2
ल्यासेम्ह मिसा
1 जि शारोन मैदानया गंचास्वां
व ब्यासिइ बुया वइगु लिली स्वां खः।
ल्याय्मम्ह मिजं
2 कंमाया दथुइ ह्वयाच्वंगु लिली स्वां थें
जिमि प्रिय, मेपिं ल्यासेपिं स्वयाः हिसि दु।
ल्यासेम्ह मिसा
3 गुँया सिमात मध्ये स्याउया सिमा थें
मिजंतय् दथुइ जिमि यःम्ह प्रिय तसकं बांलाः।
जि वया किचलय् तसकं लय्तायाच्वने,
अले उकिया फलया सवाः तसकं सा।
4 वय्कलं जितः भ्वय् नयेगु छेँय् यंकादिल,
जिके दुगु झण्डा वय्कःया मतिना खः।
5 किसमिस ज्वाँय्लं जिगु बल न्हूगु यानादिसँ,
अले स्याउनं जितः ताजा यानादिसँ,
छाय्धाःसा मतिनां जि बमलाःगु दु।
6 वय्कःया खव ल्हाः जिगु छ्यं क्वय् दु
अले वय्कःया जव ल्हातं जितः घय्पुनातःगु दु।
7 हे यरूशलेमया मिसापिं,
जिं छिमित आज्ञा बी,
ख्यःया हरिण व चल्लाया नामं पाफयाः धा,
“पाय्छिगु ई मजुतले मतिनायात थने मते।”
निगूगु म्ये
२:८–३:५
ल्यासेम्ह मिसा
8 न्यँ! जिमि यःम्ह प्रियया सः!
बांलाक न्यँ! व वयेत्यंगु दु,
पहाड पुलाः डाँडा डाँडाय् तिंतिंन्हुयाः
जिथाय् ब्वाँय् वइ।
9 हे जिमि यःम्ह प्रिय, छ हरिण व नकतिनीम्ह चल्लाचा थें खः।
थन स्वसा! व पःखाःया क्वसं दनाच्वंगु दु
अले वं झ्यालं स्वयाहयाच्वनी,
अले वं टिकि झ्यालं स्वया हइ।
10 जिमि यःम्ह प्रियं जिलिसें खँ ल्हानाः थथे धाइ,
ल्याय्मम्ह मिजं
“हे जिमि प्रिय दँ,
अले जिनापं वा।
11 स्व, आः चिकुला वन,
अले बर्खा नं फुत।
12 पृथ्वीइ स्वां ह्वयेगु शुरु जूगु दु,
म्ये हालीगु ई थ्व हे खः,
सुकुभत्तु जू वःगु सः झीगु देशय् ताये दत।
13 यःमरिमाय् फल सयाः पाकय् जुइत्यंगु दु,
दाखक्यबं दाखया स्वां ह्वयाः नस्वाः वयाच्वंगु दु।
अथे जुयाः जिमि प्रिय दँ,
जिमि तसकं बांलाःम्ह जिनापं वा।”
14 छ पहाडया कापि व तग्वःगु ल्वहंया पाःचाय्
च्वनीम्ह सुकुभत्तु थें च्वँ,
छंगु ख्वाः जितः क्यं,
छंगु सः न्यने दयेमा,
छाय्धाःसा छंगु सः तसकं न्यने यइपुसे च्वं
व छंगु ख्वाः तसकं बांलाः।
15 जिमिगु निंतिं ध्वंचात ज्वनाः हजि,
थुपिं चिचीधिकःपिं ध्वंचात,
गुम्हय्सिनं नकतिनि स्वाँ ह्वःगु दाखक्यबय् ब्वाँय् जुइ
अले दाखक्यबयात नाश याइ।
ल्यासेम्ह मिसा
16 जिमि यःम्ह प्रिय जिम्ह हे खः, जि वय्कःयाम्ह खः।
व लिली स्वांया दथुइ चाचाःहिला जुइ।
17 तुयुजः वया सुथ मजुतले
अले किचः तनामवंनिबलय्,
लिहां वा, हे जिमि यःम्ह प्रिय,
पर्वतया पाःचाय् च्वनीपिं चल्लाचा व मृग थें जुयाब्यु।