18
No kelaante kè Babilon nu ke egbwe
+Ɛjim jodvu ɛ me n'yɛn nceendaa Nyo' mvu le ɛ wvú shiile too we kɛŋke mvuŋgay mvu baay, ɛ n'yuu we baa yî ɛkolɛ ke nshɛ le kecii. +Ɛ wvú fuŋ foweɛwe bô diɛw yì tɛmyi lɛ, “Babilon wvu baay nu ɛ gbwe wase! Wvú nu ɛ gbwe wase! Wvú nu ɛ tu wase bvudvuu bvù bonceendaa bo dɛwle le cee fó le. Wvú nu tfum biyoy bì yiile bicii. Wvú nu wase tfum mvunyiim mvù nyɛne bô mvù bó bane mvunciim. +Wvú nu ɛ gbwe wase njefo bitum bicii nu ɛ wu wase nce we nnyɛn kenjaŋ wvú ɛ koo bó diɛwɛ mbvuum e, ɛ bonfon bo yî nshɛ le nu ɛ ge wase nce nnyɛn kenjaŋ bô wvú. Bonyii bo way e bocii bo yî nshɛ le nu ɛ kukɛn wase yî ye le nje kpwaw we wvù wvú nu ɛ baancɛ wa wvú ɛ fum lo.”
+Ɛ me mbvuu n'yuw ɛ diɛw mi fuuŋke woŋ wvu we le gayte lɛ,
“Bonyii bem, ben ebuy lo jó,
wvu lɛ fo ben ke eley bibefɛ biew e,
bô lɛ fo ben ke eley tɛn ŋgɛw wvù nu ke eto fô wvú le.
+Bibefɛ biew nu ɛ bí ɛ loocɛ wase ɛ yiŋsɛn ɛ ben ɛ buy fowe,
Nyo' ɛ kume wvú yî mwɛɛm mwew mvù befe le.
+Bó ege bô wvú no wvú ge bô bonyii bomew.
Bó elaw wvú yî gee diew e bokaŋ bofɛɛ.
Bó egɛɛ mbvuum mò ɛ̀ nu ŋgɛw mvuŋkom mvunfɛɛm
ɛ̂ fiko fì wvú ké no gɛɛle wvu bonyii bomew e jó,
enya ɛ́ wvú ewu.
+Bó efew ŋgɛw bô nsase enya ɛ̂ wvú
kɛ lɛŋlɛŋ no wvú to saale ye ɛ̂ bvukukɛ ɛnte diee ɛkolɛ kew.
Wvú shiile no kfune gvuw gayte lɛ,
‘Me nu Yaa yî kawla le,
kɛ me nu kpwɛɛ ŋkfu kɛ,
ɛ kɛ me nu ŋke en'yuu mbeele nsoo ɛkolɛ kɛ.’
+No wvú gayte nonɛn, nu kɛ no ŋgɛw nu ke eto
yî ye le yî diuu le dimwaaŋ.
Kencɛm nu ke egbwe yî ye le, ɛ́ wvú ebeele soo ɛkolɛ.
Ɛ jeŋ nu ke ekoo tɛn wvú.
Bó nu ke eton wvú bô ŋguy,
njefo Nyo' Tata wvù nu ke esaw wvú nu ɛ wvú kɛŋke mvuŋgay.
Bonyii bo yî nshɛ le nu ke ebeele Babilon
+Bonfon bo yî nshɛ le bò se gee nnyɛn kenjaŋ bô wvú, diee ye bô wvú, nu ke ebeele ffule seke bó ɛ yɛn no njiim bene yî ye le no wvú fiee. 10 Bó nu ke eleeme lo ntamndwee bô nfan no bó yɛne ɛ bó njiŋsene bô wvú. Bó nu ke ecamte ye gayte lɛ, ‘Ɛy me! Ɛy me! Babilon, wo wvù kelaante ke baay! Wo wvù kelaante kè kuuke! Ŋgɛw nu ɛ mum ɛ to lo yî yo le kɛ yî ntam kefew e nɛn mwaaŋ e?’
