19
Dhèu ae-ae sodꞌa ètu sorga
Ropa ana pajuu ne padhai lii nare, ka jaꞌa tadèngi lii dhèu ae-ae sodꞌa ètu sorga. Ra sodꞌa, peka na,
“Haleluya! Haleluya!
Èdhi koa-kio Ama Lamatua èdhi,
lula Nèngu ka dhu dedha risi eele.
Haleluya! Haleluya!
Èdhi koa-kio Ama Lamatua èdhi,
lula Nèngu ka dhu koasa kapai risi.
Lamatua ka dhu patabuli èdhi,
nèti koasa sasala-sasigo èdhi.
Lamatua ka dhu pamèci èdhi,
nèti sasala-sasala èdhi.
Èdhi koa-kio Ama Lamatua,
lula Nèngu ka dhu pamaꞌète lii langu dènge mola.
Èdhi koa-kio Ama Lamatua,
lula Nèngu ka dhu hia hahuku dhu lèke.
Lamatua dhu huku le bhèni kajeo èèna,
lula nèngu ka dhu dadugu dhèu ètu rai-haha,
sèna ka madhutu tao jꞌara makae sama-sama dènge ne,
aa madhutu bhabhelu na.
Lamatua bꞌala le bhèni aapa èèna,
lula nèngu loe boe pamadhe
ana pua-paleha Lamatua.”
Èle èèna ka, ra sodꞌa lii sodꞌa leo hari ètu sorga, peka na,
“Haleluya! Koa-kio Lamatua!
Haleluya! Jꞌoka padedha-dedha kolongara Na!
Lula sèbꞌu ai dhu tunu pakèpu ngiꞌu aae bhèni èèna,
caꞌe taruu dhu loe boe ciki sa.
Aa sèbꞌu nèti ai dhu tunu eele kota kapai èèna,
caꞌe taruu dhu loe boe ciki sa.”
Hèia dua nguru èpa katua, dènge badha aae èpa ngiꞌu sèra, patitu kètu urutuu, ho pahaha iisi mi Ama Lamatua dhu madhèdi ètu dedha kadera paredha Na. Ra pakabꞌua Ne, peka na,
“Tareꞌa sèmi èèna! Mai ti koa-kio kolongara Ama Lamatua!
Haleluya! Mai ti jꞌoka padedha-dedha kolongara Na!”
Pesta kabꞌi Ana Kalèbho
Hèia jaꞌa tadèngi hari lii èci dhu mai nèti kadera paredha èèna, peka na,
“He, miu aaꞌi-aaꞌi mi dhu jꞌajꞌi le ana pua-paleha Ama Lamatua!
He, miu aaꞌi-aaꞌi mi dhu jꞌajꞌi le ana-ana Ama Lamatua!
Mai sèna ka ti jꞌoka padedha-dedha kolongara Ama Lamatua.
Mai aaꞌi-aaꞌi, ana iiki-dhèu kapai, koa-kio Ne.”
Hèia jaꞌa tadèngi oe sèmi dhèu ae-ae dhu padhai lii. Lii ra mèdhu nuka sèmi lii èi dhu hae nèti kolo ledhe, aa dou sèmi lii dꞌoro, ra peka na,
“Haleluya! Jiꞌi koa-kio Ama Lamatua.
Haleluya! Jiꞌi jꞌoka padedha-dedha kolongara Na.
Lula Nèngu ka dhu koasa kapai risi.
Aa Nèngu ka dhu paredha aaꞌi-aaꞌi.
Limuri ne, dꞌara èdhi karejꞌe le.
Limuri ne, dꞌara èdhi kea rae-rae.
Èdhi koa-kio Ne.
Lula dꞌai le lodꞌo kabꞌi Ana Kalèbho kèna.
Èdhi jꞌoka padedha-dedha kolongara Na,
lula bhèni dhu neo jꞌajꞌi dhèu èmu Ana Kalèbho, dhu paꞌèra le.
Ama Lamatua hia ne kodho kabꞌi na nèti bèla alus.
Ama Lamatua pangèdꞌu na mèdha-papake dhu pudhi kaleꞌe.”
(Mèdha-papake dhu pudhi kaleꞌe èèna, sasoa na, tatao dhu beꞌa nèti dhèu unu Ama Lamatua.)
Ka ana pajuu nèti sorga èèna, peka dènge jaꞌa, na, “Yohanis! Èu hudꞌi suri more ku, sèmi neꞌe:
‘Dhèu aaꞌi-aaꞌi dhu abhu nèru ho mai asa pesta kabꞌi Ana Kalèbho ne, rèngu oto tareꞌa-reꞌa!’ ”
Hèia na peka hari dènge jaꞌa, “Lii Holo-Nori Ama Lamatua ne, lèke tareꞌa-reꞌa!”
10 Ka jaꞌa patitu kètu urutuu ho neo pahaha iisi mi ana pajuu ne. Te ngaa na kai, peka na, “Èu baku tao sèmi neꞌe! Te jaꞌa ne ènu Ama Lamatua, èci èèna dènge èu ne, aa sama sèmi aꞌari èu dhu lasi peka-padhai lii ajꞌa-nori Yesus. Te dhèu rèti lii padhai Ama Lamatua peka-padhai lula-nèti Yesus kahèi, sèna ka dhèu pahaha iisi mi Nèngu. Te naneo Roh Ama Lamatua sèmi èèna. De baku pahaha iisi mi jaꞌa ne. Te ngaa pahaha iisi dhoka mi Ama Lamatua di.”
