14
दाजुकिजापिन्त कुंखिने मते
1 विश्वास बमलाःनिम्ह मनूयात संगतिइ लसकुस या, वयागु खँयात कयाः जवाःसवाः याये मते।
2 विश्वास बल्लाःम्ह मनुखं थःत यःगु न्ह्यागुं नइ, विश्वास बमलाःम्ह मनुखं वाउँचा जक नइ।
3 अथे न्ह्यागुं नइम्हय्सिनं मनइम्हय्सित क्वह्यंके मते, अथे हे मनइम्हय्सिनं नं नइम्हय्सित कुंखिने मते। छाय्धाःसा परमेश्वरं इमित थः मनू दय्कादीगु खः।
4 मेपिनि च्यःयात न्याय याइम्ह छ सु खः? वं याःगु ज्या बांलाः बांमलाः धकाः वया मालिकं हे न्याय याइ। वं बांलाःगु ज्या याये फइ, छाय्धाःसा वया मालिकं वयात लिधंसा बी फु।
5 गुम्ह गुम्हय्सिनं मेमेगु दिनयात स्वयाः छन्हुयात तःधं धकाः मानय् याइ। गुम्ह गुम्हय्सिनं फुक्क दिनयात उत्थें खः धकाः मानय् याइ। फुक्कं थः थःम्हं विश्वास यानागु खँय् पक्का जुया च्वने माः।
6 मेमेगु दिन स्वयाः छन्हुयात तःधंकीम्हं प्रभुया निंतिं हे तःधंकी। सुनां नयेनी याइ वं प्रभुया निंतिं नइ, छाय्धाःसा वं परमेश्वरयात सुभाय् बियाः नइ। अथे हे मनइम्हय्सिनं प्रभुया निंतिं नइ मखु, अय्नं वं नं परमेश्वरयात सुभाय् बी।
7 झीपिं सुं नं थःगु निंतिं म्वाना च्वनागु मखु। अले सुं नं थःगु निंतिं सी मखु।
8 झीपिं म्वाना च्वंसा प्रभुयागु निंतिं हे म्वाना च्वनेगु खः। झीपिं सीसां प्रभुयागु निंतिं हे सीगु खः। अय्जूगुलिं सीसां म्वाःसां झीपिं प्रभुया मनूत खः।
9 छाय्धाःसा म्वाःपिनि नं सीपिनि नं प्रभु जुइत हे ख्रीष्ट सिनाः हानं म्वानादिल।
10 अय्जूगुलिं छिपिं वाउँचा जक नइपिन्सं थः दाजुकिजापिन्त छाय् कुंखिनेगु? छिपिं न्ह्यागुं नइपिन्सं थः दाजुकिजापिन्त छाय् हेस्यानागु? न्यँ, न्याय यानादीबलय् झीपिं फुक्कं परमेश्वरया न्ह्यःने च्वने मानि।
11 धर्मशास्त्रय् थथे च्वयातःगु दु --
“प्रभुं धयादिल --
जिं धात्थें धाये --
फुक्क मनूतय्सं
जिगु न्ह्यःने पुलिं चुइ माः।
अले हानं फुक्कसिनं
जि परमेश्वर खः धकाः धायेमाः।”
12 थुकथं झीपिं छम्ह छम्हय्सिनं थः थःगु ल्याः चाः परमेश्वरयात बी माः।
नये त्वनेगुलिइ सुयातं कुंखिने मते।
13 अय्जूगुलिं झीसं दाजुकिजापिन्त कुंखिनेगु त्वःता छ्वये माल, अले इमित क्वथलेगु व पापय् लाकेगु ज्या गुब्सं याये मखु धकाः झीसं पक्का याये नु।
14 प्रभु येशूयात विश्वास यानागुलिं छुं नं नसा थः हे अशुद्ध धयागु मदु धकाः जिं बांलाक थुइकाः सीका तयागु दु। सुनानं थ्व अशुद्ध खः धकाः बिचाः याःसा वयात व अशुद्ध हे जुइ।
15 छिमिगु नयेगु त्वनेगुलिं यानाः दाजुकिजापिनि नुगलय् स्यात धाःसा छिमिसं इमित अज्जं माया याये मफुनि। नयेगु त्वनेगुलिं छिमि दाजुकिजापिन्त स्यंके मते, छाय्धाःसा इमिगु निंतिं हे ख्रीष्ट सिनादिल।
16 अय्जूगुलिं छिमित भिंगु छु खः उकियात कर्पिन्सं मभिं धाय्के मते।
17 परमेश्वरयागु राज्य नयेगु व त्वनेगु जक मखु, बरु पवित्र आत्मां बियादीगु धार्मिकता, शान्ति व आनन्द खः।
18 थुकथं ख्रीष्टयागु सेवा याना जुइम्ह मनूयात परमेश्वरं स्याबास बियादी, अले वं थथे याना जूगु खनाः मनूतय्सं नं थ्व भिंम्ह मनू खः धकाः धाइ।
19 उकिं छु याःसा शान्ति जुइ, अले फुक्क मिलय् जुयाः सक्कसिगुं भिं जुइगु खः, व जक याना जुइगु स्वये माल।
20 छिमिगु नयेगु त्वनेगुलिं परमेश्वरयागु ज्यायात स्यंके मते। धात्थें धायेगु खःसा फुक्क नसा शुद्ध जू, अय्नं सुनानं नये त्वनेगुलिं मेम्ह विश्वासीयात स्यंकल धाःसा वं द्वंकूगु जुइ।
21 धात्थें हे -- ला मनयेगु, दाखमद्य मत्वनेगु व थः दाजुकिजापिन्त स्यंकीगु छुं नं मयायेगु हे बांलाः।
22 थ्व खँय् छिमिसं छु बिचाः यानाः परमेश्वर व छंगु दथुइ जक ति। थःम्हं भिं ताय्कूगु खँय् संका मयाइम्ह मनू हे धन्यम्ह खः।
23 सुनानं संका यानाः नल धाःसा परमेश्वरं वयात दोषी यानादी, छाय्धाःसा वं विश्वास यानाः मनःगु जुइ। थःगु विश्वासकथं मयाःगु न्ह्यागुं पाप खः।