2 Petrus
Sasuri Petrus ka dua
1
Lii mahoꞌo
Sasuri ne nèti jaꞌa, Simon Petrus.* Jaꞌa jꞌajꞌi ana pua-paleha Yesus Kristus. Jaꞌa jꞌajꞌi dhèu pajuu-paleha Na kahèi, dhu Na pua laku asa mia-mia ho lole dènge dhèu lula-nèti Nèngu.
Jaꞌa suri sasuri ne hia miu, dhu parcaya le Yesus Kristus. Lula dꞌara mola Ama Lamatua, ka Na bhoke jꞌara ho miu bisa parcaya Kristus kahèi, sama sèmi jiꞌi. Parcaya ne kabꞌua titu kèna hia èdhi aaꞌi-aaꞌi ti. Kristus èèna jꞌajꞌi Ama Lamatua èdhi, aa Nèngu kahèi jꞌajꞌi Dhèu dhu patalale èdhi nèti koasa sasala-sasigo.
Jaꞌa manèngi sèna ka miu tadhe mèu Ama Lamatua, aa tadhe Kètu èdhi, Yesus, dènge beꞌa. Hudꞌi laa sèna ka Rèngu padꞌelo dꞌara hua iia Ra mi miu, ho miu bisa mamuri dènge dame aa mera-milu èci dènge èci.
Lamatua pili nare dhèu unu Na, ka paroa si ho mai asa Nèngu
Yesus dhu dènge koasa èci èèna ka dènge Ama Lamatua. Nèti èèna ka, Yesus papala èdhi aaꞌi-aaꞌi ti ngaa-ngaa dhu èdhi parluu, sèna ka mamuri mola madhutu dadꞌèi Lamatua. Nèngu tao sèmi èèna, lula èdhi tadhe mèu Ne. Aa Na paroa èdhi ho jꞌajꞌi dhèu unu Na, lula dꞌara hua iia dènge dadedha Na. Yesus hia le èdhi jꞌara aaꞌi-aaꞌi dhu hua iia. Te uru èèna, Na padhadha tèke le ho neo hia jꞌara seꞌe. Lii padhadha Na, aaꞌi-aaꞌi beꞌa titu kèna. Yesus hia aaꞌi mèu-mèu seꞌe mi èdhi, sèna ka dꞌara èdhi bisa sama sèmi dꞌara Lamatua. Aa èdhi bisa lehe tare jꞌara-jꞌara karehe dhu dhèu ètu rai-haha ne dꞌèi adꞌu-ue, lula rèngu mamuri dꞌèi dhoka tao madhutu dadꞌèi unu ra, aa dhu taha rare boe dꞌara ra.
Nèti èèna ka, jaꞌa manèngi sèna ka miu paꞌèra tao jꞌara dhu beꞌa.
Mema miu parcaya le Yesus, te ngaa èèna dhae dꞌai mèka.
Sabꞌa taruu jꞌara dhu beꞌa.
Tadhe Lamatua dènge beꞌa risi hari.
Te ngaa mage dꞌai dhoka sange èèna di.
Patema mamuri ho taha mere dꞌara.
Te ngaa sèra dhae dꞌai mèka kahèi.
Lodꞌo-lodꞌo miu abhu sasusa, na, miu hudꞌi paꞌèra dꞌara ho baku hari kabodho.
Te ngaa tao parisi hari nèti èèna.
Tao aaꞌi mèu-mèu madhutu dadꞌèi Lamatua.
Te ngaa mage dhoka dꞌai sange èèna di.
Padꞌelo sasue mi aꞌari èdhi dhèu parcaya sèra.
Te ngaa èèna dhae dꞌai mèka kahèi.
Te miu hudꞌi mamuri pasue taruu.
Ladhe mamuri miu sèmi sèra ka, aa jꞌara dhu beꞌa asa tabha taruu, na, sèra sa hia miu asa tadhe mèu Kètu èdhi, Yesus Kristus. Te jꞌara dhu beꞌa ele boe iia dꞌara, aa core eele boe lodꞌo kahèi. Te jꞌara beꞌa seꞌe ka dhu tao dꞌara miu ho meꞌa mèu Nèngu. Ladhe abhu dhèu dhu dꞌèi boe tao sèmi sèra, sasoa na, ngangee nèngu babꞌa. Nèngu nèdhi boe ngaa ètu madha nèngu, nuka sèmi dhèu bèdhu. Te Lamatua dhu saku eele le sasala na, sèna ka dꞌara nèngu bisa mola-mèci. Te ngaa dhèu ne bhèlu eele!
10 Aꞌari pasue aaꞌi-aaꞌi! Miu limuri ne hudꞌi bori dhari asa paꞌèra. Lamatua hagꞌe nare le miu jꞌajꞌi dhèu unu Na, ka miu lami asa madha Na. De miu hudꞌi padꞌelo ku, na, miu jꞌajꞌi le ana-èpu Na. Ladhe jꞌara dhu jaꞌa peka se tabha taruu ètu mamuri miu, na, miu manahu boe. 11 Dènge jꞌara ne, Ama Lamatua bagi hia miu jꞌara èci dhu kapai titu kèna. Nuka Na bhoke pataleo jꞌara, dènge pangèdꞌu miu hak, ho sèmi mere Yesus Kristus jꞌajꞌi Dhèu Aae miu, sèna ka miu mamuri toke dꞌai mia-mia dènge Ne. Te Yesus Kristus ne, Kètu èdhi. Aa Nèngu kahèi, Dhèu dhu patalale èdhi nèti koasa sasala-sasigo èdhi.