Lamatua Yesus mai manyaꞌe jara pudhi
11 Hèia jaꞌa doa kètu, ka ladhe kèdhi babèdho sorga dhu bhoke tèke. Cagꞌagꞌa laa, jaꞌa kèdhi jara pudhi ciꞌu kalua mai. Dhèu dhu manyaꞌe na, ngara na “Dhèu dhu kèpe paꞌèra lii pajaji” aa “Dhèu dhu Mola.” Lodꞌo Na parisa lii langu, Na pamaꞌète dènge mola. Ladhe Nèngu laꞌe pamusu, laꞌe dènge dꞌara mola. 12 Musi madha Na heo sama sèmi ai. Na pake solo dhèu aae dhu ae, ètu kètu Na. Ngara Na dhu suri ètu ngiꞌu Na, te ngaa Nèngu mesa Na di, dhu neꞌa sasoa ngara èèna. 13 Mèdha-papake Na, dhu cèbꞌu le asa dꞌara raa. Dhèu paroa Ne, “Lii Holo-Nori Ama Lamatua”. 14 Jaꞌa kèdhi kahèi sordadꞌu-sordadꞌu nèti sorga dhu manyaꞌe jara pudhi, dhu madhutu Ne. Sordadꞌu se pake mèdha alus dhu pudhi mèu kahèi. 15 Abhu samala èci dhu madèka, kalua nèti dꞌara hèbꞌa Na. Na pake samala ne, ho laꞌe pamusu, labꞌa suku aaꞌi-aaꞌi ètu rai-haha. Hèia Na segi si. Ka Na jꞌajꞌi Dhèu Aae rèngu. Na paredha si dènge ai bèsi, toke rèngu reꞌa nanasa Lamatua dhu koasa kapai risi. Jꞌara neꞌe ne, sama sèmi dhèu jꞌèli marèu hua anggor, ho pacèli rare èi na.
16 Aa ètu kodho dènge ètu haree Na, dhu suri sèmi neꞌe:
Dhèu Aae nèti dhèu aae aaꞌi-aaꞌi ra,
Lamatua nèti lamatua aaꞌi-aaꞌi ra.
Lamatua Yesus segi badha bhelu dènge sordadꞌu na sèra
17 Ka jaꞌa ladhe kèdhi ana pajuu ca dhèu nèti sorga dhu titu ètu dedha madha lodꞌo. Hèia na rodhe manu-bhui aaꞌi-aaꞌi dhu lela re talora liru, peka na, “Mai aaꞌi-aaꞌi mi pakaboko mi era neꞌe, ho miꞌa pesta kapai dhu Ama Lamatua tao! 18 Sisi dhèu madhe aaꞌi-aaꞌi ra, miu bisa miꞌa. Nuka sisi nèti: dhèu aae-dhèu aae, komedhaa, dènge sordadꞌu sèra. Miu miꞌa kahèi sisi jara dènge sisi sordadꞌu dhu manyaꞌe si. Miu miꞌa kahèi sisi ènu-ènu, do dhèu mardeka, do ana iiki-dhèu kapai. Peka ka laa, ngara na ngaa dhu dènge sisi, miꞌe si.”
19 Hèia jaꞌa kèdhi badha bhelu dhu uru èèna bodho nèti dꞌara dhasi. Laꞌe paneꞌa lii dènge dhèu aae aaꞌi-aaꞌi ètu rai-haha, dènge sordadꞌu ra. Ka lasi pamusu, labꞌa Dhèu dhu manyaꞌe jara pudhi èèna, dènge sordadꞌu dhu palere-lere dènge Ne nèti sorga. 20 Te ngaa Dhèu manyaꞌe jara pudhi ne, kèpe nare badha bhelu dènge dhèu nèti lii padhai na dhu kapodꞌe-kabèli sèra. Dhèu dhu nèti padhai lii na, nuka dhèu dhu tao tadha malaa rupa-rupa ho leko-monya dhèu, dhu ra sèmi rare cap nèti badha bhelu ne, aa sogo-tagu mèdha sogo-tagu na. Te ngaa limuri ne, Dhèu dhu manyaꞌe jara pudhi ne, pèci eele le badha bhelu dènge dhèu dhu nèti lii padhai na, asa dꞌara dhasi ai èi nasu dhu heo na madhe boe. 21 Èle èèna ka, Dhèu dhu manyaꞌe jara pudhi ne, laꞌe pamadhe aaꞌi sordadꞌu dhu leo sèra, pake dènge samala dhu kalua nèti dꞌara hèbꞌa Na. Hèia manu-bhui dhu raꞌa sisi hèu, mai raꞌe aaꞌi ngiꞌu aae dhèu madhe sèra.
19:2 Lole Hari Jꞌara-jꞌara Mamuri 32:43, 2 Dhèu Aae sèra 9:7 19:3 Yesaya 34:10 19:5 Lii Sodꞌa Koa-Kio 115:13 19:6 Yeskial 1:24, Lii Sodꞌa Koa-Kio 93:1, 97:1, 99:1 19:9 Mateos 22:2-3 19:11 Yeskial 1:1, Lii Sodꞌa Koa-Kio 96:13, Yesaya 11:4 19:12 Daniel 10:6 19:15 Lii Sodꞌa Koa-Kio 2:9, Yesaya 63:3, Yoel 3:13, Rai-haha Rupa Hiu 14:20 19:18 Yeskial 39:17-20 19:20 Rai-haha Rupa Hiu 13:1-18