Ŋwa' Mwɛɛm mvù Jisos to duŋcɛɛ ɛ̂ Jon
Fiɛɛ fì nu ɛ̂ Ŋwa' wvun e
Ŋwa' wvun nu ɛkumɛ mwɛɛm mvù Jisos Klistu to duŋcɛɛ ɛ̂ Jon wvù waa we ntum. Jon to saŋ ŋwa' wvun kefew kè bó to bvusɛɛ wvú gɛn gɛɛ ɛ̂ kendvuy kè Batmos e. Wvú to saŋ fô bintaashɛ bi bonyii bo mbee le ɛ bí to nu bisooshwiy. Wvú to dioo saaŋke, kɛw bô mwɛɛm mvù Jisos kebɛɛ to duŋcɛɛ ɛ̂ wvú lɛ wvú esaŋ eciinse ɛ̂ bintaashɛ bi bisooshwiy bidvu. Fiɛɛ fì bii fó nu ŋgoo mwɛɛm nteen mvù wvú to yɛne ɛ̂ fiɛɛ diɛwɛ ɛfilɛ le ɛkumɛ no Nyo' nu ke eboyse bonyii bò ɛ̀ nu bew, lese bò befe ŋgɛw e.
Bikuu bi mwɛɛm e ɛ̂ Ŋwa' wvun e
1:1-8 Keŋkɛwcɛ
1:9–3:22 Ɛfilɛ ke fwe noo boŋwa' bò gɛne fô bintaashɛ bi bonyii bo mbee le bi bisooshwiy e
4:1–8:1 Ŋwa' wvù bó to lacɛɛ mondvuum mosooshwiy bô kelay
8:2–11:19 Disoŋ di disooshwiy
12:1–13:18 Keŋguum ke nyam yì fieesene nyam joo bô nyám yì bɛmte yifiɛɛ
14:1–15:8 Bifilɛ bimew jɛɛy jɛɛy
16:1-21 Bintee bisooshwiy bi shém Nyo' yì ffuuke le
17:1–20:10 Ɛ bó lɛse Babilon bô nyam yì bɛmte noo bonyii bo ntum Nyo' le bo mbiay e bô dɛwle
20:11-15 Nsaw wvu fokemɛse
21:1–22:5 Woŋ wvu we wvu fwɛ bô nshɛ yi fiɛ noo Jɛlusalɛm wvu fwɛ
22:6-21 Kemɛse
1
Keŋkɛwcɛ
+Ŋwa' wvun nu ɛkumɛ mwɛɛm mvù Nyo' to nyaɛ ɛ̂ Jisos Klistu lɛ wvú eduŋcɛ ɛ̂ bonyii bew, lɛ ɛ̀ nu mvù nu ke ekooyi nfew caan. Ɛ Jisos Klistu mum tum nceendaa we fô wee we lemme wvù Jon e keege lɛ bó ekiɛɛ mwɛɛm mvudvu. +Ɛ wvú mum saŋ naa fiɛɛ ficii fì wvú to yɛnɛɛ, fì ɛ̀ nu diɛw Nyo' yin bô mwɛɛm mvù Jisos Klistu to jemyɛɛ ɛ̂ wvú le. +Njoŋ wvu baay nu ke enu wvù wee wvù nu ke etaaŋke ntum Nyo' wvun. Ɛ njoŋ wvu baay nu ke enu tɛn wvù bonyii bò nu ke eyuuke fiɛɛ fì bó saŋ ɛ̂ ŋwa' wvudvu wvun e gɛɛle, njefo kefew ke mwɛɛm mvudvu le nu wase nceencee.