11 Bonyii bo way e bo yî nshɛ le nu ke ebeele wvú soo bikuu njefo kɛ wee bɛɛ dvú wvù nu ke eguyte mwɛɛm mvubole kɛ. 12  +Kɛ wee bɛɛ dvú wvù nu ke eguyte mwɛɛm mvubole diɛwɛ mvù bó kene bô ketwaa ke bigew e kè yɛɛle kɛnɛɛ kè baa, kɛnɛɛ mvù bó kene bô kfuu ɛta yò lumte kɛnɛɛ bô ɛjisɛ ɛ baŋ kɛ. Kɛ wee bɛɛ dvú wvù nu ke eguyte ndvú yibo yi lemeleme kɛnɛɛ yì yɛɛle ŋgaciŋgaci, kɛnɛɛ yì bonene kɛnɛɛ yì yɛɛle ghaŋŋ kɛ. Ɛ kɛ wee bɛɛ dvú wvù nu ke eguyte bite bibole bì samte jee, kɛnɛɛ mwɛɛm mvubole mvunciim mvù bó kene bô bigew bi keyoo le noo mwɛɛm mvunciim mvù bó kene bô bite bì lumte noo ketwaa noo ketfu noo ɛta yò lawkene kɛ. 13 Kɛ wee bɛɛ dvú wvù nu ke eguyte bite bibole bì bó keenci bonfiey bò shfuuŋkene dvú noo mwɛɛm mvù shfuuŋkene mvù bó dɛɛle mwɛɛm dvú noo jiin noo kfuu bonfiey bò shfuuŋkene bomew, noo kfuu jiin dimew, * noo mbvuum noo mɛɛm noo mvuum mo ɛgiŋ e bô ɛgiŋ ɛbo kɛ. Kɛ wee bɛɛ dvú wvú nu ke eguyte bona' bobole noo njée noo nyámbala noo bikoto bibole bì ɛ̀ guute nyam kɛ. Ɛ kɛ wee bɛɛ tɛn dvú wvù nu ke eguyte bonyii bo boyuum bò bó geese lɛ ɛ̀ nu bonfaw kɛ. 14 Bó nu ke egayte ɛ̂ wvú lɛ, ‘Mwɛɛm mvunciim mvù fitele fiuw se nu yî dvú le nu ɛ mvú ɛ gɛn wase, ɛ kpwaw wo bô bvukukɛ bwuw bvucii ɛ ka wase, ɛ wo yaa bɛɛ ke ebvuu eyuu eyɛn mvú le kɛ.’ 15  +Bonyii bo way e bò to geese mwɛɛm kawte bigew can ye le, nu ke eleeme lo ntamndwee nu bô nfan no bó yɛne ɛ wvú yɛne ŋgɛw. Bó nu ke efuuŋke lo kpwe, soo bikuu camte ye gayte lɛ, 16  +‘Ɛy me! Ɛy me! Yii yi baay fô kelaante ke baay kin e kè se nu ɛ kí ɛ sufe ye bô ndvú yi lemeleme noo yì yɛɛle ŋgaciŋgaci noo yì yɛɛle ghaŋŋ, lawkene ye le bô biɛɛ bì bó kene bô ketwaa ke bigew e kè yɛɛle noo kfuu ɛta yò lumte noo ɛjisɛ ɛ baŋ. 17 Bó nu ɛ mum ɛ yɛse kɛ lo bvukukɛ bwew yî ntam kefew e nɛn mwaaŋ e?’
