79
छि गुबलय् तक
जिपिंलिसें तंम्वयाच्वनादीगु?
आसापया भजन।
1 हे परमेश्वर,
पिनें वःपिन्सं
छिगु सर्बय त्याका काल।
इमिसं छिगु पवित्र देगःयात
अशुद्ध यानाबिल।
इमिसं यरूशलेमयात
नाश यानाथकल।
2 छिकपिनि दासतय्गु
सीम्हयात इमिसं
गिद्धयात नकेत त्वःताथकल।
छिकपिनि विश्वास याये
बहःपिनिगु सीम्हयात
इमिसं गुँपशुतय्त
नकेत त्वःताथकल।
3 यरूशलेम न्यंक लः थें
हिबाः वय्काथकल।
सीपिन्त थुनेत तकं
सुं हे मल्यन।
4 जवंखवं च्वंपिं जातितय्सं
झीत हिस्यानाच्वन।
झीत हेबाय्चबाय् यानाः
इपिं न्हिलाच्वन।
5 हे परमप्रभु,
छि गुबलय् तक जिपिंलिसें
तंम्वयाच्वनादीगु?
छि न्ह्याबलें तंम्वयादीगु ला?
छिगु तं सह याये मफय्कः
च्यानाच्वनी?
6 छिगु तं छितः नालामकाःपिं
जातियात प्वंकादिसँ।
छिगु तं छितः प्रार्थना
मयाइपिन्त प्वंकादिसँ।
7 छाय्धाःसा इमिसं याकूबया
सन्तानतय्त स्याःगु दु,
व छि च्वनीगु थाय्यात
नाश यानाथकूगु दु।
8 जिमि पुर्खायागु पापयागु निंतिं
जिमित सजाँय बियादी मते।
जिमित दया माया यानादिसँ।
जिमिसं फुक्क आशा त्वःतेधुन।
9 हे परमेश्वर,
जिमित ग्वाहालि यानाः
बचय् यानादिसँ।
थःगु नांया महिमाया निंतिं
जिमिगु पापयात
क्षमा यानादिसँ।
10 जाति जातियापिन्सं जिमिके
“छिमि परमेश्वर गन दु”
धकाः छाय् न्यनाच्वन?
छिं जिमिगु मिखा न्ह्यःने
छिकपिनि दासतय्गु हिबाः
वय्कूगुया ब्वला साइतिनि धकाः
जात जातियापिन्त क्यनादिसँ।
11 कुना तःपिनिगु दुःखयागु सः
न्यनादिसँ।
थःगु तःधंगु शक्तिं
स्यायेत क्वःछिनातःपिन्त
बचय् यानादिसँ।
12 हे परमप्रभु!
छितः हेस्याःपिं जःलाखःलायात
न्हय्दुगं अप्वः
ब्वला सायादिसँ।
13 अले छिकपिनि मनू,
छिकपिनि बथांया फै,
जिमिसं छितः सदां सदां
सुभाय् बियाच्वने,
पुस्तां पुस्ता तकं
छितः तःधंकाच्वने।