104
Toteco quimocuitlahuía catli quisencajtoc
1 ¡Na nimitzpaquilismacas, TOTECO!
¡TOTECO Dios, nelía tihueyi!
Campa ta timocahua nochi tlayejyectzi huan cuajcualtzi.
2 Mitzyahualohua tlahuili catli onpano yejyectzi.
Ta tijpatlajqui nopa ilhuicactli quen se masehuali quipatlajtosquía se yoyomitl.
3 Eltoc quen quema timochanti,
tijtlali nopa cuatetomitl ipan atl catli huejcapa,
huan tijsencajqui nopa mixtli para elisquía mocarros.
Ta tihueli tinejnemi san ajacatipa.
4 Tiquintequihuía motequihuajcahua quen motlatitlanilhua huan tiquinchihua ma elica quen tlilelemectli.
5 Ta cuali tijtlatzquilti ni tlaltipactli para ma amo mijcuinis tlen campa eltoc.
6 Tijchijqui ma huala miyac atl catli quiixtzajqui ni tlaltipactli quen elisquía iyoyo.
Quena, tijchijqui atl ma tlejco hasta ajsic ipan nochi tepeme.
7 Pero quema ta ticamanaltic huan ticajhuac nopa atl,
nopa atl motlalojtejqui huan mosansejcotilito ipan nopa hueyi atl pampa ta titlahuejchijqui.
8 Tlejcoque tepeme huan nopa tlamayame temoque ipan ininlugar campa ta titlanahuati ma mosehuica.
9 Teipa tiquintlalili ininnepa nopa huejhueyi atl para ayacmo quema ma quiixtzacuaca tlali.
10 Ta tijchijqui atl ma motlalo ipan atlajtli campa tepeme,
huan ma temotihuala hasta quitemitía campa más tlatzintla nopa tlamayame campa hueli.
11 Ica nopa atl tiquinamaca nochi tlapiyalme para ma atlica.
Ipan nopa atlajtli aixhuij nopa burrojme catli nemij cuatitla.
12 Nopa totome quichihuaj inintepasol iteno nopa atlajtli,
huan huicaj quema itztoque ipan ininmacuayo nopa cuame.
13 Ta tijchihua ma huetzi atl ipan tepeme,
huan tijchihua ma tlaelilti nopa tlali.
14 Quena, ta Toteco tijchihua ma moscalti sacatl para ma tlacuaca tlapiyalme.
Huan tijchihua ma onca quilitl,
cuatlajcayotl huan cuayolotl catli masehualme quitocaj para ma ica mopanoltica.
15 Nojquiya tiquinmaca xocomecatl iayo para ma ica yolpactoca,
huan aceite para ma mopoloca ipan iniixayac,
huan nojquiya tiquinmaca tlacualistli para ma quipiyaca fuerza.
16 Ica nopa atl moscaltíaj nopa tiocuame catli ta, TOTECO,
tijtojqui ipan tlali Líbano.
Nopa cuame tlahuel huejcapantique huan quipiyaj miyac ininxochiyo.
17 Ipan nopa cuame motepasoltíaj nochi tlamantli totome.
Huan ipan nopa ciprés cuahuitl motepasoltía nopa tototl catli itoca cigüeña.
18 Inintzonatipa nopa huejhueyi tepeme onca sacatl para nopa chivojme catli nemij cuatitla.
Huan campa cocoyocatoc nopa teme, mochantijtoque nopa cuatochime.
19 Toteco, ta tijchijqui metztli para quinextis ipan tlaque metztli itztoque masehualme.
Huan nopa tonati tijchijqui para tenextilis sesen tonal.
20 Ta tijtitlani nopa tzintlayohuilotl huan mochihua yohuali,
huan quema tlayohua, quisaj nochi tecuanime catli itztoque ipan cuatitlamitl.
21 Nopa leones catli noja conetzitzi nanalcaj pampa mayanaj.
Huan quitemohuaj nopa tlacualistli catli ta, Toteco Dios, tiquinmacas.
22 Quema quisas tonati sempa onmotlatíaj ipan iniosto.
23 Huan masehualme quisaj para tequipanotij,
huan tequitij chicahuac hasta tiotlac.
24 ¡TOTECO, nelía tijchijtoc miyac tlamantli!
Huan nochi tlamantli tijsencajtoc ica miyac tlalnamiquilistli.
Nejmaxtic tlaltipactli temitoc ica miyac tlamantli yejyectzitzi catli ta tijchijtoc.
25 Xiquitaca nopa hueyi atl catli tlahuel patlahuac huan hueyi.
Nopona itztoque miyac tlamantli tlapiyalme tziquitetzitzi huan huejhueyi.
26 Nopona nejnemij nopa huejhueyi barcos,
huan nopona itztoc nopa hueyi tlapiyali itoca leviatán catli temajmati catli ta tijchijqui para ma mahuilti ipan hueyi atl.
27 Nochi ni tlapiyalme mochiyaj ipan ta para xiquintlamaca quema monequi.
28 Huan quema tiquinmaca inintlacualis,
inijuanti quiselíaj.
Ta timomatlapohua ica motlaicnelilis huan tiquintlamaca hasta ixhuij ica tlen más cuali.
29 Pero sintla tiquintlahuelcahua, inijuanti motequipachohuaj.
Huan sintla tiquinquixtilía ininnemilis, miquij huan mocuepaj tlaltejpoctli.
30 Huan quema ta tijtitlani moTonaltzi catli temaca nemilistli,
tlacatij sempayano para sempa ma momiyaquilica huan tlacualnesis ipan ni tlaltipactli.
31 ¡Ma tijhueyitlalica TOTECO pampa ihueyitilis amo quema tlamis!
¡Ma quipanti paquilistli TOTECO ipan nochi catli quichijtoc!
32 Quema Toteco quitlachilía tlaltipactli, ni tlaltipactli huihuipica.
Huan quema quinpanajsi tepeme, inijuanti lemenij.
33 Nijhuicatis TOTECO nochi tonali catli niitztos ipan ni tlali.
Quena, nijpaquilismacas Toteco Dios ica tiohuicatl hasta tlamis nitlaijiyotilanas.
34 Ma quipacti TOTECO nochi catli nimonejnehuilía tlen ya,
huan na nimopaquilismaca ipan ya.
35 Ma miquica nochi catli quinpactía tlajtlacolchihuaj ipan ni tlaltipactli.
Quena, ma ayacmo itztoca catli amo quinequij quitlepanitase TOTECO.
Pero na nijpaquilismacas ica nochi noyolo.
¡Paquilistli!