Nga tao ka Petrus pasanèdꞌe sèmi èèna?
12 Miu meꞌa le jꞌara-jꞌara dhu jaꞌa peka deo sa, aa miu taha paꞌèra, lula miu parcaya ngaa dhu lèke. Masi ka sèmi èèna, te ngaa jaꞌa loe boe pasanèdꞌe miu pahari-pahari, sèna ka miu baku bhèlu eele. 13 Jaꞌa koꞌo boe ladhe miu pabhèlu eele jꞌara sèra. Jaꞌa dꞌèi pasanèdꞌe miu taruu, sèna ka miu pajiko taruu jꞌara seꞌe se, ètu dꞌara kahadhu miu. Te lodꞌo jaꞌa mamuri ètu rai-haha ne era, mema sala boe ladhe jaꞌa loe boe pasanèdꞌe jꞌara seꞌe mi miu. 14 Nèbhu heka, jaꞌa madhe, sama sèmi Kètu èdhi, Yesus Kristus peka le dènge jaꞌa. Nèti èèna ka, jaꞌa keꞌa le. 15 Masi ka bèli-camèdꞌa jaꞌa madhe, te ngaa limuri ne, jaꞌa tenge jꞌara ho miu sanèdꞌe taruu jꞌara seꞌe.
Jiꞌi ngèdhi le dadedha Yesus
16 Ca hari na, jaꞌa dènge angalai jaꞌa lole le dènge miu, lula-nèti Kètu èdhi, Yesus Kristus. Jiꞌi peka kahèi, na, bèli-camèdꞌa ladhe Kristus lèpa hari mai, mamai Nèngu èèna dènge koasa dhu kapai titu kèna. Lèke, si? Dhu jiꞌi lolo se, nanuku boe. Lula jiꞌi lole dhoka dhu jiꞌi ladhe ngèdhi dènge musi madha jiꞌi unu mi! Nèti èèna ka, jiꞌi ngeꞌa, na, dadedha Yesus Kristus ne nuka sèmi dhèu aae kapai sa. 17-18 Ca tèka, jiꞌi sama-sama dènge Yesus ètu ledhe mola-mèci Lamatua. Hèia Ama Lamatua mesa Na ka dhu peka lula-nèti dadedha Yesus ne. Te lodꞌo èèna, jiꞌi tadèngi lii dhu beꞌa titu kèna mai nèti dedha-liru, peka na,
“Neꞌe ne, Ana pasue Jaꞌa.
Nèngu ka dhu pakarejꞌe dꞌara Jaꞌa.”
19 Èèna ka dhu tao jiꞌi asa lèka èra lula-nèti jꞌara-jꞌara dhu uru sèra jiꞌi abhu nèti dhèu rèti lii padhai Lamatua. De hua iia risi miu tao madhutu lii moa dhèu seꞌe! Te lii moa rèngu sèra, nuka sèmi labhu èci dhu pasaraa ètu dꞌara maroga. De miu hudꞌi nanene paie-iie ku lii moa se, toke dꞌai Yesus mai hari. Dènge jꞌara neꞌe, miu asa tabha meꞌa mèu. Te èèna na nuka sèmi miu mèdhi uuru ku hua-hètu aae dhimu, hèia lodꞌo heka rea kèna ho pasaraa aaꞌi mèu-mèu.
20 Sanèdꞌe, te dhèu rèti lii padhai Lamatua peka mema le jꞌara ae-ae. Te ngaa jꞌara-jꞌara dhu rèngu peka-padhai se nèti boe dadꞌèi rèngu. 21 Lula ngaa dhu rèngu suri se, mai boe nèti ngaa dhu rèngu neo padhai lii. Te ngaa mai nèti Ama Lamatua, madhutu ngaa dhu Roh Mola-Mèci Na padꞌelo dènge rèngu.
* 1:1 Sasuri lii Yunani cahagꞌe suri, peka na, “Simon Petrus”. Cahagꞌe hari suri, “Simeon Petrus”. Simeon èèna, nèti lii Ibrani. Lii Yunani na, nuka Simon. Ka dhèu dꞌèlu-mèu peka na, Simon Petrus do Simeon Petrus èèna, nuka ngara nèti dhèu èci. 1:17-18 Mateos 17:1-5, Markus 9:2-7, Lukas 9:28-35 1:20 Lii Yunani ètu neꞌe bisa tèlu sasoa. 1) Dhèu dhu nèti lii padhai Lamatua madhutu boe dadꞌèi nèngu mesa na; 2) abhu boe ca dhèu sa dhu reꞌa mèu sasoa nèti lii moa aaꞌi-aaꞌi sèra; 3) ladhe èdhi neo teꞌa sasoa lii moa sèra, hudꞌi èdhi pasoro ku dènge Lii Holo-Nori Lamatua aaꞌi-aaꞌi, lula sasoa na nèti boe dadꞌèi dhèu dhu nèti lii padhai Lamatua èèna.