9
शेबायाम्ह रानी सोलोमनयात नापलाः वःगु
1 शेबायाम्ह रानीं सोलोमनया नांजाःगु खँ न्यन। अले व थाकुगु थाकुगु न्ह्यसःत ज्वनाः सोलोमनयात जाँचय् यायेत यरूशलेमय् वल। वं थःनापं छगू हुल सुसाःकुसाः याइपिं मनूत अले मसला, मू वंगु थीत व यक्व लुँ क्वबिका तःपिं ऊँटत ज्वनाः वल। वं सोलोमनयात नापलात अले वयागु न्ह्यःने थःगु नुगलय् दुगु न्ह्यसःत तल।
2 सोलोमनं वयागु फुक्क न्ह्यसःया लिसः बिल। छगू नं न्ह्यसः वयात थाकु मजू।
3 शेबायाम्ह रानीं सोलोमनया बुद्धि व वं दय्कूगु लाय्कू खन।
4 वं सोलोमनयागु तेबिलयागु नयेगु नसा, लाय्कूया भारदारत व इमिसं पुनातःगु झःझः धाःगु वसः, वयात दाखमद्य त्वंकीपिं मनूत व इमिसं पुनातःगु वसः खन, अले परमप्रभुया देगलय् वं छाःगु होमबलि खन, उपिं फुक्क खनाः व छक्क जुल।
5 वं जुजुयात धाल, “छिं यानादीगु ततःधंगु ज्या व छिगु बुद्धिया बारे जिं थःगु देशय् छु न्यना, व धात्थें खः खनिसा।
6 तर थः हे वयाः थःगु मिखां मखंतले मनूतय्सं धाःगु खँय् विश्वास मयाना। छिगु बुद्धिया बारे जिं बच्छि हे न्यनागु मदु खनिसा। छिके मनूतय्सं धाःगु स्वयाः यक्व बुद्धि दु खनिसा।
7 धन्य खः छिकपिनि मनूत! न्हियान्हिथं छिगु न्ह्यःने च्वनाः छिगु बुद्धिया खँ न्यनीपिं छिकपिनि थुपिं भारदारत धन्य खः।
8 परमप्रभु थः परमेश्वरया प्रशंसा यानादिसँ! वय्कः छि खनाः गुलि लय्तायादी व छितः जुजु दय्काः थःगु नामय् शासन याके बियादीगु दु। वय्कलं इस्राएलीतय्त माया यानादी, अले वय्कःयात न्ह्याबलें इमित रक्षा याये मास्ति वः। उकिं छिपाखें न्याय व धार्मिकता तया तयेत वय्कलं छितः इस्राएलयाम्ह जुजु दय्कादीगु दु।”
9 अनंलि वं जुजुयात प्यंगू टन लुँ, यक्व मसला व मू वंगु थीत बिल। शेबायाम्ह रानीं ब्यूगु मसला थें ज्याःगु भिंगु मसला सोलोमनयात सुनानं ब्यूगु मदुनि।
10 ओपीरं लुँ ज्वनावइपिं हीराम व सोलोमन जुजुया मनूतय्सं चन्दनया सिँ व मू वंगु थीत नं हल।
11 जुजुं थुपिं सिँ परमप्रभुया देगः व लाय्कूया लागि त्वाथः अले म्ये हालिपिनिगु लागि वीणा व सारंगीत नं दय्कल। थ्व स्वयाः न्हापा यहूदा देशय् थज्याःगु बांलाःगु सुनानं खंगु मदु।
12 शेबायाम्ह रानीं फ्वंगु फुक्क खँ सोलोमन जुजुं वयात बिल। रानीं सोलोमनयाथाय् हःगु स्वयाः अप्वः वं रानीयात बिल। अले व थः मनूतनापं थःगु देशय् लिहां वन।
सोलोमन जुजुया सम्पत्ति
13 दँय्दसं सोलोमन जुजुयाथाय् निइस्वंगू टन ति लुँ वइगु।
14 उलि जक मखु वयाथाय् बन्जाःतपाखें नं कर वइगु। अरबी जुजुपिं व इस्राएलया प्रान्त प्रान्तयापिं बडा-हाकिमतय्सं वयात लुँ व वहःया कर पुलिगु।
