20
शैतानयात द्वःछि दँ तक चिनातःगु
1 अले जिं तसकं तःजाःगु गाःयागु ताःचा व तःपुगु सिखः छपु ल्हातिइ ज्वनाः स्वर्गं क्वहां वयाच्वंम्ह छम्ह स्वर्गदूतयात खना।
2 अजिङ्गर धाःसां ज्यूम्ह, पुलांम्ह सर्प धाःसां ज्यूम्ह, दुष्ट व शैतान धाःसां ज्यूम्हय्सित व स्वर्गदूतं ज्वनाः द्वःछि दँ तक चिनातल।
3 अले गालय् वांछ्वयाः पुसा तिनाः छाप तयाबिल। द्वःछि दँ मफुतले वं जात जातियापिं मनूतय्त थगय् मयायेमा धकाः थथे याःगु खः। द्वःछि दँ दये धुंकाः वयात पलख त्वःती।
4 अले जिं यक्व सिंहासन व उकी न्याय यायेगु अधिकार दुपिं फ्यतुनाच्वंगु खना। येशूयागु साक्षीया निंतिं, परमेश्वरयागु वचनया निंतिं छ्यं ध्यंकूपिं नं जिं खना। इमिसं व पशुयात व पशुयागु मूर्तियात पुजा मयाः, अले कपालय् नं, ल्हातिइ नं पशुयागु चिं तया मतः। इमिसं म्वाना वयाः ख्रीष्ट नापं द्वःछि दँ तक राज्य यात।
5 द्वःछि दँ फुना मवंतले ल्यंदनिपिं सीपिं म्वाना मवः, सीपिं म्वाना वःगु थ्व न्हापांगु खः।
6 सीपिं म्वाना वःगुली ब्वति काये दुम्ह मनू धात्थें हे धन्यम्ह व पवित्रम्ह खः। थुपिं हानं सी माली मखु, बरु थुपिं परमेश्वर व ख्रीष्टया पुजाहारीत जुयाच्वने दइ। अले वय्कः नाप इमिसं नं द्वःछि दँ तक राज्य याये खनी।
शैतान बूगु
7 द्वःछि दँ फुइवं शैतानयात कुना तःगु थासं त्वःता बी।
8 वं सारा संसारय् च्वंपिं जात जातियापिं मनूतय्त अर्थात “गोग” व “मागोगपिन्त” झंगःलानाः ल्वाकेत छथाय् मुंकी। इपिं समुद्रयागु फि थें यक्व दु।
9 अले इमिसं सारा संसारय् वनाः विश्वासीतय्त व परमेश्वरयात तसकं यःगु शहरयात घेरा तल। अले स्वर्गं मि कुतुं वयाः इपिं भस्म जुल।
10 इमित थगय् याना जूम्ह शैतानयात ज्वनाः गन्धकयागु मि गालय् क्वफाना बिल। पशु व फताहा अगमवक्तायात नं अन हे क्वफाना तःगु दु। इमित अन सदां चच्छि न्हिच्छिं सास्ति याना तइ।
दक्वसिबय् लिपायागु न्याय
11 अनं लिपा जिं तःधंगु तुयुगु सिंहासन व उकी फ्यतुना च्वंम्हय्सित खना। वय्कःयात खनाः आकाश व पृथ्वी मदया वन। अले इमित च्वनेत गनं हे थाय् मन्त।
12 अले जिं सिंहासनयागु न्ह्यःने तःधंपिं व चिधंपिं सीपिं दनाच्वंगु व सफूत पुइका तःगु खना। मेगु छगू सफू नं पुइकल, थ्व सफू जीवनयागु सफू खः। अले इमिसं याःगु ज्या स्वयाः जीवनयागु सफुलिइ च्वया तःथें सीपिं फुक्कसित न्याय यात।
13 समुद्रं समुद्रय् सीपिं फुक्कं लित बिल, मृत्यु व पातालं सीपिं फुक्कं लित बिल। थुकथं इमिसं याना वःगु थः थःगु ज्या स्वयाः इमित न्याय यात।
14 अले मृत्यु व पातालयात नं मि गालय् वांछ्वल। थ्व मि गाः धयागु हे निकः सीगु खः।
15 जीवनयागु सफुलिइ नां च्वया मतःपिं फुक्कसितं मि गालय् वांछ्वल।