32
1 “Nochi ipan ilhuicactli huan tlaltipactli ma quitlacaquilica catli na niquijtos.
2 Xijselica notlamachtil quen anquiselíaj atl quema tlaquiyahui.
Quen ajhuachtli nochi quitzacua huan pitzajatl quiapachohua xihuime huan sacatl,
san nocamanal xijmatica.
3 Na nitlayolmelahua itoca TOTECO.
Niteilhuía quenicatza onpano ihueyitilis Toteco Dios.
4 Yaya catli techmanahuía.
Nochi itequi eltoc cuali.
Xitlahuac nochi catli quichihua.
Yaya nopa Toteco Dios catli temachtli.
Amo quema quichihua catli amo ijqui.
Yaya quichihua catli melahuac huan cuajcualtzi.
5 Pero nopa israelitame amo quichijtoque catli cuali.
Amo quinamiqui elise iconehua pampa motzontochonchijtoque ica ya.
6 ¿Quej nopa anquitlaxtlahuíaj TOTECO, anisraelitame?
Antzontochontique huan anhuihuime.
¿Amo yaya amotata catli anmechtlacatilti?
Yaya anmechchijtoc huan anmechmacatoc nemilistli.
7 Xiquelnamiquica nopa tonali huejcajya huan quenicatza panotihualajque amohuejcapan tatahua.
Xiquintlatzintoquili amotatahua huan nopa huehue tlacame ma anmechpohuilica.
8 Oncac se tonal huejcajya quema Toteco Catli Más Hueyi quinmajmacac nochi xinach masehualme sesen tlali campa itztosquíaj.
Yaya quiquetzqui miyac nepamitl campa hueli para tlatlajco ma onca tlalme ica ininmasehualhua quen ininmiyaca israelitame.
9 Pampa tiisraelitame tiimasehualhua TOTECO.
Tiiaxcahua catli yaya teipa quiselis quen se quiselía se tlenijqui catli se tetaj quimacatehua icone.
10 TOTECO techpanti tiisraelitame huan tohuejcapan tatahua ipan nopa huactoc tlali,
campa nopa ajacatl quihuijhuitectoc chicahuac huan campa amo tleno onca.
Techmanahui, huan techmachti huan techmocuitlahui cuali quen tieliyayaj tiiixteyol sitlal.
11 Techchihuili quen se cuajtli moeltlapalpapatlatza ipan itepasol huan quinnotza ipilconehua ma patlanica.
Huan quema quiita iconehua siyahuij patlantinemij, quipajpatlahua ieltlapal para ieltlapaltipa ma huetzica huan quinhuicas campa tepeixco hasta campa itepasol.
Quej nopa techmocuitlahuijtoc TOTECO.
12 Yaya TOTECO iseli techyacantoc huan amo aqui más.
Amo quipixqui niyon se tiotzi catli quipalehui.
13 TOTECO quichijqui ma titlatlanica.
Techtlamacac tiisraelitame ica nopa cuatlajcayotl catli más cuali onca ipan mili.
Ipan tepeixco quiquixti nectli huan techmacac ma tijcuaca huan ipan sequinoc teme catli tetic techquixtili aceite.
14 Techtlamacac ica mantequilla huan lechi tlen inintlapiyalhua.
Tijcuajque ininnacayo nopa pilborregojtzitzi catli más yejyectzitzi.
TOTECO techtlamacac ica oquich borregojme huan oquich chivojme catli achi cuali catli oncayayaj ipan tlali Basán.
Techmacac nopa trigo catli más cuajcualtzi,
huan tiquijique catli más cuajcualtzi xocomeca atl.
15 Pero tiisraelitame pejqui tineltlacuaj,
huan pejqui más timochihuaj tihuejhueyij hasta tlahuel tielque titomahuaque.
Huan tijtlahuelcajque Toteco Dios catli techchijchijqui.
Tijhuejcamajcajque nopa hueyi tetl catli techmanahuijtoya,
huan amo tijnequiyayaj yaya catli totemaquixtijca.
16 Huan tiisraelitame tijpejpehualtijque huan tijcualanijque TOTECO Dios,
pampa tiquinhueyichijque tiotzitzi catli fierojtique.
17 Tiisraelitame tiquinmactilijque tlacajcahualistli ajacame tlen Amocualtlacatl,
quema titlatencahuayayaj iniixpa nopa tiotzitzi catli amo ya Toteco Dios,
huan amo quema tiquiniximajtoyaj.
