11
Ma timotemachica ipan Toteco para techpalehuis
Amo xinechilhui:
“Ximochololti cuatitla huan ximomanahuiti queja se tototl.”
Ax monequi nicholos pampa na nimotemachijtoc ipan TOTECO.
Nochi quiijtohuaj:
“Xiquita, nopa tlacame tlen mosisiníaj quicualtlalíaj cuahuitoli huan cuatlamintli,
huan motlatijtoque para quinmaquilise tlacame tlen itztoque xitlahuaque.”
Yonque queja nopa quiijtohuaj, ax melahuac.
Yonque quiijtohuaj:
“Ayoc oncas leyes huan axaca tlanahuatis xitlahuac,
huan huajca monequi tlacame tlen cuali ininyolo ma choloca pampa axaca huelis quinmanahuis”, ax neli inintlajtol.
TOTECO noja itztoc ipan itiopa tlen tlatzejtzeloltic nepa elhuicac.
Quena, yajaya mosehuijtoc ipan isiyaj yejyectzi huan noja tlanahuatía.
Quiita nochi tlen quichihuaj tlacame.
Quitlajtlachilía sese iyolis.
TOTECO quinyejyecohua tlen quichihuaj tlen cuali,
pero tlacame tlen ax cuajcualme huan tlen quinpactía mosisiníaj, ax quinequi quinitas.
TOTECO quichihuas ma huetzi tlicoli tlen xahuantoc ininpani tlen quichihuaj tlen ax cuali.
Quena, quintitlanilis azufre tlen lementoc para ma huetzi ininpani,
huan quintlatis ica se ajacatl tlen tlahuel totonic.
TOTECO, yajaya nelcuali.
Quinicnelía tlen nemij xitlahuac.
Huan tlacame tlen xitlahuac ininyolo quiixtlachilise,
huan quimatise para Toteco quicualita tlen quichihuaj.