2
स्वंगूगु दर्शन - दाना स्वयेगु खिपः
1 हाकनं जिं थस्वया, अले जिं ल्हातय् दाना स्वयेगु खिपः छपु ज्वनातःम्ह छम्ह मनू खना।
2 अले जिं न्यना, “छि गन झायादी त्यनागु?”
वं जितः लिसः बिल, “यरूशलेमया ब्या व हाकः गुलि दु धकाः दानास्वयेत वनेत्यनागु।”
3 अबलय् जिलिसें खँ ल्हाना च्वंम्ह स्वर्गदूत वन, अले मेम्ह स्वर्गदूत वयात नापलायेत वल।
4 वं धाल, “ब्वाँय् वनाः उम्ह ल्याय्म्हम्ह मनूयात धा, ‘मनूतय्गु व पशुतय्गु ल्याः यक्व अप्वः जूगुलिं यरूशलेम पःखाः मदुगु शहर जुइ।
5 जि थः हे शहरया प्यखेरं मिया पःखाः जुइ। जि हे उकी दुनेया महिमा जुइ,’ ” धकाः परमप्रभुं धयादी।
ज्वनायंकूपिन्त सःतूगु
6 “वा, वा, उत्तरयागु देशं बिस्युं वा! छाय्धाःसा जिं छिमित आकाशया प्यंगू फय् थें छ्यालब्याल यानाबियागु दु,” परमप्रभुं धयादी।
7 “वा, छिपिं बेबिलोन शहरय् च्वनीपिं सियोनया मनूत, अनं बिस्युं वा!”
8 छाय्धाःसा दक्व शक्ति दुम्ह परमप्रभुं छिमित लुतय् याइपिं जातजातितय्थाय् महिमाया ज्याय् जितः छ्वयादिल। वय्कलं थथे धयादी, “सुनां जि मनूतय्त थीवं जिगु मिखाया नानिचायात थी।
9 जिं धात्थें हे थःगु ल्हाः इमिगु विरोधय् ल्ह्वने अले इमि दासतय्सं इमित हे लुतय् याइ।”
थुकिं यानाः दक्व शक्ति दुम्ह परमप्रभुं हे जितः छ्वयाहयादीगु खः धकाः छिमिसं सी।
10 “अय् म्ह्याय् सियोन, तसलं म्ये हालाः न्ह्यइपुकि! छाय्धाःसा जि वयाच्वनागु दु, अले जि छिमिगु दथुइ च्वने” धकाः परमप्रभुं धयादी।
11 “उखुन्हु यक्व जातित परमप्रभुलिसे मिलय् जुइ अले जिम्ह मनूत जुइ। जि छिमिगु हे दथुइ च्वने। थुकिं यानाः छिमिसं दक्व शक्ति दुम्ह परमप्रभुं हे जितः छिमिथाय् छ्वयाहयादीगु खः धकाः सी।
12 परमप्रभुं पवित्र देशय् यहूदायात थःगु हे भाग दय्कादी अले हाकनं यरूशलेमयात ल्ययादी।
13 हे सकल मनूत, परमप्रभुया न्ह्यःने सुम्क च्वँ। छाय्धाःसा वय्कः थः च्वनीगु पवित्र थासं पिहां झाःगु दु।”