Inijuanti eliyaya tiotzitzi catli yancuique,
catli sanoc onajsicoj huan catli totatahua amo quintlepanitayayaj.
18 Israelitame, anquielcajtoque amoTata huan amoTlamanahuijca. Anquielcajque Toteco Dios catli techmacatoc nemilistli.
19 Huan TOTECO quiitac catli tijchihuayayaj huan tlahuel tohuaya cualanqui.
Tojuanti catli tiioquichpilhua huan tiisihuapilhua tijchihuilijque ma techcualancaita.
20 Huan teipa TOTECO quiijto: ‘Na nojquiya nimoicancuepas ica inijuanti,
huan niquitas hasta canque tlamis ininmosisinijcayo.
Nelnelía inijuanti amo cuajcualme.
Itztoque quen coneme catli amo aqui huelis ininpan motemachis.
21 Nechchijque ma niquintlasomati pampa quinhueyichijque tiotzitzi huan tlaixcopincayome catli amo ya Toteco Dios.
Nechpejpehualtijque ica ininteteyohua. Huajca na nojquiya niquinchihuas ma nechtlasomatica pampa niquinpalehuis masehualme catli amo ya nomasehualhua.
Huan niquinpejpehualtis nopa israelitame ica masehualme catli amo quinitaj sintla quipiyaj ininpati.
22 Nocualancayo tlejcos quen se tlitl,
huan lemenis hasta ajsis campa más huejcatla ipan mictla. Quitlamitlatis nochi tlaltipactli huan itlajca.
Hasta campa pehua tepeme quitlatis ne tlitl.
23 Nielis quen se catli quinmajcahuilis cuatlamintli,
pampa nijtitlanis ipan inijuanti nochi catli amo cuali.
24 Cocoxquetiyase ica mayantli huan miquise ica tlatotonilotl.
Se fiero cocolistli quintzontlamiltis.
Niquintitlanilis tecuanime catli mosisiníaj huan cohuame catli tlahuel pajyojque catli mohuahuatatzaj tlalchi.
25 Ipan calles huetzise ininconehua mictoque ica machete,
huan ipan calijtic oncas majmajtli.
Telpocame huan ichpocame miquise, huehuentzitzi huan coneme catli noja chichij nojquiya.
26 Na niquijto para niquinsemanas huan niquintlamiixpolos ipan tlaltipactli hasta amo aqui quinelnamiquis.
27 Pero amo niquijiyohuisquía quema nechpaquitasquía nocualancaitacahua.
Amo nijnequi ma mohueyimatica inijuanti catli nechcocolíaj huan quiijtose:
Amo elqui ininDIOS catli quintlamilti nopa israelitame. Tojuanti toseltzitzi tijchijque ica tochicahualis.
Quej nopa quiijtojtosquíaj amocualancaitacahua.
28 Pero anisraelitame anquipolojtoque tlalnamiquilistli,
huan anhuihuitique. ¡Amo tleno anquimachilíaj!
29 Sintla elisquíaj antlamatini anquimachilisquíaj huan anquimatisquíaj canque antlamitij.
30 Pampa ¿quenicatza elqui para se amocualancaitaca iseli huelqui anmechtojtocac se mil anisraelitame?
Huan ¿quenicatza elqui para ica ome anmechtojtocaque 10 mil?
Ya ni elqui pampa niamoTECO, catli niamotlamanahuijca,
nimechtemactili ininmaco amocualancaitacahua.
31 Inintlamanahuijca amocualancaitacahua amo hueli ihuaya motlalis totlamanahuijca tojuanti.
32 Pero anisraelitame anitztoque quen xocomeca tzontli catli amo cuali.
Anitztoque quen masehualme tlen altepeme Sodoma huan Gomorra huejcajya.
Huan nopa xocomeca atl catli anquiyoliltíaj quipiya ipajyo huan tlahuel chichic.
33 Amoxocomeca atl eltoc quen nopa inintencococa cohuame catli temictíaj quen mahuaquijme.
34 Nicajoctihuala miyac tlamantli fiero para ica nimechtlatzacuiltis.
Quena, nicajoctoc tlatzacuiltilistli quen elisquía miyac tomi.
35 Nochi nicajoctoc para nopa tonal quema nitlacuepilis huan nimechmacas anisraelitame.
Pampa amo huejcahuas para ajsis nopa tlatoctzi quema anhuetzise.
