98
परमेश्वर संसारयाम्ह शासक खः
1 परमप्रभुया निंतिं
छपु न्हूगु भजन हा,
वय्कलं अजूचायापुगु ज्या
यानादीगु दु,
थःगु शक्ति व पवित्र बलं
वय्कः त्याःगु दु।
2 परमप्रभुं थःगु उद्धारया ज्या
क्यनादीगु दु,
वय्कलं थःगु धार्मिकता
जाति जातितय्त
क्यनादीगु दु।
3 वय्कलं इस्राएलीतय्त सदां
दयाच्वनिगु दया माया
बी धकाः
चिनादीगु बाचा व विश्वास याये
बहःम्ह जुयेगु लुमंकादीगु दु।
पृथ्वीया कुंकुलामय् च्वंपिंसं
झी परमेश्वरं यानादीगु
उद्धार खंगु दु।
4 हे पृथ्वीयापिं सकल मनूत,
लय्तातां भजन हा,
लय्लय्तातां भजन हालाः
वय्कःयात प्रशंसा या।
5 परमप्रभुया प्रशंसा या!
वीणा थानाः परमप्रभुया
प्रशंसा या!
6 तुरही व नेकू पु,
अले परमप्रभु झी जुजुयात
लय्तातां जय जय या।
7 समुद्र व उकी च्वंपिं फुक्क
प्राणीतय्त
वय्कःयात तःधंकाः ततःसलं
हालेब्यु!
अले पृथ्वी व पृथ्वीइ च्वंपिं
सकसितं
वय्कःयात तःधंकाः ततःसलं
हालेब्यु!
8 खुसितय्सं ल्हाःपा थायेमा,
पहाडतय्सं छक्वलं लसतां
म्ये हालेमा।
9 थ्व परमप्रभुया न्ह्यःने जुइमा।
छाय्धाःसा वय्कः पृथ्वीइ
राज्य यायेत झायादीत्यंगु दु।
वय्कलं धार्मिकतां सुयागु
पँ मलिसें
संसारयापिं मनूतय्गु
न्याय यानादी।