13
समुद्रं पिहां वःम्ह पशु
1 अले जिं झिपु नेकू व न्हय्गः छ्यं दुम्ह पशु समुद्रं पिहां वयाच्वंगु खना। वयागु नेकू पतिकं श्रीपेच दु। वयागु छ्यं पतिकं परमेश्वरयात सराः बीगु नां च्वयातःगु दु।
2 व पशु चितुवा थें च्वं। वयागु तुति भालुयागु, म्हुतु सिंहयागु थें च्वं। अले वयात हे अजिङ्गरं थःगु शक्ति, थःगु सिंहासन व तःधंगु अधिकार बिल।
3 वयागु छगः छेनय् सीथें च्वंक घाः यानातःगु दु। अय्नं थ्व घाः लना वन। उकिं अजूचायाः संसारय् च्वंपिं फुक्क मनूत व पशुया ल्यू ल्यू वन।
4 सकलें मनूतय्सं अजिङ्गरयात पुजा याइगु खः। अले व अजिङ्गरं थःगु अधिकार पशुयात बिल। अथे जुयाः मनूतय्सं थथे धयाः पशुयात नं पुजा यात -- “थ्व पशु थें ज्याःम्ह सु दु? थ्व पशु नाप सु ल्वाये फइ?”
5 अले पशुयात घमण्डी खँ ल्हाइगु व परमेश्वरयात हेस्यानाः खँ ल्हाइगु छप्वाः म्हुतु बिल। पीनिला तक व पशुयात अधिकार याकेबिल।
6 अले परमेश्वरयात क्वह्यंकेत, वय्कःया नां व च्वनेगु थाय् अले स्वर्गय् च्वंपिं फुक्कसितं हेस्यानाः खँ ल्हायेत वं थःगु म्हुतुप्वाः चाय्कल।
7 वयात विश्वासीत नाप ल्वायेगु व इमित बुकेगु अधिकार बिल। फुक्क कुलयापिं मनूतय्त, देश देशयापिं मनूतय्त, थी थी भासं नवाइपिं मनूतय्त व जात जातियापिं मनूतय्त नं व पशुयात अधिकार याके बिल।
8 अले पृथ्वीइ च्वंपिं फुक्कसिनं व पशुयात पुजा याइ। संसारयागु सृष्टि जूसांनिसें स्याःम्ह भ्याःचाया जीवनयागु सफुलिइ नां च्वया मतःपिं फुक्कसिनं वयात पुज्याइ।
9 सुया न्हाय्पं दु वं न्यना का।
10 ज्वना यंके माःपिन्त
ज्वना हे यंकी।
तरवारं सीमाःपिं तरवारं हे सी।
थुबलय् हे खः सकल विश्वासीतय्सं विश्वास मत्वःतुसे सह यानाच्वने माःगु।
पृथ्वीं पिहां वःम्ह पशु
11 जिं हानं पृथ्वीं पिहां वयाच्वंम्ह छम्ह मेम्ह पशुयात खना। भ्याःचायागु थें वयाके निपु नेकू दु। वं नवाःगु अजिङ्गरं नवाःगु थें च्वं।
12 न्हापांयाम्ह पशुयागु न्ह्यःने हे वयागु फुक्क अधिकार थ्व पशुं कयाः चलय् यात। सीथें च्वंक घाः जुयाः नं लाःम्ह न्हापांयाम्ह पशुयात पृथ्वी व पृथ्वीइ च्वंपिं फुक्कसिनं पुजा याकेत थ्व पशुं कर यात।
13 थ्व मनूतय्सं खंक खंक हे आकाशं पृथ्वीइ मि गाय्केगु थेंज्याःगु तसकं हे अजूचायापुगु चिं याना क्यन।
14 न्हापांयाम्ह पशुयागु न्ह्यःने हे वयात अथे चिं क्यनेगु अधिकार ब्यूगुलिं पृथ्वीइ च्वंपिन्त थ्वं ध्वं लायेगु याना जुल। तरवारं पालाः घाः जुलं हे म्वाना च्वंम्ह न्हापांयाम्ह पशुयागु मूर्ति दय्कि धकाः फुक्कसितं उजं बिल।
15 न्हापांयाम्ह पशुयागु मूर्तियात नवाकेत सास तया बीगु व वयात पुजा मयाःपिन्त स्यायेगु अधिकार व पशुयात बियातःगु दु।
16 अले वं तःधंपिन्त, चिधंपिन्त, तःमिपिन्त, चीमिपिन्त, दासतय्त, दास मखुपिन्त फुक्कसितं नं कपालय् वा जव ल्हातय् चिं तयेकल।
17 थ्व चिं मदुपिं सुनानं न्याये नं दइ मखु, अले मी नं दइ मखु। थ्व चिं व पशुयागु नां धाःसां ज्यू, ल्याः धाःसां ज्यू।
18 थ्व थुइकेत बुद्धि माः। सुयाके बुद्धि दु वं थ्व ल्याःयागु अर्थ थुइका काइ। थ्व ल्याः मनूयागु नां खः। थ्व ल्याः ६६६ खः।