Ɛ Jon nya ŋgayma ɛ̂ bintaashɛ bi bonyii bo mbee le bi bisooshwiy
+Ɛ̀ nu me wvù Jon, ɛ me nsaaŋke ŋwa' wvun fô bintaashɛ bi bonyii bo mbee le bi bisooshwiy bì nu ɛ̂ biba bi woŋ e bi Ɛsia le. Mbuwma bô nyɛkeey enù fô ben e wvù nɛn'yi fô Nyo' le wvù ɛ̀ nu wvuwɛ wvù nu, ɛ wvú to nu wase, ɛ wvú nu ke eto. Mbuwma bô nyɛkeey wvun enù fô ben e wvù nɛn'yi tɛn fô biyoy bi bisooshwiy bì nu fwe dvu kawla we le, +noo fô Jisos Klistu wvù ɛ̀ nu kɛ wvú wvù ké no duŋci fiɛɛ fi kecɛɛy ɛkumɛ Nyo' ɛ̂ bonyii le. Ɛ̀ to nu wvú wee wvu fwe keekase buy yî kpwe le. Ɛ ɛ̀ nu wvú wvù saake bonfon bocii bo yî nshɛ le fɛn. Mbense enù fô wvú le. Ɛ̀ nu wvú wvù kooŋke beene, ɛ wvú to bvuse beene can kebefɛ kesɛɛbeene le bô ɛlɛmɛ kew. +Wvú nu ɛ ge beene ɛ no nu bonyii bo bvunfon e, ɛ ge beene ɛ no nu bocee ncese bo Nyo' wvù Ice le. Bvukukɛ bô mvuŋgay mvunciim enù fô wvú le sekecii sɛ ŋka. Fí enù nonɛn.
+Ben etaa eyɛn, Jisos too lo, ɛ wvú nu ke etoo ɛ̂ kembɛw e. Bonyii bocii nu ke eyɛn wvú le naa noo bonyii bò to bonɛɛ wvú bô goo. Bitum bi yî nshɛ le bicii nu ke efuuŋke kpwe nje ye. Ɛ̀ nɛɛ no fí nu ke enu. Fí enù nonɛn.
+Tata Nyo' gayte lɛ ɛ̀ nu wen Alfa, ɛ ɛ̀ nu wen Omega. Ɛ̀ nu wvú wvù nu, ɛ ɛ̀ nu wvú wvù to nu wase, ɛ ɛ̀ nu wvú wvù nu ke eto. Ɛ̀ nu wvú Mvuŋgay Mvunciim.
Ɛ Jon yɛn Jisos e
+Ɛ̀ nu me wvù Jon, waa bwee wene yî Jisos e, ɛ beene bocii yɛne ŋgɛw nje ye, nu ɛ̂ bvunfon bwew ɛnte, kuule shém yî mwɛɛm mvunciim e. Me nto nu ɛ̂ kendvuy kè Batmos e ɛ bó to bvuse lo me nje diɛw Nyo' yì me nto nfewci mbvuu nseŋe ɛkumɛ Jisos. 10  +Ɛ ɛ̀ ke no nu diuu di Tata le, ɛ me nu can Keyoy ke Nyo' le, ɛ me nɛ n'yuw ɛ diɛw jemyi ɛ̂ me ɛjim foweɛwe diɛwɛ soŋ e. 11  +Yí to jemyi gayte lɛ, “Saŋɛ mwɛɛm mvù wo yɛne mvun ɛ̂ ŋwa' le eciinse ɛ̂ bintaashɛ bi bonyii bo mbee le bi bisooshwiy bì nu ɛ̂ bilaante bi Ɛfɛsus, Similna, Bɛgamum, Tayatila, Saldis bô Filadɛlfia noo Lawdɛsia le.”
