11
Dhèu rèti lii padhai Ama Lamatua dhèu dua dhu kapai risi
1 Hèia ra jꞌole hia jaꞌa ajꞌu aꞌuku calaa dhu madhera nuka sèmi tatea. Ka Ama Lamatua paredha jaꞌa, peka na, “Yohanis, lamu ho uku Èmu Kapua Manèngi-Mangajꞌi Jaꞌa dènge mei sogo-tagu na ètu kota Yerusalem. Aa ige dhèu-dhèu dhu sabajꞌa ètu dꞌara Èmu èèna.
2 Te ngaa madha Èmu Manèngi-Mangajꞌi èèna, mage mu uku, te era èèna dhu hagꞌe eele le hia suku-suku leo dhu tadhe boe Jaꞌa. Èèna na rèngu mai jꞌajꞌèli leli ho pakajꞌalu kota Jaꞌa ne, dꞌai tèlu tèu dènge cabèka (nuka, 1.260 [ca riho dua ngasu èna nguru] lodꞌo).
3 Pe Jaꞌa pua dhèu Jaꞌa dhèu dua lasi asa era èèna, sèna ka rèti lii padhai Jaꞌa. Dhèu dua se pake mèdha sasusa, aa ra lole lii moa nèti Jaꞌa, toke èle 1.260 (ca riho dua ngasu èna nguru) lodꞌo èèna.”
4 Sakaria, ca dhèu nèti lii padhai Lamatua, dhu suri mema le nèti uru ka, lula-nèti dhèu dua se. Na pakasame sèmi ajꞌu saitun dua kapua, aa era tatèke labhu dua, dhu patitu tangare asa Ama Lamatua, dhu jꞌajꞌi Kètu mi dhèu aaꞌi-aaꞌi ètu rai-haha.
5 Ladhe dhèu neo pajꞌèra dhèu dua dhu rèti lii padhai Lamatua, èèna na ai bhodho nèti dꞌara hèbꞌa ra, ho pakèpu aaꞌi musu ra. Dènge jꞌara sèmi neꞌe, dhèu dhu neo pajꞌèra si, tatu madhe.
6 Lodꞌo dua ra jꞌajꞌi dhèu rèti lii padhai Lamatua ètu rai-haha ne, Lamatua pangèdꞌu ra koasa ho ra bisa taha èjꞌi, koasa sèna ka tao madha èi jꞌajꞌi raa, aa koasa ho adꞌu-ue rupa-rupa mamadhe-mamopo ètu rai-haha, madhutu dadꞌèi ra.
7 Lodꞌo dꞌai èle sasabꞌa-laꞌa ra, èèna na badha bhelu ciꞌu bhodho mai nèti roꞌa jꞌajꞌèra dhu dènge boe too-lane. Badha neꞌe labꞌa rèngu dua ra, toke na segi si, aa na pamadhe dua ra.
8-9 Dènge jꞌara neꞌe, dua ra madhe ètu kota kapai, dhu uru èèna era dhèu paku pamadhe Lamatua rèngu ètu ajꞌu palolo-palèbha. Te kota neꞌe jꞌajꞌi le kota bhelu, sèmi kota Sodom dènge rai Masir uru èèna. Èèna na, dhèu core eele ngiꞌu aae dua ra, toke dꞌai tèlu lodꞌo dènge ca èta. Ka dhèu-dhèu nèti suku aaꞌi-aaꞌi, nèti udhu-rasa aaꞌi-aaꞌi, aa dènge nèti kabarai aaꞌi-aaꞌi ra, mai lingu. Dhèu se roꞌo boe hia ijin ho padhane si,
10 lula ra karejꞌe laladhe ngiꞌu aae dhèu dua se, dhu mai lalai ngangee dhèu ae ètu rai-haha ne. Ka dhèu se aaꞌi-aaꞌi ra tao pesta, aa ra paꞌadhu hadia èci dènge èci.
11 Te ngaa ropa èle tèlu lodꞌo dènge ca èta, hèia Ama Lamatua hia si aꞌae, ka dua ra mamuri hari. Hèia dhèu-dhèu dhu ladhe rèdhi si, madhaꞌu toke isi ra rèbha-rèbha.