Ya eltoc nechca nopa tonal quema nimechtzontlamiltis.
Ya anmechnechcahuía amohora.’
36 TOTECO quistehuas huan quintlajtolsencahuas imasehualhua quema quiitas ayacmo quipiyaj fuerza.
TOTECO quintlasojtlas itequipanojcahua huan quinchihuas ma moyolcuepaca ica ya quema quiitas nochi quincajtejtoque huan amo aqui quinpalehuía.
37 Huan TOTECO quinilhuis:
‘¿Canque itztoque amotiotzitzi,
nopa tlamanahuiani catli ipan anmotemachiyayaj?
38 ¿Canque itztoque catli quicuayayaj ichiyajca amotlacajcahualis,
huan quiijiyayaj nopa xocomeca atl catli anquinmactiliyayaj?
Ma motlananaca para ma anmechpalehuiquij.
Ma hualaca huan ma anmechmanahuiquij, pero amo hueli.
39 San na niiyojtzi niDIOS,
huan iyoca tlen na amo aqui seyoc.
Na nitemaca nemilistli huan nitequixtilía.
Na nitecocohua huan na nitepajtía.
¡Amo aqui huelis momanahuis tlen na nomaco!
40 Nijtlanana nomax para ilhuicac huan nitlatestigojquetza.
Niquijtohua: Nelía melahuac,
41 huan temachtli nijtentis nomachete catli cahuani huan nipehuas nitetlajtolsencahuas,
huan nimomacuepas ica nocualancaitacahua.
¡Niquinmacas catli quinamiqui catli amo quinequij nechitase!
42 Nochi nocuatlaminhua nijchihuas xolontoc ica inieso.
Huan ica nomachete niquintzontlamiltis nochi inijuanti.
¡Quena, ipan nomachete oncas inieso catli niquinmijmictijtoc huan catli niquinitzquitoc!
¡Nojquiya quipiyas inieso inintlayacancahua nocualancaitacahua catli quipiyaj inintzoncal huehueyac!’
43 ¡Ximoyolpaquiltica, nochi anmasehualme ipan tlaltipactli ininhuaya imasehualhua TOTECO Dios!
Yaya momacuepas ica catli quinmictijque itequipanojcahua.
Quena, quincuepilis icualancaitacahua.
Quipajpacas itlal huan imasehualhua.”
Itlayacapan tlanahuatilhua catli quinmacac Moisés
44 Huan Moisés ihuaya Josué, icone Nun, monextijque iniixtla nochi israelitame,
45 huan Moisés quinpohuili ni huicatl tlen ipejya hasta itlamiya.
46 Teipa quinilhui nopa israelitame:
“Ximonejnehuilica cuali ipan nochi ni tlamantli catli ama na nimechmachiltía, huan xiquinnahuatica amoconehua ma quichihuaca nochi catli quiijtohua ni tlanahuatilme.
47 Pampa ya ni amo ya se tlamantli catli amojuanti huelis san anquiahuilmatise. Ni tlanahuatilme eltoque nemilistli para amojuanti. Huan sintla anquineltocase ni tlanahuatilme, anhuejcahuase para anitztose ipan nopa cuali tlali catli ama anquipanose ni hueyatl Jordán huan anmoaxcatise.”
Toteco quicahuili Moisés ma quiita nopa cuali tlali
48 Ipan nopa tonal TOTECO quicamanalhui Moisés huan quiilhui:
49 “Xiya ipan nopa tepeme Abarim huan xitlejco hasta nopa tepetl Nebo catli eltoc ipan inintlal moabitame iixmelac altepetl Jericó ipan seyoc nali ne hueyatl. Huan tlen nopona xijtlachili nopa tlali Canaán catli niquinmacas ma moaxcatica ni israelitame.
50 Huan teipa timiquis ipan nopa tepetl catli ipan titlejcos, huan timosansejcotilis ininhuaya moteiximatcahua. Timiquis quen moicni Aarón catli mijqui ipan tepetl Hor huan mosansejcotili ica iteiximatcahua.
51 Anome, ta huan Aarón, amo anmotemachijque ipan na iniixtla nopa israelitame quema anitztoyaj campa nopa atlajtli Meriba nechca Cades ipan nopa huactoc tlali Zin. Huan amo antechhueyichijque iniixtla.
52 Huajca san ica huejca huelis tijtlachilis nopa tlali catli niquinmactilis ni israelitame, pero amo huelis ticalaquis ipan nopa tlali.”