Ɛ bocee bikuu bi boŋguw e bocii bô bonyii bò lɛne ɛ̂ boŋguw e noo bò lemte jó noo bonyii bocii bò lɛne ɛ̂ joo kamene way, nu ke eleeme lo tɛn ntamndwee. 18  +Bó nu ke eyɛne njiim yì bene no wvú fiee mum beele ghayte lɛ, ‘Kelaante kè se nu diɛwɛ kelaante ke baay kin e nu kè la?’ 19 Bó nu ke ekfumte kebvu ɛfa no bó fuuŋke kpwe soo bikuu, beele ghayte lɛ, ‘Ɛy me! Ɛy me! Yii yi baay fô kelaante ke baay kin kè bonyii bocii bò kɛŋke boŋguw bo ɛ̂ joo nu ɛ kukɛn yî bvukukɛ bwew e! Bó nu ɛ mum ɛ yɛse lo kí kɛ yî ntam kefew e nɛn mwaaŋ e?’ 20  +Ben bò nu woŋ Nyo' le, ben elaŋlaŋè finɛn yî fiɛɛ fì kooy fô wvú le. Ben bocii bò ɛ̀ nu bonyii bo Nyo' le bô boom bo ntum e bo Jisos e noo bonyii bo ntum Nyo' le bocii, elaŋlaŋè njefo Nyo' nu ɛ sumtɛn wase nsaw yî fiɛɛ fì wvú ge bô ben e!”
21  +Ɛ nceendaa Nyo' wvù tɛmyi mvu mum nɛ tuu kebwee ke tɛ le ɛ kí nu diɛwɛ diene di baay e, shike ɛ dí shii ɛ̂ joo yi baay e nɛn wuuu. No wvú shike nonɛn mum gay lɛ, “Ɛ̀ nu kɛ nonɛn no bó nu ke eshike wo wvù kelaante ke baay kè Babilon ɛ́ wo eshii bô mvuŋgay nɛn, bó saa bvuu ke eyɛn lo wo le kɛ. 22  +Kɛ bó bɛɛ ke ebvuu eyuw naa lo kome kɛnɛɛ yowe kɛnɛɛ ndoŋ kɛnɛɛ soŋ jo wo kɛ. Kɛ bó bɛɛ ke ebvuu eyɛn naa lo ɛ wee lemte fiɛɛ kɛnɛɛ ɛ̀ nu naa fì la jo wo kɛ. Kɛ bó bɛɛ ke eyuw naa lo ɛ diene jemyi jo wo kɛ. 23  +Kɛ ken'yeese bɛɛ ke ebvuu eyɛɛ jo wo kɛ. Kɛ bó bɛɛ ke ebvuu eyuw naa lo ɛ diɛw cee bvujen kɛnɛɛ yi jen jemyi jo wo kɛ. Fí nu ke enu nonɛn njefo bonyii bo way e bo jo wo to nu bonyii bo baay baay bo yî nshɛ le, ɛ wo to lɛɛle bitum bicii bô nfim yo. 24  +Ɛ̀ nu kelaante kin kè ɛlɛmɛ ke bonyii bo ntum Nyo' le bô ke bonyii bò ɛ̀ nu bo Nyo' le nu can kí le. Ɛ ɛ̀ nu kí kè bonyii bocii bò bó yuwyi yî nshɛ le nu can kí le.”
+ 18:1 Yɛsa 13; 47; Ɛsek 27 + 18:2 14:8; 16:19; Yɛsa 13:20-22; 21:9; 34:11, 14; Yɛli 50:39-40; 51:8 + 18:3 17:2; 18:11-19; Yɛsa 23:8; Ɛsek 27:22-23, 33 + 18:4 Yɛsa 48:20; Yɛli 51:45; 2Kol 6:17 + 18:5 Keŋ 18:20 + 18:6 Mben 137:8; Yɛli 50:29 + 18:7 Yɛsa 47:8-9 + 18:8 17:16 + 18:9 Ɛsek 26:16-17; 27:30-35 + 18:12 Ɛsek 27:12-24 * 18:13 Kfuu jiin din ɛ̂ díɛw bala le nu lɛ «frankincense», ɛ kfuu bonfiey bò shfuuŋkene ban nu tɛn lɛ «myrrh». + 18:15 Yɛsa 47:15; Ɛsek 27:36 + 18:16 17:4 + 18:18 Ɛsek 27:28-34 + 18:20 12:12; Yɛli 51:48 + 18:21 Yɛli 51:63-64 + 18:22 Yɛsa 16:10; 24:8; Ɛsek 26:13 + 18:23 Yɛsa 23:8; 47:12; Yɛli 7:34 + 18:24 16:6; Yɛsa 26:21; Yɛli 51:49; Ɛsek 24:7-8