16
1 लेवीतय्सं परमेश्वरया सनू हयाः दाऊदं व तयेत ग्वःगु पाल दुने तल, अले इमिसं परमेश्वरयात होमबलि व मेलबलि छाल।
2 दाऊदं होमबलि व मेलबलि छायेधुंकाः वं परमप्रभुया नामय् मनूतय्त सुवाः बिल।
3 अले वं सकलें इस्राएली मिजंत व मिस्तय्त छपा छपा मरि, छगः छगः खजूर व छज्वाँय् छज्वाँय् किसमिस इनाबिल।
4 परमप्रभुया सनूया न्ह्यःने सेवा यायेत, वय्कःयात इनाप यायेत, सुभाय् देछायेत अले परमप्रभु, इस्राएलयाम्ह परमेश्वरया प्रशंसा यायेत दाऊदं छुं लेवीत ल्यल।
5 इमि नायः आसाप खः। अले वया ल्यूयाम्ह जकरिया खः। यीएल, शमीरामोत, यहीएल, मत्तित्याह, एलीआब, बनायाह, ओबेद-एदोमयात वीणा व सारंगी थायेत ल्यल। आसापं धाःसा भुस्याः थाइगु।
6 अले परमेश्वरया बाचाया सनूया न्ह्यःने न्ह्याबलें तुरही पुयेत, पुजाहारीत बनायाह व यहासेलयात ल्यल।
दाऊदया सुभाय्या भजन
भज १०५:१-१५; ९६:१-१३; १०६:१,४७,४८
7 उखुन्हु आसाप व वया थःथितितय्त दाऊदं थ्व भजन परमप्रभुयात सुभाय् देछायेत बिल –
8 परमप्रभुयात सुभाय् देछा, वय्कःया नां का
जाति जातिया दथुइ वय्कलं छु यानादीगु खः व न्यंकि।
9 वय्कःया निंतिं भजन हा, वय्कःया प्रशंसाया म्ये हा,
वय्कःया फुक्क अजू चायापुगु ज्याया बारे कँ,
10 वय्कःया पवित्र नांयात तःधंकि, परमप्रभुयात मालिपिनिगु नुगः लय्तायेमा।
11 परमप्रभु व वय्कःया शक्तियात माला स्व, वय्कःयात माला तुं च्वँ।
12 वय्कलं यानादीगु गजबगु ज्या लुमंकि, वय्कःया अजू चायापुगु ज्या व वय्कःया नियम लुमंकि,
13 अय्, वय्कःया दास इस्राएलया सन्तान, अय्, वय्कलं ल्ययादीपिं याकूबया काय्पिं।
14 वय्कः परमप्रभु झी परमेश्वर खः। वय्कःया न्यायया ज्या पृथ्वी न्यंक जुइ।
15 वय्कलं थःगु बाचा न्ह्याबलें लुमंकादी, वय्कलं थःगु बाचा द्वलंद्वः पुस्तायात बियादीगु खः।
16 व बाचा वय्कलं अब्राहामलिसे चिनादिल, अले उकिया बारे वय्कलं इसहाकलिसे पाफयादिल।
17 गुगु वय्कलं याकूबलिसें पक्का यानादिल, अले इस्राएलनापं थथे धकाः
न्ह्याबलेंया बाचाकथं चिनादिल,
18 “जिं छन्त हे कनान देश बी। व छंगु थःगु सर्बय जुइ।”
19 अबलय् छं ल्याखय् कम, यक्व हे कम,
अले कनान देशय् परदेशी जुयाच्वंगु खः।
20 इपिं छगू देशं मेगु देश छगू राज्यं मेगु राज्य चाचाःहिलाः जुइ।
21 अय्नं सुं मनूयात इमित दुःख बीके मब्यू, इमित रक्षा यायेत वय्कलं जुजुपिन्त थथे धकाः ख्याच्वः बियादिल,
22 “जिं ल्ययापिं मनूतय्त थी मते, जिमि अगमवक्तातय्त स्यंके मते।”
23 हे पृथ्वीयापिं सकलें मनूत, परमप्रभुया न्ह्यःने म्ये हा,
न्हियान्हिथं वय्कलं यानादीगु उद्धारया भिंगु खँ न्यंकाच्वँ।
24 जाति जातियात वय्कःया महिमाया बारे न्यंकि,
सकल मनूतय् वय्कःया अजू चायापुगु ज्याया बारे कँ।
25 परमप्रभु तःधंम्ह व तसकं प्रशंसा याये बहःम्ह खः।
मेपिं द्यःतय्त स्वयाः वय्कःयात अप्वः मानय् यायेमाः।
26 जाति जाति याःपिं द्यःत ला मूर्ति जक खः, तर परमप्रभुं ला स्वर्ग दय्कादिल।
27 महिमा व गौरव वय्कःया न्ह्यःने दु, वय्कःयाथाय् बल व लसता दु।
28 हे जाति जातिया छेँजःपिं, परमप्रभुयात तःधंकि, वय्कःया महिमा व बलयागु प्रशंसा या।
29 परमप्रभुया नांयात तःधंकेत वय्कःया प्रशंसा या, देछा ज्वनाः वय्कःया देगलय् वा।
पवित्रतां झःझः धाय्कः परमप्रभुया आराधना या।
30 हे पृथ्वीयापिं सकल मनूत, वय्कःया ग्याःभय का!
