4
Rèngu pahaha iisi mi Ama Lamatua ètu sorga
1 Ropa Dhèu Rai-haha Tareꞌa-reꞌa ne, peka nare lii moa Na mi pidhu jumaꞌat sèra, hèia Lamatua bhoke padꞌelo dènge jaꞌa, ngaa-ngaa dhu leo hari. Ètu dꞌara ciki ooꞌe èèna kahèi, jaꞌa kèdhi babèdho èci dhu bhoke le tangare laꞌe asa sorga. Ka jaꞌa tadèngi hari lii dhu mèdhu nèti dhèu deo na, nuka sèmi lii tiu tèbhe, peka na, “Mai ku! Caꞌe asa neꞌe, sèna ka Jaꞌa padꞌelo dènge èu ngaa-ngaa dhu jꞌajꞌi bèli-camèdꞌa.”
2 Lodꞌo èèna kahèi, Roh Lamatua dedꞌe nèti jaꞌa asa sorga. Cagꞌagꞌa laa, jaꞌa kèdhi kadera paredha èci, aa abhu dhu madhèdi ètu dedha.
3 Dhu madhèdi ètu kadera èèna heo mangèru dènge mea, èci èèna ka dènge hadhu kaleꞌe dhu kabꞌua, dhu ra peka na, yaspis dènge sardius. Abhu kahèi saroo èci dhu reo nare kadera paredha Na. Saroo ne heo na mangèru sama sèmi hadhu kaleꞌe samrud.
4 Ètu èèna kahèi, abhu 24 (dua nguru èpa) kadera paredha iiki, dhu reo rare kadera paredha dhu ètu talora aae èèna. Ètu dedha kadera paredha iiki seꞌe, madhèdi katua 24 (dua nguru èpa) dhèu. Aaꞌi-aaꞌi ra pake mèdha-papake pudhi, dènge solo paredha dhu tao nèti hualaa.
5 Nèti kadera paredha ètu talora aae èèna, abhu bela dhu kacèbꞌa, dènge dꞌoro dhu lii mèdhu patuu maꞌèta boe. Abhu kahèi obꞌo pidhu bua dhu heo ètu madha kadera paredha èèna. Rèngu se, nuka sèmi Roh Ama Lamatua dhu pidhu rupa.
6 Ètu madha kadera paredha ne, jaꞌa kèdhi èi, oe sèmi dhasi dhu mèu aadha-aadha nuka sèmi tèru.
Hèia jaꞌa kèdhi badha èpa ngiꞌu dhu dhae kèdhi mèka ciki sa rai-reo kadera èèna. Ngiꞌu ra nèti madha toke kabodho, pènu dènge musi madha. Badha seꞌe ka dhu lalau-laloꞌo Lamatua.
7 Badha ka èci, rèhu na sèmi singa. Ka dua, rèhu na sèmi sapi mone. Ka tèlu, rèhu na sèmi dhèu. Aa ka èpa, rèhu na nuka sèmi manea luji dhu lela.
8 Badha èpa ngiꞌu se, ciꞌu-ciꞌu ka dhu dènge èla ra, èna. Re liꞌu dènge re dꞌara èla se, pènu dènge musi madha kahèi. Mèu-mèda, badha se loe boe sodꞌa, peka na,
“Jiꞌi koa-kio kolongara Ama Lamatua!
Jiꞌi dedꞌe padedha-dedha kolongara Lamatua!
Lamatua èèna, dhu mola-mèci risi eele!
Koasa Lamatua dhu kapai risi eele.
Lamatua èèna karèi nèti uru ka mai.
Lamatua dhu deo neꞌe ne.
Aa Lamatua dhu taa-taa toke dꞌai mia-mia laꞌe!”
9 Dènge ra sodꞌa sèmi èèna, rèngu koa-kio dènge pakabꞌua Ama Lamatua, aa ra manèngi makasi mi Nèngu kahèi, lula Nèngu ka dhu madhèdi ètu dedha kadera paredha èèna, aa Nèngu ka dhu taa-taa toke dꞌai mia-mia. Ropa rèngu sodꞌa,
10 hèia 24 (dua nguru èpa) katua sèra pabèbha iisi ra, ka patitu kètu urutuu ètu madha Ama Lamatua, dhu madhèdi ètu kadera paredha èèna. Katua se bhoke eele solo paredha ra, ka ra tèke mi madha kadera paredha èèna, ho pahaha iisi mi Nèngu dhu mamuri taa-taa dènge boe too-lane. Èle ka, ra koa-kio Ne, peka na,
11 “Ooo, Ama Lamatua!
Jiꞌi koa-kio kolongara Lamatua!
Jiꞌi dedꞌe padedha-dedha kolongara Lamatua.
Lamatua ne, Kètu jiꞌi.
Lamatua ne, Ama Lamatua jiꞌi!
Lamatua ka dhu nia sèmi more koa-kio jiꞌi.
Lamatua ka dhu pantas sèmi lii pakabꞌua jiꞌi.
Lula Lamatua ka dhu koasa kapai risi eele.
Aa Lamatua ka dhu dedha risi eele.
Lamatua ka dhu pajꞌajꞌi aaꞌi-aaꞌi.
Lamatua ka dhu hia mamuri aaꞌi-aaꞌi.
Aaꞌi-aaꞌi dhu tesa,
jꞌajꞌi, lula Lamatua ka dhu adꞌu-ue.
Aaꞌi-aaꞌi dhu mamuri,
dènge aꞌae, lula Lamatua ka dhu hia.”