34
TOTECO techmocuitlahuía huan techmanahuía
1 Nijtlascamatis TOTECO ajachica huan nochipa nijsenpaquilismacatos.
2 Nijhueyitlalis huan niquinilhuis nochi tlacame tlen yajaya nechchihuilijtoc.
Inijuanti tlen teicneltzitzi quicaquise huan paquise.
3 Ma tijhueyichihuaca huan ma tijhueyitlalica TOTECO san sejco.
4 Nijtzajtzili TOTECO ma nechpalehuiqui,
huan yajaya nechtlacaquili huan nechmanahui tlen nochi tlen nechmajmatiyaya.
5 Sequinoc tlen motemachíaj ipan Toteco ixcahuanij ica paquilistli nojquiya,
ipampa tlen yajaya quinchihuilijtoc.
Ax quema pinahuase.
6 Yonque nipilteicneltzi,
nijtzajtzili TOTECO,
huan yajaya nechmaquixti ica nochi tlamantli tlen nechcuesohuayaya.
7 Ielhuicac ejca TOTECO quinmocuitlahuía nochi tlen quiimacasij TOTECO,
huan yajaya quinmanahuía.
8 Xijyejyecoca TOTECO huan inquiitase para melahuac cuali iyolo tohuaya.
Hueyi paquilistli quipiyaj nochi tlacame tlen ipan ya motemachíaj.
9 Nochi imojuanti tlen iniaxcahua TOTECO, xiquimacasica,
pampa nochi tlen quitlepanitaj ax tleno quinpolohua.
10 Nopa tecuanime tlen más quipiyaj chicahualistli quemantzi mayantinemij huan ax quipantíaj tlen quicuase,
pero tlacame tlen quitemohuaj TOTECO quipiyase nochi tlen cuali.
11 Xihualaca noconehua, huan xinechtlacaquilica,
huan nimechmachtis quejatza monequi inquitlepanitase TOTECO,
huan inquiimacasise inquiixpanose.
12 ¿Tijnequi tiitztos ica yejyectzi?
¿Tijnequi tihuejcahuas ipan ni tlaltepactli,
huan tiquitas tlen cuali?
13 Monequi xijmocuitlahuis monenepil para ax tiquinmahuispolos sequinoc ica istlacatili.
14 Ximoiyocatlali ica tlen ax cuali,
huan xijchihua san tlen xitlahuac.
Xijchihuaca tlen inhuelij para ma oncas tlasejseltili ininhuaya nochi tlacame.
Quena, ya nopa xijtemoca ica nochi imoyolo.
15 TOTECO quintlachilía tlen nemij xitlahuac iixpa,
huan san quichiya para quinmacas tlen quitlajtlanise.
16 Pero TOTECO sencualantoc ica inijuanti tlen quichihuaj tlen fiero.
Quintzontlamiltis para ma axaca quinilnamiquis ipan ni tlaltepactli.
17 Quema tlacame tlen itztoque xitlahuaque iixpa TOTECO quitzajtzilíaj,
yajaya quintlacaquilía.
Huan quinmanahuía tlen nochi inincuesolhua.
18 TOTECO itztoc ininnechca tlacame tlen mocuesohuaj.
Huan quinmaquixtía tlen mocuesohuaj ica inintlajtlacolhua.
19 Se tlacatl tlen itztoc xitlahuac iixpa TOTECO quipiya miyac cuesoli,
pero TOTECO quimanahuía ica nochi tlen ipanti.
20 Pampa TOTECO quimocuitlahuía para ax postequis niyon se iomiyo.
21 Se tlacatl tlen fiero iyolis miquis ipampa nopa tlamantli fiero tlen quichihua.
Quena, TOTECO quintlalilis tlatzacuiltili tlen quicocolíaj tlen cuali.
22 TOTECO quinmaquixtía itlatequipanojcahua.
Quena, quintlapojpolhuía itlacajhua tlen motemachíaj ipan ya.