संसार धिसिलाक्क च्वंगु दु, उकियात संके फइ मखु।
31 पृथ्वी व आकाश लय्तायेमा! परमप्रभुं हे शासन यानादी धकाः जाति-जातियात धायेमा।
32 समुद्र व अन दुपिं फुक्क प्राणीत लय्तायाः थ्वय्क हालेमा। ख्यः व उकी दुगु फुक्क चिज लय्तायेमा।
33 अले गुँया सिमातय्सं म्ये हाली, इमिसं परमप्रभुया न्ह्यःने लय्लय्तातां म्ये हाली, छाय्धाःसा वय्कः पृथ्वीया न्याय यायेत झाइ।
34 परमप्रभुयात सुभाय् ब्यु, छाय्धाःसा वय्कः भिंम्ह खः, वय्कःया दयामाया न्ह्याबलें दयाच्वनी।
35 अले थथे धकाः तःसलं हा, “हे जिमित उद्धार यानादीम्ह परमेश्वर, जिमित बचय् यानादिसँ। जिमित मुंकाः मेगु जातितपाखें बचय् यानादिसँ। अले जिमिसं छिगु नामय् सुभाय् बी फइ, अले छिगु पवित्र नांयागु प्रशंसा याये।”
36 परमप्रभु इस्राएलयाम्ह परमेश्वरया न्ह्याबलें प्रशंसा जुइमा।
अले सकल मनूतय्सं धाल, “आमेन! परमप्रभुया प्रशंसा जुइमा।”
37 अले दाऊद जुजुं आसाप व वया लेवी दाजुकिजापिन्त न्हियान्हिथं यायेमाःगु नियमकथं बाचाया सनूया न्ह्यःने न्ह्याबलें सेवा यायेत तल।
38 वं ओबेद-एदोम व वया खुइच्याम्ह (६८) ग्वाहालिमितय्त इपिंनापं सेवा यायेत तल। लुखाय् पिवाः च्वनेत यदूतूनया काय् ओबेद-एदोम व होसायात तल।
39 हानं दाऊदं पुजाहारी सादोक व वया पुजाहारी दाजुकिजापिन्त गिबोनया तःजाःगु थासय् परमप्रभुया पालया न्ह्यःने तल।
40 इमिसं परमप्रभुं इस्राएलीतय्त बियादीगु व्यवस्थाय् च्वया तःकथं सुथय् व बहनी परमप्रभुया निंतिं होमबलि वेदीइ छाइगु।
41 परमप्रभुया न्ह्याबलें दयाच्वनीगु दयामाया या कारणं वय्कःयात सुभाय् बीत दाऊदं हेमान, यदूतून व नां कयाः ल्यःपिं मनूतय्त तल।
42 पवित्र भजनया निंतिं तुरही पुइगु, भुस्याःत व मेमेगु बाजं थायेगु जिम्मा हेमान व यदूतूनयात ब्यूगु खः। यदूतूनया काय्पिन्त लुखाय् पिवाः च्वनेत तल।
43 अनंलि सकलें मनूत थथःगु छेँय् लिहां वन, दाऊद अले थः परिवारयात आशिष बीत वन।