Sasuri Paulus
hia dhèu parcaya ètu kota
Kolose
1
Lii mahoꞌo nèti Paulus si
Lii mahoꞌo nèti jaꞌa, Paulus. Ama Lamatua mesa Na ka dhu hagꞌe nare jaꞌa, ho jꞌajꞌi dhèu pajuu-paleha Yesus Kristus. Ètu neꞌe, abhu kahèi aꞌari èdhi Timotius dhu paꞌadhu lii mahoꞌo hia miu.
Jaꞌa suri sasuri ne hia miu, dhèu unu Ama Lamatua ètu kota Kolose, dhu tao madhutu taruu jꞌara mamuri Yesus Kristus.
Jiꞌi manèngi sèna ka Ama èdhi, Ama Lamatua, padꞌelo dꞌara hua iia Na mi miu aaꞌi-aaꞌi mi, ho miu mamuri dènge mera-milu.
Paulus sabajꞌa hia dhèu parcaya ètu Kolose
Lodꞌo-lodꞌo dhu jiꞌi sabajꞌa hia miu, jiꞌi manèngi makasi mi Ama Lamatua dhu jꞌajꞌi Ama nèti Kètu èdhi, Yesus Kristus. Te jiꞌi tadèngi ae le, nèti parcaya miu mi Yesus Kristus, aa nèti sasue dènge dꞌara hua iia miu mi dhèu parcaya aaꞌi-aaꞌi. Miu tao sèmi èèna, lula miu meꞌa mèu madha jꞌara dhu beꞌa dhu tao tèke le hia miu ètu sorga. Jꞌara-jꞌara sèra, miu tadèngi mèdhi le nèti lii holo-nori dhu lèke, nuka Lii Lolo Beꞌa Lamatua, dhu dhèu peka le dènge miu karèi nèti uru ka. Lii Lolo Beꞌa ne, pale-lème le buli mia-mia ètu rai-haha ne, aa abhu hua-hela dhu beꞌa, lula lii ne ubꞌa mamuri dhèu jꞌajꞌi beꞌa. Mamuri miu jꞌajꞌi beꞌa sèmi èèna kahèi, karèi nèti hiu-hiu èèna miu tadèngi Lii Lolo Beꞌa, dènge meꞌa mèu dꞌara hua iia Ama Lamatua.
Miu se abhu le aꞌajꞌa neꞌe nèti Epapras, angalai dꞌara sasabꞌa jiꞌi dhu jiꞌi sue. Te nèngu majꞌèni pakako taruu sasabꞌa Yesus ètu talora aae miu. Na lolo hia jiꞌi ètu neꞌe lula-nèti sasue miu dhu Roh Lamatua pala-bagi hia miu.
Nèti èèna ka, karèi nèti lodꞌo hiu-hiu jiꞌi tadèngi jꞌara mamuri miu, jiꞌi loe boe sabajꞌa hia miu. Jiꞌi manèngi Ama Lamatua, ho miu bisa meꞌa mèu dadꞌèi Na, aa bisa meꞌa madha jꞌara ae-ae, madhutu ngaa dhu Roh Na ajꞌa miu. 10 Dènge jꞌara neꞌe, miu bisa mamuri dhu lèke, dènge mèti kolongara hua iia Ama Lamatua. Aa miu bisa pakarejꞌe dꞌara Lamatua ètu madha jꞌara aaꞌi-aaꞌi ra kahèi. Ladhe miu padꞌelo dꞌara beꞌa mi dhèu, pe Lamatua hia miu hua-hela dhu beꞌa. Dènge sèmi èèna, miu asa tadhe mèu Lamatua.