15 जुजु सोलोमनं लुँया पातायागु ततःधंगु निसःगू ढाल दय्कल। छगू छगू ढाल दय्केत मुगलं दायातःगु ७ किलोग्राम ति लुँ छ्यल।
16 सोलोमनं लुँया पातायागु चिचीधंगु स्वसःगू ढाल नं दय्कल। छगू छगू ढालय् ३ किलोग्राम ति लुँ दु। जुजुं लेबनानया गुँ धाःगु लाय्कुलिइ उपिं तल।
17 अले जुजुं छगू तःधंगु सिंहासन नं दय्केबिल उकिया छुं भाग किसिया दंनं त्वपुयातःगु दु मेगु ब्व लुँ भुनातःगु दु।
18 उगु सिंहासनया खुगू त्वाथः व लुँयागु छगू तुति तयेगु पिर्का दु। थुपिं फुक्क सिंहासननापं स्वाःगु दु। फ्यतुयेगु थाय्या निखेंपाखें ल्हाः दिकेगु थाय् दु, अले उपिं ल्हाः दिकेगु थाय्नापं दनाच्वंपिं निम्ह सिंहत दय्कातःगु दु।
19 खुगुलिं त्वाथःया निखेंपाखे छम्ह छम्ह यानाः झिंनिम्ह सिंह नं दु। सोलोमनया सिंहासन थें ज्याःगु सिंहासन संसारय् मेगु मदु।
20 जुजु सोलोमनया फुक्क त्वनेगु ख्वलात भिंगु लुँयागु खः। अले लेबनानया गुँ धाःगु लाय्कुलिइ दुगु फुक्क थलबल नं भिंगु लुँयागु खः। वहःयागु छुं नं सामानत मदय्कू छाय्धाःसा सोलोमनया पालय् वहःयागु छुं मू मदु।
21 सोलोमनयाके हीरामया जहाज चले याइपिंनापं थुखे उखे सामान ल्ह्यइगु जहाजत नं दु। अले स्वदँ-स्वदँय् छकः तर्शीशयागु थुपिं ल्ह्यइगु जहाजत लुँ, वहः, किसिया दं, माकः व म्हय्खा ज्वनाः वइगु खः।
22 सोलोमन जुजुयाके पृथ्वीयापिं मेपिं जुजुपिन्के स्वयाः यक्व धन-सम्पत्ति व बुद्धि दु।
23 परमेश्वरं वयागु नुगलय् तयादीगु बुद्धि न्यनेत पृथ्वीयापिं फुक्क जुजुपिन्सं वयात नापलायेत स्वइगु।
24 वइपिं सकसिनं दँय्दसं वहः व लुँया थलबल, वसः, ल्वाभः, अत्तर, मसला, अले सल व खच्चरत कोसेलि हइगु।
25 थःगु सल व रथया लागि सोलोमनया प्यद्वः तबेला दु, अले वया झिंनिद्वःम्ह सल दु। उमित वं रथ तइगु शहर शहरय् व यरूशलेमय् थःथाय् तल।
26 वं यूफ्रेटिस खुसिंनिसें कयाः पलिश्तीतय्गु देश व मिश्र देशया सिमाना तकयापिं फुक्क जुजुतय् शासक खः।
27 वं यरूशलेमय् वहःयात ल्वहं थें दंकाबिल। अले देवदारुया सिँ धाःसा गुँया यःमरिमा थें यक्व दय्कल।
28 सोलोमनया लागि मनूतय्सं मिश्र देश व मेमेगु फुक्क देशं सलत हइगु खः।
जुजु सोलोमन सीगु
29 सोलोमन जुजु जुयाच्वंबलय् जूगु फुक्क खँ, वं याःगु फुक्क ज्या शुरुंनिसें लिपाथ्यंक व नातान अगमवक्ताया इतिहास, शीलोनी अहियाहया अगमवाणी व नबातया काय् यारोबामया बारे अगमवक्ता इद्दोया दर्शनया सफुलिइ च्वयातःगु दु।
30 सोलोमनं यरूशलेमं पिइदँ तक फुक्क इस्राएलय् राज्य यात।
31 अले व सित, वयात वया अबु दाऊदया नांयागु शहरय् थुन। वया लिपा वया थासय् वया काय् रहबाम जुजु जुल।