5
ल्याय्मम्ह मिजं
1 हे जिमि तसकं यःम्ह मय्जु, जिमि भम्चा,
जि जिगु बगैँचाय् वयागु दु,
जिं जिगु नस्वाःगु मसलानापं मूर्र मुनागु दु।
जिं जिगु हाप्वः व कस्ति नयागु दु।
जिं जिगु दाखमद्य व दुरु त्वना।
ल्यासेपिं मिसात
नयेगु या, हे जिमि पासा, त्वँ,
अले मतिनां मजाःतले त्वँ, जिमि प्रिय।
प्यंगूगु म्ये
५:२–६:३
ल्यासेमम्ह मिसा
2 जि द्यना, अय्नं जिगु नुगः न्ह्यलं हे चा,
स्वःसा, जिमि यःम्ह प्रियनं लुखाय् घारघार यानाच्वंगु दु।
ल्याय्मम्ह मिजं
“हे जिमि तसकं यःम्ह मय्जु, जिमि प्रिय, लुखा चाय्काब्यु,
जिमि छुं नं दोष मदुम्ह सुकुभत्तु।
सुति लखं जिगु छ्यं प्याःगु दु,
जिगु सँ चान्हय्सियागु ख्वाउँगुलिं प्याःगु दु।”
ल्यासेम्ह मिसा
3 जिं थःगु लं त्वयेधुन,
छु जिं व हाकनं फियेगु ला?
जिं थःगु तुति सिलाछ्वये धुनागु दु,
छु उकियात हाकनं फोहर यायेगु ला?
4 जिमि यःम्ह प्रियनं लुखाया चुकू चाय्केत वंबलय्
जिगु मन तसकं भाराभारा मिन।
5 अले जिमि यःम्ह प्रियया निंतिं लुखा चाय्केत जि दनाः,
अले जिगु ल्हातं मूर्र ज्वयाः वयाच्वंगु खः
अले जिं चुकुया चु ज्वनेवं मूर्र कुतुं वन।
6 जि यःम्ह प्रियया निंतिं लुखा चाय्का बियाः
तर जिमि यःम्ह प्रिय ला वने धुंकूगु जुयाच्वन!
वं जितः त्वताःवंबलय् जि निराश जुया!
जिं वयात मातुमाला तर लुइके मफुत,
जिं वयात सःता
अय्नं छुं हे लिसः मवः।
7 शहरय् पिवाः च्वनीपिं सिपाइँतय्सं
जितः नापलात, इमिसं जितः दाल
अले घाःया घाः यानाबिल।
शहरया पखलय् पिवाः च्वनीपिन्सं जिगु गाचा लाकायंकल।
8 हे यरूशलेमया मिसापिं,
जिं छिमित छगू आज्ञा बी,
छं जिमि यःम्ह प्रिययात नापलात धाःसा छु धायेगु?
वयात थथे धयाब्यु, जि वयागु मायाय् दुबय् जुयाच्वनागु दु।
पासापिं
9 हे मिसात मध्ये तसकं हिसि दुम्ह,
छन्त तसकं यःम्ह गुकथं मेपिं स्वयाः बांला?
छिमि प्रेमी गय् यानाः मेपिं प्रेमीत स्वयाः बांलाः?
छाय् छं जिमित थज्याःगु आज्ञा बियागु?
ल्यासेम्ह मिसा
10 झिद्वःम्ह स्वयाः नं जिमि यःम्ह प्रिय बांलाः अले बल्लाः,
जिमि यःम्ह प्रिय तसकं ज्वाल्लं थीम्ह व न्यता ह्याउँस्य च्वंम्ह खः।
11 वयागु छ्यं मुक्कं लुँयागु खः,
वयागु सँ कुलिकुलि चिंगु
व क्वः थें हाकुस्य च्वं।
12 वयागु मिखा खुसि सिथय् च्वनीम्ह सुकुभत्तुया थें च्वं।
दुरुं सिलातःगु व तसकं थिकेगु रत्नया जलप तयातःगु थें च्वं।
13 वयागु न्यताः तसकं नस्वाःगु मसलां व वासलं जाःगु क्यब थें च्वं।
वयागु म्हुतुसि मूर्रया रस वयाच्वनीगु लिली स्वां थें च्वं।
14 वयागु ल्हाः पुखराजया जलप तयातःगु लुँयागु कथि थें च्वं।
वयागु प्वाः नीलमं समाः यानातःगु व तसकं थीकाः तःगु किसिया दं थें च्वं।
15 वयागु तुति फ्वः मुक्कं लुँया जग तयातःगु सिङ्गमरमया थांत थें च्वं।
व लेबनान थें बांलू, अले स्वसिमाया सिमा थें तसकं बांलाः।
16 वयागु म्हुतु तसकं साःगुलिं जाः,
व तसकं बांलाःम्ह खः।
व जिमि यःम्ह प्रिय खः, जिमि पासा नं खः,
हे यरूशलेमया मिसापिं, जिमि प्रिय थथे हे खः।