21
Jesús monexti ica chicome imomachtijcahua
1 Teipa Jesús sempa monextico ica tojuanti tiimomachtijcahua nechca campa nopa hueyi atl catli itoca Tiberias o Galilea huan quej ni panoc.
2 Nochi tojuanti tiitztoyaj san sejco: Simón Pedro, Tomás catli tijtocaxtijque Cuate, Natanael catli ejqui Caná ipan estado Galilea huan na ihuaya noicni catli tiiconehua Zebedeo. Huan nojquiya tohuaya itztoyaj seyoc ome imomachtijcahua.
3 Huan Simón Pedro techilhui:
―Na niyas nimichtlajtlamati.
Huajca tiquilhuijque:
―Nojquiya tiyase mohuaya.
Huan tiyajque ateno huan titlejcoque ipan se cuaacali. Huan timichtlajtlamajque seyohual, pero niyon se michi amo tiquitzquijque.
4 Huan quema tlanestihualayaya, san molhui monextico Jesús moquetztoc xalixco, pero amo tiquiximatque sintla Jesús.
5 Huajca technojnotzqui:
―Nohuampoyohua, ¿anquinitzquitoque michime?
Huan tiquilhuijque:
―Amo, amo tleno.
6 Huan techilhui:
―Xijmajcahuaca amomatla ipan inejmac amocuaacal huan anquinitzquise.
Huan tijchijque huan amo tihueliyayaj tijquixtíaj tomatla ipan atl pampa nelía miyac michime tiquinmasiltijque.
7 Huajca na catli Jesús nechicneli niquilhui Pedro para ya nopa eliyaya Tohueyiteco.
Huajca quema Pedro quicajqui para eliyaya Tohueyiteco, moquenti icamisa pampa moquixtilijtoya, huan huitonqui ipan hueyi atl huan ajquitiyajqui hasta campa itztoya Jesús.
8 Huan teipa tisequinoc imomachtijcahua tiajsicoj ateno ipan tocuaacal pampa amo huejca tiitztoyaj tlen tlali, huelis san cien metros. Huan tihualajque tijhuahuatatzayayaj tomatla catli temitoya ica michime.
9 Huan quema tiajsicoj campa tlalpani, tiquitaque para Jesús ya tlipitztoya huan quicacatzohuayaya se michi ipan tlicoli. Huan nojquiya eltoya pantzi.
10 Huan techilhui:
―Techhualiquilica se ome michime catli anquinitzquijque.
11 Huan Simón Pedro tlejcoc ipan cuaacali huan quiitzqui nopa matlatl huan iseltzi quihuahuatatzqui hasta tlalpani. Huan nopa matlatl quinpixtoya 153 huejhueyi michime. Pero masque nelía miyac quinpixtoya, amo tzayanqui tomatla.
12 Huan Jesús techilhui:
―Xihualaca, ma titlacuaca.
Huan niyon se tlen tojuanti tiimomachtijcahua amo monejqui tijtlatzintoquilijque sintla nelía eliyaya Tohueyiteco pampa nochi tiquiximatque para yaya.
13 Huajca Jesús quicuito pantzi huan michime, huan techmacac ma tijcuaca.
14 Ya ni mochijqui eyi hueltas para Jesús monexti ica tojuanti tiimomachtijcahua quema ya mictoya huan sempa moyolcuitoya.
Pedro ma quinmachti masehualme
15 Huan quema titlanque titlacuaj, Jesús quiilhui Simón Pedro:
―Simón, tiicone Jonás, ¿techicnelía más que ne sequi?
Huan Pedro quiilhui:
―Quena, noTeco, tijmati na nimitzicnelía.
Huan Jesús quiilhui:
―Xiquinmachti nomasehualhua nocamanal. Itztoque quen pilborregojtzitzi.
16 Huan Jesús ica ompa quitlatzintoquili:
―Simón, tiicone Jonás, ¿techicnelía?
Huan Simón Pedro quiilhui:
―Quena, noTeco, tijmati nimitzicnelía.
Huajca Jesús quiilhui:
―Xiquinmocuitlahui nomasehualhua quen se quinmocuitlahuía iborregojhua.
17 Huan Jesús ica expa quitlatzintoquili:
―Simón, tiicone Jonás, ¿techicnelía?
Huan Pedro motequipacho pampa expa quitlatzintoquilijtoya sintla quiicnelía, huajca quiilhui Jesús:
―NoTeco, ta tijmati nochi tlamantli. Tijmati nimitzicnelía.
Huan Jesús quiilhui:
―Xiquinmachti nomasehualhua nocamanal quen se quintlamaca iborregojhua.
18 Nelía nimitzilhuía, quema tiitztoya titelpocatl, timoyoyonti, timotlajcoilpi huan tiyajqui campa tijnequiyaya, pero quema tihuehuejtiyas, tijxitlahuas momax huan seyoc mitzyoyontis huan mitzhuicas campa amo tijnequi tiyas.
19 Ica ni camanali, Jesús techilhuiyaya quen Pedro miquisquía ipan cuamapeli nojquiya, huan ica imiquilis más quinextisquía ihueyitilis Toteco. Huan teipa Jesús quiilhui Pedro:
―¡Techtoquili!
Na catli Toteco más nechicneli
20 Huan Pedro moicancuepqui huan nechitac na catli Jesús más nechicneli niquintoquiliyaya. Niitztoc catli nimosehuijtoya inacastla Jesús ipan nopa tiotlac quema nochi titlacuayayaj san sejco huan nijtlatzintoquili Jesús ajqueya quitemactilis.
21 Huan quema Pedro nechitac niquintoquiliyaya, quitlatzintoquili Jesús:
―NoTeco, ¿tlaque panos ica ya?
22 Huan Jesús quiilhui Pedro:
―Sintla nijnequisquía para ma itztos hasta nimocuepas, amo mocuenta Pedro. Ta techtoquili.
23 Huajca ica masehualme catli quineltocaj Jesús nemiyaya nopa camanali para amo nimiquisquía. Pero Jesús amo quiilhui Pedro amo nimiquisquía. San quiilhui para sintla quinequisquía ma niitztos hasta ya mocuepas, amo icuenta.
24 Huan na ninopa tlayolmelajquetl catli niquijcuilojtoc nochi ni tlamantli catli niquitac. Huan nijmati para melahuac nochi catli nimechilhuijtoc.
25 Huan onca miyac más tlamantli catli Jesús quichijqui catli amo niquijcuilojtoc nica. Sintla niquijcuilojtosquía senquistoc nochi catli Jesús quichijqui, nimoilhuía para ipan nochi tlaltipactli amo quicuisquía nochi nopa amame. San ya nopa.