11-13 Jiꞌi manèngi-mangajꞌi kahèi mi Ama Lamatua, sèna ka Nèngu hia miu koasa Na dhu dedha risi èèna, ho miu bisa tago jꞌara aaꞌi-aaꞌi ra dènge taha dꞌara. Jiꞌi manèngi ho dꞌara miu dènge karejꞌe-karae, sèna ka miu manèngi makasi taruu mi Ama Lamatua. Te Na bhoke le jꞌara, sèna ka miu sèmi mere pusaka pala miu ètu sorga. Pusaka èèna ka dhu Na pala-bagi mi dhèu aaꞌi-aaꞌi ra dhu parcaya Yesus Kristus. Te Na patabuli eele le èdhi nèti koasa maroga, hèia Na pamaso èdhi jꞌajꞌi dhèu unu Yesus Kristus sèna ka pea ètu dꞌara saraa. Ama Lamatua ka dhu dedꞌe Yesus Kristus jꞌajꞌi Dhèu Aae èdhi. Yesus ne, Ana Pasue Ama Lamatua. 14 Te Ama Lamatua hia Ana Na, sèna ka sui nare èdhi, dènge saku eele sasala-sasigo èdhi.
Kristus ne, dedha risi aaꞌi
15 Kristus ne, ca ropa dènge Ama Lamatua,
dhu dhèu rai-haha bisa boe ladhe rèdhi.
Nèngu dhu mema le, uru nèti aaꞌi-aaꞌi,
aa Nèngu jꞌajꞌi Kètu nèti aaꞌi-aaꞌi dhu Ama Lamatua pajꞌajꞌi.
16 Te Ama Lamatua pake Ne,
ho pajꞌajꞌi aaꞌi isi nèti dedha-liru dènge rai-haha.
Na pajꞌajꞌi jꞌara-jꞌara dhu dhèu rai-haha bisa ladhe rèdhi,
dènge dhu bisa boe ladhe rèdhi.
Nuka, rèngu dhu rèdꞌu paredha, rèngu dhu rèdꞌu koasa,
dhèu aae-dhèu aae, dènge dhèu kapai-dhèu kapai sèra.
Aaꞌi-aaꞌi dhu Ama Lamatua neo tao sèra,
Na tao hia mi Yesus Kristus,
aa Yesus dhu sabꞌa sèra aaꞌi-aaꞌi kahèi.
17 Lodꞌo aaꞌi-aaꞌi se dhae jꞌajꞌi mèka,
te Nèngu ka dhu mema-mema le.
Aaꞌi-aaꞌi se paꞌèki dènge Ne.
Aa Nèngu ka dhu uri si.
18 Nèngu ka dhu jꞌajꞌi Kètu mi dhèu parcaya aaꞌi-aaꞌi.
Aa dhèu parcaya sèra, nuka sèmi ngiꞌu Na.
Te Nèngu ka dhu pakako aaꞌi-aaꞌi si.
Nèti aaꞌi-aaꞌi dhu madhe, hèia mamuri hari,
Nèngu ka dhu kapai risi,
ho sèna ka Nèngu ka dhu dedha risi aaꞌi mèu-mèu.
19 Aaꞌi-aaꞌi dhu ètu dꞌara Ama Lamatua,
abhu kahèi ètu dꞌara Kristus,
aa èèna ka dhu pakarejꞌe dꞌara Lamatua.
20 Ama Lamatua pake Yesus Kristus,
ho padame dènge aaꞌi-aaꞌi dhu Na pajꞌajꞌi le.
Na hia Ana Na,
ho jꞌajꞌi korban dhu pasuti raa Na,
aa madhe ètu ajꞌu palolo-palèbha,
sèna ka aaꞌi-aaꞌi ètu dedha-liru,
aa aaꞌi-aaꞌi ètu rai-haha ne,
bisa padame hari dènge Ama Lamatua.
