शमूएलया निगूगु सफू
म्हसीका
शमूएलया निगूगु सफू शमूएलया न्हापांगु सफूया हे ल्यं दुगु ब्व खः। थ्व दाऊदं जुजु जुयाः न्हापा दच्छिनया यहूदाय् राज्य याःगु अले लिपा उत्तरय् इस्राएलनापं फुक्क जातियात राज्य याःगु इतिहास खः। दाऊदं थःगु राज्य अप्वय्केत अले थःगु शासन बल्लाकेत देय् दुने व पिनेयापिं शत्रुतलिसें गुकथं ल्वायेमाल धकाः थुकी बांलाक क्यनातःगु दु। दाऊदयात छम्ह थज्याःम्ह मनूकथं क्यनातःगु दु गुम्हय्सिनं परमेश्वरयात क्वातुक्क विश्वास याइ अले वय्कःयात आराधना याइ। दाऊद थःमनूतय्गु भलसा कायेत ताःलात। दाऊदयात थम्हं याये मास्तिवय्कूगु ज्या पूवंकेत गुबलें गुबलें दयामाया मदुम्ह व ग्यानापुगु पाप यायेत तकं लिमचिलिम्ह मनूकथं क्यनातःगु दु। तर परमेश्वरया अगमवक्ता नातानं वयागु पाप क्यनाब्यूबलय् वं थःगु अपराध मानय् यात। अले परमेश्वरं बियादीगु सजाँय फयेत तयार जुल। दाऊदया जीवन व वं याःगु ज्यां मनूतय्गु नुगः त्याकल। लिपा देशय् वःगु विपत्तिया इलय् इस्राएलीतय्सं मेम्ह जुजुया इच्छा याःबलय् इमिसं मेम्ह जुजु नं दाऊदया काय्पिं मध्ये छम्ह जुइमा धकाः इच्छा याःगु खः।
धलः पौ
यहूदाय् दाऊदया शासन १:१–४:१२
फुक्क इस्राएलय् दाऊदया शासन
१. शुरुया दँत ५:१–१०:१९
२. दाऊद व बतशेबा ११:१–१२:२५
३. दुःखकष्ट व थाकुगु ई १२:२६–२०:२६
४. लिपांगु दँत २१:१–२४:२५
२ शमूएल
1
दाऊदयाथाय् शाऊल सीगु खबर थ्यंगु
1 शाऊल सी धुंकाः थथे जुल, अमालेकीतय्त त्याकाः दाऊद लिहां वल अले सिक्लगय् निन्हु च्वन।
2 स्वन्हु दुखुन्हु थःगु वसः खुनाः छेनय् धू तयाः छम्ह मनू शाऊलया पालय् वल। व दाऊदया न्ह्यःने थ्यनेवं बँय् भ्वसुलाः दाऊदयात भागि यात।
3 दाऊदं वयात न्यन, “छ गनं वयाम्ह खः?” वं धाल, “जि इस्राएलया छाउनीं बिस्युं वयाम्ह खः।”
4 अले दाऊदं वयात हाकनं न्यन, “छु खबर ज्वनावया? जितः धा।”
वं धाल, “सिपाइँतय्त लडाइँ जूगु थासं लिनाहल अले लडाइँलय् यक्व मनूत सित। अले शाऊल व वया काय् जोनाथनयात नं स्यात।”
5 दाऊदं व खबर हःम्ह ल्याय्म्ह मनूयात न्यन, “शाऊल व वया काय् जोनाथन सीगु खः धकाः छं गय् यानाः सिल?”
6 व मनुखं धाल, “जि उबलय् गिल्बोया डाँडाय् च्वनाच्वनागु खः, जिं शाऊलं थःगु भालां चुयाच्वंगु अले शत्रुतय्गु रथत व सलगइपिं वया ल्यूल्यू वयाच्वंगु खना।
7 लिफः स्वःबलय् वं जितः खन अले वं जितः सःतल। जिं लिसः बिया, ‘धयादिसँ, छु दु?’
