72
जुजुया निंतिं प्रार्थना
सोलोमनया भजन
1 हे परमेश्वर,
जुजुयात न्याय
गथे यानाः
यायेगु स्यनाबियादिसँ।
जुजुया काय्यात धर्मी जुइगु खँ
स्यनाबियादिसँ।
2 छिकपिनि मनूतय्त
वं धार्मिकतां
शासन याये फयेमा,
अले क्वत्यय्काच्वंपिन्त नं
उतिग्यंक न्याय याये फयेमा।
3 पहाड पहाडं मनूतय्गु निंतिं
भिं हयेमा!
जमिन जमिनय् न्ह्याथासं
धार्मिकतां जायेमा।
4 जुजुं चीमिपिन्त नं
उतिग्यंक बिचाः यायेमा,
मगाःमचाःपिन्त ग्वाहालि यायेमा
अले इमित क्वत्यलातःपिन्त
न्हंकाछ्वयेमा।
5 सूर्य व तिमिला दत्तले
छिकपिनि मनूतय्सं सदां सदां
छिगु भय कयाच्वनेमा।
6 घाँय् लयातःगु ख्यलय्
वा वये थें
जुजुं राज्य यायेमा,
झ्वार्र वा वयाः बँयात प्याकू थें
जुजुं राज्य यायेमा।
7 वं राज्य यातले
धर्मीत च्वन्ह्याना च्वनेमा।
गुबलय् तक
तिमिला दयाच्वनी,
उबलय्तक
शान्ति जुयाच्वनेमा।
8 वयागु राज्य छगू समुद्रं
मेगु समुद्र जुयाः न्यनावनेमा
यूफ्रेटिस खुसिंनिसें
पृथ्वीया कुनय् तक।
9 मरुभूमिया जातितय्सं
वयागु न्ह्यःने क्वछू वइ।
वया शत्रुत बँय् चातुवाः वनी।
10 तर्शीश व तापाक तापाक च्वंगु
समुद्रया सिथय् च्वंपिं जुजुतय्सं
वयात कर पुलेहइ।
शेबा व सेबाया जुजुपिन्सं
वयात देछा छाःवइ।
11 फुक्क जुजुपिं वयागु न्ह्यःने
क्वछू वइ।
फुक्क जातियापिन्सं वयागु
सेवा याइ।
12 वयाके ग्वाहालि फ्वंपिं
चीमिपिन्त
व हाःनाः मदुपिं व मगाःमचाःपिन्त
बचय् याइ।
13 वं मगाःमचाःपिं
व नये मखंपिन्त दया याइ,
अले इमिगु उद्धार याइ।
14 इमित अन्याय व अत्याचारं
लिगना हइ।
इमिगु ज्यान वयागु निंतिं
अतिकं मू वं।
15 जुजु ताःई तक म्वाना
च्वनेमा!
शेबाया लुँ वयात दयेमा।
मनूतय्सं वयागु निंतिं सदां
प्रार्थना यायेमा।
सदां मनूतय्सं वयात
धन्य धायेमा।
16 देशय् यक्व अन्न सयेमा,
पहाडत बालिं जायेमा
लेबनानय् थें फलफुलं जायेमा
घाँसं ख्यः जाः थें
मनूतय्सं शहर जायेमा।
17 वयागु नां न्ह्याबलें
लुमनाच्वनेमा।
सूर्य दतले
वयागु नां जायाच्वनेमा।
फुक्क जातियापिन्सं वयापाखें
परमेश्वरया
आशिष कायेमा।
सकसिनं वयात
धन्य धायेमा।
18 परमप्रभुयात प्रशंसा या,
इस्राएलया परमेश्वरयात!
अजू चायापुगु ज्या वय्कलं हे
जक यानादी।
19 वय्कःयागु महिमां जाःगु नांया
सदां प्रशंसा जुयाच्वनेमा।
पृथ्वी न्यंक वय्कःयागु महिमां
जायेमा।
आमेन! आमेन!
20 यिशैया काय् दाऊदया प्रार्थना
क्वचाल।