75
न्याय यानादीम्ह परमेश्वर
आसापया भजन, लय् तइम्हय्सिगु निंतिं – “स्यंके मते” धाःगु रागय् हालेगु म्ये।
1 जिमिसं सुभाय् बी हे परमेश्वर,
जिमिसं सुभाय् बी।
छाय्धाःसा छि जिमिगु
तापाक मदु।
मनूतय्सं छिगु अजू चायापुगु ज्या
कनाजुइ।
2 छिं धयादीगु दु,
“जिं न्यायया निंतिं
ल्वःगु ई ल्ययागु दु।
जिं पक्षपात मजुइक
न्याय याये।”
3 भ्वखाय् ब्वयाः
मनूत व पृथ्वी
वाराक्वारा संसां,
जिं धाःसा थुकिया जगयात
लिधंसा बियातये।
सेला
4 घमण्डीतय्त जिं धाये,
“घमण्ड याये मते।”
दुष्टतय्त जिं धाये,
“फुर्ति याये मते।
5 स्वर्गया विरोधय् ल्हाः
ल्ह्वने मते।
अले विरोधी खँ
ल्हाना जुइ मते।”
6 सुं मनुखं, न पुर्बं, न पच्छिमं,
न उत्तरं, न दच्छिनं जुइमा
सुनानं मनूयात थछ्वये फइ मखु।
7 न्याय याइम्ह ला परमेश्वर खः।
सुयात क्वफायेगु
सुयात थछ्वयेगु धकाः
वय्कलं हे क्वःछिनादी।
8 परमप्रभुया ल्हातिइ ख्वला दु,
थ्व ख्वला
वय्कःया तमं जाः।
वय्कलं थ्व हे
ख्वलां त्वंकादी।
दुष्टत फुक्कसिनं
थ्व हे ख्वलां त्वनी,
भ्याःभचा हे मल्यंक।
9 तर जिं ला न्ह्याबलें
परमेश्वरं यानादीगु ज्याया
खँ कनाजुये
जि ला न्ह्याबलें याकूबया
परमेश्वया भजन हालाजुये।
10 परमेश्वरं धयादी,
“दुष्टतय्गु शक्ति जिं न्हंकाबी।
अले धर्मीतय्गु शक्ति
अप्वय्काबी।”