77
दुःखया इलय्
याउँक दइगु ग्वाहालि
आसापया भजन, लय् तइम्ह यदूतूनया निंतिं
1 जिं ततःसलं
परमेश्वरयात
प्रार्थना याना।
जिगु सः न्यनादिल!
2 तःधंगु दुःख जूबलय्
जिं परमप्रभुयात मालाजुया।
चच्छि चच्छिं जिं ल्हाः ल्ह्वनाः
प्रार्थना याना।
अय्नं जिगु मन
याउँसे मच्वं।
3 परमेश्वरयागु बिचाः यायेबलय्
जिं झसुकाः तये।
ध्यान यायेबलय्
नं जिगु नुगः क्वतुनावनी।
सेला
4 छिं जितः थ्यने नं मब्यू
नुगः क्वतुनाः
जिं नवाये तकं मफइ।
5 जिं वने धुंकूगु खँ लुमंके,
यक्व न्हापाया दिंया खँ।
6 जिं बहनिइ थःगु म्ये लुमंका
जिं ध्यानय् दुनाः थःत हे न्यना,
7 “परमेश्वरं झीत
सदांया निंतिं हे
त्वःतादी ला?
वय्कलं आः जितः गुबलें हे
दया यानादी मखुत ला?”
8 “वय्कःयागु
सदां दयाच्वनीगु माया
सदांया निंतिं तन ला?
वय्कःया बचं
सदांया लागि फुत ला?
9 परमेश्वरं दया माया यायेगु
ल्वःमंकादिल ला?
तमय् वयाः वय्कलं
दया यायेगु त्वःतादिल ला?”
सेला
10 अले जिं बिचाः याना,
“थ्व हे जिगु दुःख खः।
दक्वसिबय् तःधंम्हय्सिया
जव ल्हाः जिगु छेनं
चिला वन।”
11 अले जिं छिं यानादीगु
फुक्क खँ लुमंका,
हे परमप्रभु।
छिं न्हापा यानादीगु
अजू चायापुगु ज्या लुमंका।
12 जिं व फुक्क खँय् बिचाः याये।
जिं छिं यानादीगु अजू चायापुगु
ज्यायात ल्वःमंके मफु।
13 हे परमेश्वर,
छिं यानादीगु फुक्क ज्या
पवित्र जू।
छि थें तःधंम्ह परमेश्वर
मेम्ह सु दइ?
14 छि अजू चायापुगु ज्या
यानादीम्ह परमेश्वर खः।
छिं थःगु शक्ति
जाति जातियापिन्त क्यनादिल।
15 छिं थःगु शक्तिं थः मनूतय्त
मू पुलाः त्वःतकादिल,
याकूब व योसेफया सन्तानयात।
सेला
16 हे परमेश्वर,
छितः खनाः समुद्र नं ग्यात।
ततःजाःगु समुद्र नं दुनेंनिसें
वाराक्वारा सन।
17 सुपाँचं वा गात,
आकाशय् न न्यात
प्यखें हाबलासा त्वल।
18 न न्याःगु सः
आकाश न्यंक न्यन।
हाबलासाया जलं प्यखें
जल्ल थित।
पृथ्वीइ भ्वखाय् ब्वयाः
लिगिलिगि सन।
19 छिं समुद्रयात फायाः
लँ दय्कादिल।
तर छिगु पलाया चिं
गनं खने मदु।
20 छिं थः मनूतय्त फैजवालं थें
लँ क्यनादिल।
अले मोशा व हारूनयात
इमि नायः यानादिल।