54
शत्रुपाखें छुत्काराया निंतिं प्रार्थना
दाऊदया मश्किल, लय् तइम्हय्सिगु निंतिं – तारं थाइगु बाजं थानाः हालेगु। जीफितय्सं शाऊलयाथाय् वनाः “दाऊद गन सुलाच्वंगु दु जिमिसं स्यू” धकाः धाःबलय्।
1 हे परमेश्वर!
छिं थःगु नामं जितः
बचय् यानादिसँ!
छिगु शक्तिं
जितः छुत्कारा बियादिसँ।
2 हे परमेश्वर!
जिगु प्रार्थना न्यनादिसँ!
जिगु सः न्यनादिसँ!
3 शत्रुत जिगु विरोधय्
जुयाच्वंगु दु।
ग्यानापुसे च्वंपिं मनूतय्सं
जितः स्यायेत स्वयाच्वंगु दु।
इमिसं परमेश्वरयागु
भय मकाः।
सेला
4 स्व, परमेश्वरं जितः
ग्वाहालि यानादी।
परमप्रभु जितः
लिधंसा बीम्ह खः।
5 परमेश्वरं जिमि शत्रुतय्गु
मभिंगु ज्या इमित हे
लित बियादीमा।
छिं थःम्हं धयादी थें
इमित नाश यानादिसँ।
6 जिं छितः लय्तायाः
मेलबलि छाये हये।
जिं छिगु नांयात तःधंके,
हे परमप्रभु!
छाय्धाःसा छि भिंम्ह खः।
7 वय्कलं जितः
फुक्क दुःखकष्टं छुत्कारा
बियादिल।
अले वय्कलं जिमि शत्रुतय्त
बुकादीगु जिं खनागु दु।