15
Ana pajuu dhèu pidhu nèti sorga rèti pidhu calaka kapai asa rai-haha
1 Hèia jaꞌa ladhe kèdhi tadha èci ètu dedha-liru, dhu kapai titu kèna, toke jaꞌa malaa bia. Abhu ana pajuu dhèu pidhu nèti sorga, èci-èci ka dènge koasa ra, ho hia calaka kapai asa rai-haha. Pidhu calaka se, nuka jꞌajꞌèra dhu limuri tèka. Ladhe jꞌara se aaꞌi-aaꞌi ra jꞌajꞌi ka, dꞌara Ama Lamatua pacuhi, ka nasa heka dènge dhèu rai-haha.
2 Ka jaꞌa kèdhi dhasi dhu haꞌa-haꞌa, nuka sèmi tèru dhu pabꞌali dènge ai. Jaꞌa kèdhi kahèi dhèu ae dhu titu ètu sebhe dhasi èèna. Dhèu seꞌe ka dhu madhutu boe badha bhelu èèna, aa ra sogo-tagu boe mèdha sogo-tagu na, aa dhu sèmi boe cap na hèi. Rèngu aaꞌi-aaꞌi dhu kèpe dènge mèdha lii sodꞌa èci nuka sèmi sasadhu, dhu ra abhu nèti Ama Lamatua.
3 Ka ra sodꞌa lii sodꞌa èci dhu Musa suri. Musa ne, ana pua-paleha Ama Lamatua uru-uru sèra. Dhèu seꞌe se sodꞌa kahèi lii sodꞌa èci dhu koa-kio Yesus. Te uru èèna, dhèu pamadhe Ne, sama sèmi dhèu roro pamadhe ana kalèbho ètu dꞌara Èmu Kapua Manèngi-Mangajꞌi Ama Lamatua, sèna ka pamaringi dꞌara Na. Dhèu se sodꞌa, peka na,
“Jiꞌi koa-kio Ama Lamatua!
Jiꞌi jꞌoka padedha-dedha kolongara Na!
Lula koasa Lamatua kapai risi eele.
Dènge aꞌèra Na kapai titu kèna.
Lamatua ka dhu nèdꞌu le paredha mi suku aaꞌi-aaꞌi ètu rai-haha.
Lamatua ka dhu jꞌajꞌi Dhèu Aae mi udhu-rasa aaꞌi-aaꞌi ètu rai-haha.
Tatao Lamatua mola sèmi isi pupu.
Sasabꞌa Lamatua beꞌa seli eele!
Jꞌara Lamatua mèu rèdꞌe-rèdꞌe.
Mamuri Lamatua lèke mola-mola!
4 Dhèu aaꞌi-aaꞌi ra jꞌoka padedha-dedha kolongara Lamatua,
Dhèu aaꞌi-aaꞌi ra koa-kio babeꞌa Lamatua.
Lula Lamatua mesa Na dhu mola-mèci.
Aa Lamatua mesa Na di, dènge boe sasala.
Pe suku aaꞌi-aaꞌi mai pahaha iisi mi Lamatua.
Pe udhu-rasa aaꞌi-aaꞌi mai manèngi makasi mi Lamatua.
Lula dhèu aaꞌi-aaꞌi reꞌa rèdhi le tatao Lamatua dhu beꞌa.
Aa dhèu aaꞌi-aaꞌi reꞌa le mamola dꞌara Lamatua.”
5 Ropa dhèu se èle sodꞌa, jaꞌa kèdhi Kama Luri Mola-Mèci ètu dꞌara Èmu Manèngi-Mangajꞌi Lamatua ètu sorga, dènge bhèla bhabhiri dhu bhoke pataleo tèke.
6 Ka jaꞌa kèdhi ana pajuu dhèu pidhu nèti sorga dhu rèti dènge pidhu calaka sèra. Rèngu kalua mai nèti Èmu Manèngi-Mangajꞌi Ama Lamatua. Rèngu pake mèdha-papake dhu kaleꞌe pudhi mèu, aa pake salalu dhu tao nèti poe dènge pai.
7 Hèia jaꞌa ladhe kèdhi badha aae èci nèti èpa ngiꞌu sèra ètu sebhe kadera paredha Lamatua, dhu papala pidhu bokor hualaa mi ana pajuu dhèu pidhu sèra. Pidhu bokor se, èci-èci ka dhu isi ra hahuku nèti Ama Lamatua dhu taa-taa toke dꞌai mia-mia. Te Na paꞌèra le, ho sabhori nanasa Na asa rai-haha.
8 Nèbhu boe, hèia Èmu Manèngi-Mangajꞌi ne pènu dènge sèbꞌu dhu bodho mai nèti dadedha dènge koasa Ama Lamatua. Abhu boe ca dhèu sa dhu bisa maso asa era èèna. Ana pajuu dhèu pidhu se hudꞌi sabhori paꞌèle ku pidhu calaka asa rai-haha ne, heka dhèu bisa maso asa era èèna kèna.