27
Teme ipan tepetl Ebal para se tlaelnamiquilistli
1 Teipa Moisés ininhuaya nopa huehue tlacame tlen israelitame quinnahuatijque nopa masehualme huan quinilhui:
“Xijtoquilica nochi ni tlanahuatilme catli ama nimechnahuatía.
2 Ipan nopa tonal quema anquiixcotonase nopa hueyatl Jordán huan ancalaquise ipan nopa tlali catli amoTECO Dios anmechmacas, monequi xiquinquejquetzaca teme catli huejhueyi huan xiquinchipahualtica ica nextli.
3 Huan ipan nopa teme xiquijcuiloca nochi camanali tlen ni tlanahuatilme catli nimechnahuatijtoc xijchihuaca. Ya ni anquichihuase quema achtihui anajsitij ipan nopa tlali catli nochi temaca hasta onmocahua catli amoTECO Dios anmechmactilis quen quiijtojtoc quichihuas.
4 Huajca quema ya anquipanotose nopa hueyatl Jordán, monequi xijtlananaca ipan tepetl Ebal nopa teme catli ya nimechilhuijtoc, huan xiquinchipahualtica ica nextli.
5 Nojquiya monequi xijchihuaca se tlaixpamitl ica teme para amoTECO Dios, huan amo xiquintejtequica nopa teme ica niyon se tepostli.
6 Xiquintequihuica teme catli nejnejmaxtic huan amo tlatectli para ica nopa xijchihuaca nopa tlaixpamitl. Huan nopona ipan nopa tlaixpamitl xijmactilica amoTECO Dios tlacajcahualistli tlatlatili.
7 Xijmacaca tlacajcahualistli para tlasehuilistli huan nopona iixtla amoTECO Dios xijcuaca tlen nopa tlacajcahualistli huan xiilhuichihuaca.
8 Ipan nopa teme xiquijcuiloca para cuali ma nesi nochi ni camanali tlen ni tlanahuatilme.”
9 Teipa Moisés ihuaya nopa levita totajtzitzi quinilhuijque nopa israelitame:
“Israelitame, amo ximolinica. San xijtlacaquilica. Ama amojuanti anmocueptoque imasehualhua amoTECO Dios.
10 Huajca monequi xijneltoquilica amoTECO Dios huan xijchihuaca nochi itlanahuatilhua huan itlamachtilhua catli ama timechnahuatijtoque xijchihuaca.”
Catli quinajsis israelitame sintla amo quineltocase
11 Huan nojquiya ipan nopa tonal Moisés quinilhui nochi nopa masehualme:
12 “Quema anquipanotose nopa hueyatl Jordán, nopa huejhueyi familias tlen Simeón, Leví, Judá, Isacar, José huan Benjamín moquetzase ipan nopa tepetl Gerizim para tlayolmelahuase tlaque tlatiochihuali anisraelitame anquipantise sintla anquineltocase TOTECO.
13 Huan nopa huejhueyi familias tlen Rubén, Gad, Aser, Zabulón, Dan huan Neftalí moquetzase ipan tepetl Ebal para tlayolmelahuase tlaque tlatelchihuali anquiselise sintla amo anquineltocase TOTECO.
14 Huan nopa levitame tlananquilise ica inintoscac catli chicahuac para nochi anisraelitame anquicaquise huan quiijtose ni camanali:
15 Tlatelchihuali ma eli catli quichijchihuas se tlaixcopincayotl ica tepostli tlaatiltili, o catli ica imax quinchijchihuas tiotzitzi, huan ichtacatzi quintlalis canajya campa amo aqui quimatis sintla quinhueyitlalis. Ya nopa TOTECO amo quinequi quiitas.
Huan nochi anisraelitame anquiijtose: ‘Quej nopa ma eli.’
16 Tlatelchihuali ma eli catli amo quitlepanitas itata o inana.
Huan nochi anisraelitame anquiijtose: ‘Quej nopa ma eli.’
17 Tlatelchihuali ma eli catli quipatlas nopa teme catli quinextía se nepamitl para quiichtequilis seyoc itlal.
Huan nochi anisraelitame anquiijtose: ‘Quej nopa ma eli.’
18 Tlatelchihuali ma eli catli quicuapolos ipan ojtli se catli popoyotzi.
Huan nochi anisraelitame anquiijtose: ‘Quej nopa ma eli.’
19 Tlatelchihuali ma eli catli quichihuilis catli amo xitlahuac se seyoc tlali ejquetl, o se cahualtzi o se icnotzi.
Huan nochi anisraelitame anquiijtose: ‘Quej nopa ma eli.’
20 Tlatelchihuali ma eli catli ihuaya motecas isihua itata pampa quiixpanotoc itata.
Huan nochi anisraelitame anquiijtose: ‘Quej nopa ma eli.’
21 Tlatelchihuali ma eli catli quichihuas tlen hueli ica se tlapiyali.
Huan nochi anisraelitame anquiijtose: ‘Quej nopa ma eli.’
22 Tlatelchihuali ma eli catli ihuaya motecas isihua icni o se catli icone itata o inana.
Huan nochi anisraelitame anquiijtose: ‘Quej nopa ma eli.’
23 Tlatelchihuali ma eli catli ihuaya motecas imona.
Huan nochi anisraelitame anquiijtose: ‘Quej nopa ma eli.’
24 Tlatelchihuali ma eli catli quimictis seyoc ichtacatzi.
Huan nochi anisraelitame anquiijtose: ‘Quej nopa ma eli.’
25 Tlatelchihuali ma eli catli quiselis tomi para quimictis seyoc catli amo tleno quichijtoc.
Huan nochi anisraelitame anquiijtose: ‘Quej nopa ma eli.’
26 Tlatelchihuali ma eli catli amo quitlepanitas ni tlanahuatilme huan amo quineltocas.
Huan nochi anisraelitame anquiijtose: ‘Quej nopa ma eli.’