12  +Ɛ me mum no mbaŋse ye keen'yɛn wee wvù jemyi ɛ̂ me le. Ɛ me ndioo mbaŋke, n'yɛn mwɛɛm mvù bó tomyi bin'yeese yî dvú le mvusooshwiy ɛ bó kene bô ketwaa ke bigew e kè yɛɛle. 13  +Ɛ wee mvu nu ɛntelɛŋ jo mwɛɛm mvù bó tomyi bin'yeese yî dvú le mvudvu diɛwɛ wee wvù diee nu Waawee le, ɛ wvú ɛ tfume kekum ɛ kí defe, ɛ waw ŋ'waw yî gvuw e ɛ bó kene bô ketwaa ke bigew e kè yɛɛle. 14  +Yvuw ye ɛkolɛ to baa diɛwɛ ndaw wvù baa nɛn bvuuu le, ɛ ɛjisɛ ɛye bɛɛnci diɛwɛ leme di ŋguy e. 15  +Bikaa biew to nu lemeleme diɛwɛ ketwaa kè yɛɛle kè bó ton ɛ̂ lam, ɛ diɛw ye dvûmte diɛwɛ joo yi gbwee le. 16  +Wvú to kɛŋke jón yisooshwiy ɛ̂ ɛbo kew ke ɛcɛɛy e, ɛ nyo yì koole biba bicii buyte ɛmvu jo wvú, ɛ bvushiw bwew baa diɛwɛ diuu seke dí keyte lo le.
17  +No me n'yɛnɛɛ wvú le, mum ŋgbwe ɛ̂ wvú ɛjise no nu diɛwɛ keŋkpwe ke wee le. Ɛ wvú gɛɛ ɛbo kew ke ɛcɛɛy yî yɛm e gay lɛ, “Fo wo efanè kɛ. Ɛ̀ nu me Fwe, ɛ ɛ̀ nu me Ɛjimɛ. 18  +Ɛ̀ nu me wvù nu dvú. Me nto nu ɛ ŋkpwe, geenɛn taa eyɛn, me nu ɛ ŋkase ɛ no nu dvú, ɛ me nu ŋke enu dvú sekecii. Ɛ̀ kɛŋke me ken'yene ke kpwe le bô ke woŋ boŋkfu le. 19 Nonɛn, saŋɛ lɛ mwɛɛm mvù wo yɛne, mwɛɛm mvù nu keseen bô mvù nu ke ekooyi ɛjim jodvu le. 20 Fiɛɛ fì jón yi yisooshwiy yɛ yì wo be yɛn ɛ̂ ɛbo kem ke ɛcɛɛy e bô mwɛɛm mvu mvusooshwiy mwɛ mvù bó kene bô ketwaa ke bigew e kè yɛɛle mvù bó tomyi bin'yeese yî dvú le duŋci nu fin: Jón yi yisooshwiy yɛ nu bonceendaa bo Nyo' le bò ɛ̀ nu bo bintaashɛ bi bonyii bo mbee le bi bisooshwiy bidvu, ɛ mwɛɛm mvu mvusooshwiy mwɛ mvù bó tomyi bin'yeese yî dvú le nu bintaashɛ bi bonyii bo mbee le bi bosooshwiy bidvu.”
+ 1:1 4:1; 22:6 + 1:2 6:9 + 1:3 14:13 + 1:4 4:5 + 1:5 2:26; 7:14; 19:15; Kolo 1:18; Ibu 9:14; 1Jon 1:7 + 1:6 5:10; 20:4, 6; 22:5; Ksm 19:6; 1Bi 2:9 + 1:7 1:13; Dan 7:13; Mat 24:30; Jon 19:34, 37; 1Tɛs 4:17 + 1:8 1:4, 8; 2:8; 4:8; 11:17; 16:5; 21:6; 22:13; Ksm 3:14; Yɛsa 44:6 + 1:9 22:8 + 1:10 17:3 + 1:11 4:5 + 1:12 Saka 4:2 + 1:13 Dan 7:13; 10:5 + 1:14 Dan 7:9; 10:6 + 1:15 14:2 + 1:16 4:5; 2:12; 9:15; Ibu 4:12 + 1:17 1:8; Dan 8:17-18 + 1:18 Lum 14:9; 1Kol 15:3-4, 25-26