8 “वं जितः, ‘छ सु खः?’ धकाः न्यन।
“जिं ‘जि छम्ह अमालेकी खः’ धकाः धया।
9 “अनंलि वं धाल, ‘जिगु लिक्क वयाः जितः स्यानाछ्व। जि आः तक नं म्वाना च्वनातिनि, अय्नं जि सीत्यंगु दु।’
10 “अथे जुयाः जि वयागु लिक्क वनाः अले जिं वयात स्यानाबिया। छाय्धाःसा व तसकं बःमलाय् धुंकूम्ह खः, व आः म्वाइ मखुत धकाः जिं सिल। अले जिं वयागु छेनय् च्वंगु श्रीपेच व ल्हातय् च्वंगु ल्हाः बाला लिकयाः उपिं जिमि मालिकयाथाय् थन हयागु दु।”
11 थ्व खबर न्यनेवं दाऊदं थःगु लं खुत, अले वनापं दुपिं सकलें मनूतय्सं नं अथे हे यात।
12 अनंलि इस्राएलया घरानाया शाऊल, वया काय् जोनाथन व परमप्रभुया सिपाइँत लडाइँलय् सीगुलिं इपिं नुगःपा दादां ख्वल, अले सन्ध्याकाः इलय् तक हे इपिं अपसं च्वन।
13 अनंलि दाऊदं व खबर हःम्ह ल्याय्म्ह मनूयात धाल, “छ गनं वयाम्ह खः?”
अले वं लिसः बिल, “जि छम्ह अमालेकी खः, तर थौंकन्हय् जि छिकपिनिगु देशय् च्वनाच्वनागु दु।”
14 दाऊदं धाल, “परमप्रभुं अभिषेक याःम्हय्सित ल्हाः ह्वनेत छ छतिं मग्या ला?”
15-16 छाय्धाःसा “परमप्रभुया अभिषेक जूम्ह जुजुयात जिं स्यानागु खः” धकाः छं थम्हं हे धाल। अथे जुयाः दाऊदं वयात थथे धाल, “छंगु हि छंगु हे छेनय् लायेमा, अनंलि थः मनूत मध्ये छम्हय्सित वयात हमला या धकाः हुकुम बिल। अले व मनूयात कय्काः स्यात।”
शाऊल व जोनाथनया निंतिं दाऊद दुखं च्वंगु
17 शाऊल व वया काय् जोनाथनया निंतिं दाऊद थुकथं दुखं च्वन।
18 अले थ्व विलापया म्ये यहूदाया मनूतय्त स्यं धकाः हुकुम यात। थ्व म्ये याशारया सफुलिइ च्वयातःगु दु।
19 “हे इस्राएल, छंगु महिमायात छंगु ततःज्जाःगु थासय् स्याःगु दु।
तसकं बल्लाःपिं सिपाइँत, छिपिं गुकथं क्वदल!”
20 “गातय् थ्व खँ न्यंके मते,
अश्कलोनया लँय् लँय् थ्व खँ बय्बय् याना जुइ मते,
मखुसा पलिश्तीतय् म्ह्याय्पिं खुशी जुइ,
अले खतना मजूनिपिनि म्ह्याय्पिं लय्लय्ताइ।”
21 “हे गिल्बोया डाँडात,
छिमिथाय् सुतिलः व वा मवयेमा,
अले न छिमिथाय् अन्न सइगु बुँ हे दयेमा।
छाय्धाःसा बल्लाःम्ह सिपाइँया ढाल अशुद्ध जूगु दु,
शाऊलया ढाल चिकं मदयाः मथी।”
22 “सीधुंकूपिनिगु हिपाखें
व बल्लाःपिनिगु म्हपाखें
जोनाथनया धनुष वाण गुबलें लिहां वइ मखु।
शाऊलया तरवार मस्याय्कं गुबलें दापय् लिहां वइ मखु।”
23 “शाऊल व जोनाथन म्वानाच्वंबलय् मनूतय् यःपिं
व मनूतय्त तसकं दयामाया याइपिं खः।
सी धुंकाः नं इपिं थ्वपाखें अलग मजू।
इपिं इमा स्वयाः नं अप्वः ब्वाँय् वनीपिं खः,
अले इपिं सिंहत स्वयाः नं तसकं बल्लाःपिं खः।”
24 “हे इस्राएलया म्ह्याय्पिं,
शाऊलया निंतिं ख्व,
वं छिमित ज्वाल्ल ह्याउँसे च्वंगु तःजिगु लं फीकाबिल,
अले छिमिगु लनय् तिसा तयाः प्वाला प्वालां थिइकाबी।”
25 “तसकं बल्लाःपिं सिपाइँत, छिपिं गुकथं क्वदल!
जोनाथन छिमिगु डाँडाय् सिनाः क्वदलाच्वंगु दु।
26 हे जोनाथन, जिमि किजा, छंगु निंतिं जिं विलाप याये,
छ जिगु निंतिं तसकं यःम्ह व माया वंम्ह खः।
छंगु माया जिगु निंतिं तसकं अजू चायापुसे च्वं,
छंगु माया मिसातय्गु स्वयाः नं बांलाः।”
27 “तसकं बल्लाःपिं सिपाइँत, छिपिं गुकथं क्वदल!
अले लडाइँया फुक्क ल्वाभःत गथे नाश जुल।”