21 Uru èèna, miu mamuri ètu liꞌu, pakajꞌèu nèti Ama Lamatua. Miu pamusu dènge Ne, ka mamuri pacèri nèti Nèngu, lula dꞌara miu karehe dènge tatao dhu bhelu èèna ka, miu labꞌa taruu Ne. 22 Masi ka sèmi èèna, te ngaa limuri ne Nèngu ka dhu bhoke le jꞌara, ho èdhi bisa padame hari dènge Ne. Te Nèngu ka dhu pua Ana Na, ho jꞌajꞌi dhèu rai-haha. Aa Nèngu ka dhu hia Ana Na èèna jꞌajꞌi mi korban, aa madhe ètu ajꞌu palolo-palèbha, sèna ka èdhi bisa padame hari dènge Ne. Yesus Kristus tao jꞌara neꞌe, ho bisa lere nèti èdhi lati titu ètu katanga madha Ama Lamatua, sèna ka jꞌajꞌi dhèu mola-mèci dènge dꞌara mola, dhu dènge heka sasala ngaa-ngaa. 23 Sadꞌi miu taha taruu dènge lalèka miu. Kèpe paꞌèra-èra, sèna ka baku kalau! Baku pakajꞌèu nèti Lii Lolo Beꞌa èèna, dhu miu sèmi mere ropa miu nanene hiu-hiu Lii èèna. Te Lii Lolo Beꞌa èèna jꞌajꞌi mi era sarai miu. Dhèu lasi palolo lème le Lii Lolo Beꞌa èèna ètu mia-mia ètu rai-haha ne. Aa Lamatua ka pua jaꞌa, Paulus, sèna ka laku lole Lii Lolo Beꞌa ne kahèi.
Paulus sabꞌa sèna ka ladhe-leru dhèu unu Lamatua
24 Lodꞌo Kristus mamuri ètu rai-haha ne, Na dui jꞌajꞌèra ae dꞌai seli. Aa limuri ne, jaꞌa pasae rupa-rupa jꞌajꞌèra kahèi. Masi ka sèmi èèna, te ngaa dꞌara jaꞌa karejꞌe taruu. Ladhe abhu dhèu dhu hudꞌi abhu ku jꞌajꞌèra, na, hudꞌi laa jaꞌa dui jꞌajꞌèra èèna sama-sama dènge ra, nuka sèmi Kristus pasae nare jꞌajꞌèra nèti dhèu-dhèu unu Na. Te dhèu unu Na, jꞌajꞌi sama sèmi ngiꞌu Nèngu. 25 Ama Lamatua hia jaꞌa sasabꞌa Na kahèi, ho ladhe-leru dhèu-dhèu unu Na. Nèti èèna ka, jaꞌa ajꞌa Lii Holo-Nori Na, toke lutu-sela hia miu. 26-27 Dhèu tadèngi Lii Holo-Nori Lamatua karèi nèti uru ka. Te ngaa dhae reꞌa mèu mèka naneo nèti Lii Holo-Nori seꞌe dènge beꞌa, te naneo na dhu pahuni era. Te ngaa limuri ne, Lamatua bhoke le naneo ne hia dhèu unu Na. Aa naneo Na èèna, lii dhu kapai titu kèna pala mi suku aaꞌi-aaꞌi ètu rai-haha ne. Lii babeꞌa dhu kapai risi èèna, nuka:
Kristus mamuri ètu dꞌara miu!
Èèna na ka dhu tao miu parcaya taruu, peka na,
bèli-camèdꞌa Nèngu tao jꞌara dhu hua iia risi hia miu ètu sorga.
Neꞌe ne ka dhu èdhi dhèu rai-haha ne mate tae-tae karèi nèti uru-uru jꞌara ka.
28 De jiꞌi peka dènge dhèu aaꞌi-aaꞌi lula-nèti Kristus. Jiꞌi ajꞌa-nori dènge pasanèdꞌe dhèu aaꞌi-aaꞌi ra, pake ngangee lii padhai dhu Ama Lamatua hia mi jiꞌi. Jiꞌi tao jꞌara seꞌe, ho paꞌèra dhèu aaꞌi-aaꞌi dhu madhutu Kristus, sèna ka bèli-camèdꞌa rèngu bisa titu ètu madha Na, dhu dènge boe makae, lula ra mamuri mola taruu. 29 Nèti èèna ka, jaꞌa titu paꞌèra, aa sabꞌa jꞌèra titu kèna hia miu. Jaꞌa bisa taha sabꞌa bia sèmi èèna, lula koasa Kristus ka paꞌèra jaꞌa. Aa koasa Na èèna, kapai titu kèna!
1:7 Kolose 4:12, Pilmon 23 1:14 Epesus 1:7 1:18 Epesus 1:22-23 1:20 Epesus 2:16