12 Ka dhèu dua se tadèngi lii dhu mèdhu èci nèti dedha-liru pua ra, peka na, “Dua mi caꞌe ka asa neꞌe mai!” Hèia dua ra caꞌe asa dedha-liru lasi dènge raꞌi-liru dhu sarimu nare si. Ropa rèdhi sèmi èèna, ka musu ra malaa koꞌa-koꞌa sène.
13 Kacaꞌa laa, rai opo dhu kapai titu kèna. Ladhe ige èmu aaꞌi-aaꞌi ètu dꞌara kota, nèti canguru èmu, dhu guri, cue. Aa dhèu dhu madhe, pidhu riho dhèu. Dhu madhe boe, ra madhaꞌu bia. Te ngaa rèngu èèna na pakabꞌua kahèi kolongara Ama Lamatua, lula Nèngu ka dhu nèdꞌu paredha ètu sorga.
14 Dènge sèmi neꞌe, jꞌajꞌèra ka dua seli le. Te ngaa baku pamudꞌe! Te calaka ka tèlu oe mai kèna.
Tiu tèbhe ka pidhu — Ama Lamatua dènge Yesus Kristus rèdꞌu paredha ètu rai-haha
15 Hèia ana pajuu Lamatua ka pidhu tiu tèbhe na. Kacaꞌa laa, jaꞌa tadèngi lii ae-ae nèti sorga, dhu peka na,
“Limuri ne, dhu rèdꞌu paredha ètu rai-haha,
dhodhoka Ama Lamatua dènge Kristus,
nuka Dhèu dhu Lamatua hagꞌe nare karèi nèti uru ka mai.
Èèna na Lamatua nèdꞌu paredha taa-taa, sama sèmi Dhèu Aae.”
16 Ka 24 (dua nguru èpa) katua dhu madhèdi ètu dedha kadera paredha ètu madha Ama Lamatua, tadèngi lii èèna kahèi. Hèia ra patitu kètu urutuu, toke rèhu ra dꞌai rai, ka ra koa-kio Ama Lamatua,
17 aa sodꞌa, peka na,
“Oo Ama Lamatua!
Kètu jiꞌi!
Ama Lamatua jiꞌi!
Lamatua ka dhu paredha aaꞌi-aaꞌi.
Lamatua ka dhu koasa nare aaꞌi.
Lamatua ka dhu karèi nèti uru ka mai.
Lamatua ka dhu deo neꞌe ne.
Jiꞌi manèngi makasi mi Lamatua,
Lula Ama pake le koasa Mu dhu kapai risi,
sèna ka mèdꞌu paredha ètu rai-haha.
18 Te ngaa dhèu nèti suku-suku nasa titu kèna,
lula rèngu roꞌo boe madhutu Lamatua.
Te ngaa limuri ne, Lamatua nasa kahèi,
lula rèngu roꞌo boe tadhe Ne.
Limuri ne, dꞌai le lodꞌo na,
sèna ka Lamatua huku dhèu dhu pusi-pahae boe Ne.
Limuri ne, dꞌai le lodꞌo na,
ho Lamatua palaho dhèu dhu palaho dhèu leo.
Limuri ne, dꞌai le lodꞌo na,
ho Lamatua parisa lii langu dhèu madhe.
Limuri ne, dꞌai le lodꞌo na,
ho Lamatua bꞌae-bajꞌa èi kabhèsu dhèu sabꞌa Na.
Nuka: dhèu rèti lii padhai Lamatua,
dènge dhèu unu Lamatua,
Ana iiki-dhèu kapai, dhèu ngèru-dhèu heka.
Lamatua bꞌae rui-jꞌajꞌèra mi dhèu aaꞌi-aaꞌi ra,
dhu pakabꞌua kolongara Na.”
19 Èle èèna ka, jaꞌa ladhe kèdhi babèdho Èmu Manèngi-Mangajꞌi Lamatua ètu sorga, dhu conge tèke. Ka jaꞌa kèdhi boaraka dhu uru èèna era tèke lii paredha Ama Lamatua dhu suri ètu lei hadhu. Hèia bela kacèbꞌa lolo aae nèti haa, nèti dhimu, dꞌoro lii pagodꞌo-godꞌo, rai-haha ne karedha, dènge èjꞌi es hadhu dhu bia, kabhui mai nèti dedha-liru.