4
न्यागूगु दर्शन - लुँयागु त्वाःदेवा व निमा जैतूनया सिमा
1 जिलिसें खँ ल्हाःम्ह स्वर्गदूतं हाकनं जितः द्यनाच्वंम्ह मनूयात थें थन।
2 वं जितः न्यन, “छं छु खना?”
जिं लिसः बिया, “जिं छगू सेल्लाःगु लुँयागु त्वाःदेवा खना। उकिया च्वकाय् चिकं तइगु छगू तग्वःगु ख्वला दु। व ख्वलाया क्वय् चाकःछिं न्हय्गः पाल्चात दु। पाल्चातय् च्वय् मतया निंतिं न्हय्पु चिकं वइगु नली तयातःगु दु।
3 उकिया लिक्क जैतूनया निमा सिमा, छमा सिमा जवपाखे, मेगु सिमा खवपाखे दु।”
4 अले जिलिसें खँ ल्हाःम्ह स्वर्गदूतयात जिं न्यना, “हे जिमि प्रभु, थुपिं छु खः?”
5 वं लिसः बिल, “थुपिं छु खः धयागु खँ छं मस्यू ला?”
जिं धया, “मस्यू, जिमि प्रभु।”
यरुबाबेलयात हपाः बियादीगु
6 उकिं वं जितः धाल, “थ्व यरूबाबेलया निंतिं परमप्रभुया वचन खः, ‘शक्तिं मखु, बलं नं मखु, तर जिगु आत्मापाखें’ धकाः दक्व शक्ति दुम्ह परमप्रभुं धयादी।
7 “हे तःधंगु पर्वत, छ छु खः? यरूबाबेलया न्ह्यःने छ मैदान जुइतिनि। वं देगःया च्वय् फुसय् तइगु ल्वहंयात लिकयाः उकिया थासय् तइ, अले मनूत थथे धकाः ततःसलं हाली, ‘परमेश्वरं आशिष बियादीमा! थुकियात परमेश्वरं आशिष बियादीमा!’ ”
8 हानं परमप्रभुं धयादिल,
9 “यरूबाबेलया ल्हातं थ्व देगःया जग तःगु दु, वं हे थःगु ल्हातं देगः दय्केगु ज्या सिधय्की।”
अले दक्व शक्ति दुम्ह परमप्रभुं हे जितः छन्थाय् छ्वयाहयादीगु खः धकाः छं सी।
10 परमप्रभुं धयादिल, “ज्या भचा भचा जक शुरु जूगुयात हेला याये मते। अय्नं ज्या न्ह्याकेत यरूबाबेलया ल्हातय् दकःमिया खिपः दुगु खनाः इपिं लय्ताइ।”
(उपिं त्वाःदेवाया न्हय्गः पाल्चा पृथ्वीया फुक्कभनं स्वया च्वनीगु परमप्रभुया मिखा खः।)
11 अले जिं स्वर्गदूतयात न्यना, “थ्व त्वाःदेवाया जव व खवपाखे दुगु थुपिं निमा जैतूनया सिमा धाःसा छु खः?”
12 हाकनं जिं वयात न्यना, “लुँ रंगया जैतूनया चिकं वनीगु थुपिं निपु लुँयागु पाइपया लिक्क दुगु निपु कचा छु खः?”
13 वं लिसः बिल, “थुपिं छु खः धकाः छु छं मस्यू ला?”
जिं धया, “मस्यू, जिमि प्रभु।”
14 अले वं जितः धाल, “थुपिं निम्हं दक्व पृथ्वीया प्रभुया सेवा यायेगु निंतिं अभिषेक जूपिं खः।”