50
धात्थेंगु आराधना
आसापया भजन
1 दक्व शक्ति दुम्ह
परमप्रभु परमेश्वरं
पुर्बंनिसें पच्छिम तक
संसारय् च्वंपिं
फुक्क मनूतलिसे नवानादीगु दु,
अले सःतादीगु दु।
2 तसकं बांलाःगु सियोन पर्वतं
परमेश्वर थिनावइ।
3 झी परमेश्वर झाइतिनि,
अले वय्कः सुम्क
च्वनादी मखु,
वय्कःया न्ह्यःने
भस्म याइगु मि दु,
अले वय्कःया छचाःखेरं
ग्यानापुगु ग्वःफय् दु।
4 थः प्रजाया न्याय यायेत
वय्कलं आकाश
व पृथ्वीयात सःतादी,
5 “बलि छायाः
जिनापं बाचा च्यूपिं
जिमि विश्वास यायेबहःपिं
मनूतय्त जिथाय् मुंकि।”
6 परमेश्वर थः हे न्यायाधीश खः।
आकाशयात वय्कःया
धार्मिकता घोषणा याकेब्यु!
सेला
7 “हे जिमि मनूत न्यँ,
जिं नवाये,
हे इस्राएल,
जिं छंगु विरोधय् साक्षी बी,
जि परमेश्वर खः,
छिमि परमेश्वर।
8 छं जिथाय् छायेहःगु
होमबलि व बलिदानया खँय्
जिं छन्त ब्वःबी मखु।
9 अय्नं छंगु सागःयाम्ह द्वहं
वा छंगु बथांयाम्ह दुगुचा
जितः म्वाः।
10 दक्व गुँपशु
व द्वलंद्वः डाँडायापिं पशुत
जिगु हे खः।
11 पहाड पहाडयापिं दक्व
झंगःपन्छितय्त
जिं म्हस्यू
अले ख्यलय् च्वंपिं
फुक्क प्राणीत जिगु हे खः।
12 नयेपित्याःम्ह जूगु जूसां
जिं छन्त धायेगु मखु।
संसार व उकी दुगु फुक्क
जिगु हे खः।
13 छु जिं द्वहंया ला नयेगु?
वा दुगुचाया हि त्वनेगु?
14 परमेश्वरयात सुभाय्या
बलि छा,
अले दकलय् तःधंम्हय्सिगु लागि
थःगु भाकल पूवंकि!
15 दुःखया इलय्
जितः प्रार्थना या!
जिं छन्त बचय् याये,
अले छं जितः तःधंकी।”
16 दुष्टयात धाःसा परमेश्वरं
धयादी,
“जिगु आज्ञा न्यंकेगु
छंगु छु अधिकार?
थःगु म्हुतुं जिगु बाचाया खँ
छाय् ल्हायेगु?
17 छन्त जिं स्यनेकने
याःगु मयः,
अले छं जिगु वचनयात
क्वह्यंकीगु।
18 खुँयात नापलाइबलय्
छ खुँया हे पासा जुइगु,
अले छ व्यभिचारीतनापं
मिलय् जुयाः जुइगु।
19 छ मभिंगु खँ ल्हायेत
न्ह्याबलें न्ह्यज्याः।
अले मखुगु खँ ल्हायेत
छ भचा नं मछाः मजू।
20 छं थः हे दाजुकिजाया
विरोधय् खँ ल्हाइगु,
छं थः हे मांया काय्या बारे
मखुगु खँ ल्हाइगु।
21 छं थथे याःसां
जिं छुं मधया।
जि नं छ थें हे खः धकाः
छं मतिइ तल।
आः जिं छन्त द्वपं बी,
अले छंगु छता छता दोष
उलाः क्यने।
22 हे परमेश्वरयात ल्वमंकीपिं न्यँ,
छिमिसं जितः वास्ता मयाः।
जिं छिमित कुचा कुचा
थलाः बी।
छिमित बचय् याइपिं
सुं हे दइ मखु।
23 सुभाय्या बलि
छाइम्हय्सिनं हे
जिगु महिमा याइ,
अले जिगु लँय् जूपिन्त
जिं परमेश्वरयागु मुक्ति क्यने।”