जिगु आयु छुं हे मखु।
मनूतय्गु जीवन ला
छम्हू सासः जक हे खनि।”
सेला
6 मनूत ला किचः थें हे
थुखे उखे जुइ।
इमिगु ज्याया छुं हे मू मदु।
इमिसं धन-सम्पत्ति मुंकी,
तर सुनां काइ धकाः
इमिसं मस्यू।
7 उकिं हे परमप्रभु,
जिं छुकियागु आशा यायेगु?
जिगु आशा धयागु ला
छि हे जक खः।
8 जिगु पापपाखें
जितः बचय् यानादिसँ।
मूर्खतय्सं जितः हिस्याये
मफयेमा।
9 जि सुम्क हे च्वने,
जिं छसः नं नवाये मखु।
छाय्धाःसा जितः
छिं हे थथे यानादीगु खः।
10 अय्नं आः जितः
मेगु सजाँय बियादी मते।
छिगु ल्हाःया च्वतं जि सीन।
11 छिं मनूतय्त इमिसं याःगु
पापया निंतिं ब्वःबियादी,
अले सजाँय बियादी।
इमिगु सम्पत्तियात किलं नः थें
नाश यानादी।
मनूत धयापिं ला धात्थें हे
छम्हू सासः जक खनि।
सेला
12 हे परमप्रभु,
जिगु ख्वःसः न्यनादिसँ।
जिं ग्वाहालिया निंतिं यानागु
प्रार्थना न्यनादिसँ।
छाय्धाःसा छिगु निंतिं
जि नं जिमि तापाःबाज्यापिं थें
निन्हुप्यन्हुया पाहां जक खः।
13 जि सिनावने न्ह्यः,
जिगु नां मदयावने न्ह्यः हे
जिपाखें छिगु तं चीकादिसँ।
अले जि हाकनं लय्ताये फयेमा।