106
Ininyolteticayo israelitame
1 ¡Paquilistli!
¡Ma tijtlascamatica TOTECO pampa yaya nelía cuali iyolo huan itlaicnelijcayo amo quema tlamis ica tojuanti!
2 ¿Ajqueya huelis quitlamiijcuilos nopa yejyectzitzi tiochicahual nextili catli TOTECO quichihua?
¿Ajqueya huelis tepohuilis nochi catli quichijtoc Toteco?
3 Quipiyaj paquilistli nopa masehualme catli nochipa quichijtinemij catli cuali huan catli xitlahuac.
4 TOTECO, techelnamiquis na quema tiquintiochihuas huan tiquinmaquixtis momasehualhua.
5 Techcahuili ma niquitas catli yejyectzi tiquinchihuilis momasehualhua catli tiquintlapejpenijtoc.
Xijcahuili para nojquiya ma nipaquis ininhuaya.
Xijcahua ma nimopaquilismacas ica inijuanti catli moaxcahua.
6 Tojuanti nojquiya titlajtlacolchijtoque san se quen tohuejcapan tatahua.
Titlaixpanoque huan tijchijtoque catli fiero.
7 Tohuejcapan tatahua amo quimachilijque nopa huejhueyi tiochicahual nextili catli Toteco quichijqui ipan tlali Egipto.
Niyon amo quielnamijque para quipixqui hueyi iyolo ininhuaya.
Inijuanti moyoltetilijque ica Toteco nepa campa nopa hueyi atl catli itoca Chichiltic.
8 Pero Toteco quinmaquixti para ma quitlepanitaca,
huan tenextili ihueyi chicahualis ipan nochi tlaltipactli.
9 Quiajhuac nopa hueyi atl catli itoca Chichiltic huan quinahuati ma motlajcoxelo.
Huan quej nopa quitlapo se ojtli huactoc quen elisquía huactoc tlali,
huan quinchihualti tohuejcapan tatahua ma ipan panoca.
10 Quej nopa quinmaquixti huan quinchololti ininmaco inincualancaitacahua.
11 Huan nopa atl quinatzonpolihuilti inincualancaitacahua hasta amo mocajqui niyon se catli amo mijqui.
12 Huan huajca tohuejcapan tatahua quineltocaque icamanal catli Toteco quinilhuijtoya.
Huan teipa huicaque huan quipaquilismacaque.
13 Pero sempa nimantzi quielcajque nochi catli Toteco quichijtoya.
Huan amo mochixque para Toteco ma quinmaca consejos.
14 ¡Amo! Nepa ipan huactoc tlali quiyejyecojque Toteco Dios ica catli tlahuel quinequiyayaj ma quinmaca.
Quena, quifuerzajhuijque ma quinmaca nopa tlacualistli catli inijuanti quinequiyayaj.
15 Huajca Toteco quinmacac catli quitlajtlanijque,
pero nojquiya quintitlanili cocolistli catli ica mijque miyac nopa masehualme.
16 Huan nopona campa quiquejquetztoyaj ininyoyoncal,
quichicoitaque Moisés,
huan quichicoitaque Aarón catli TOTECO quiiyocatlalijtoya para ma eli itotajtzi.
17 Huajca motlapo tlali huan quintolo Datán, Abiram huan nochi catli quintoquiliyayaj.
18 Huan Toteco quititlanqui tlitl tlen ilhuicac,
huan quintlamitlati nopa tlaixpanoca tlacame.
19 Nepa ipan tepetl Horeb mochihuilijque se becerro tlen oro huan ya nopa quihueyichijque.
20 Quitlahuelcajque Toteco huan ihueyi chicahualis,
huan pejque quihueyimatij se becerro tlen oro,
iixcopinca se tlapiyali catli quicua xihuitl.
21 Huan quej nopa quielcajque ininTeco Dios catli quinmaquixtijtoya,
yaya catli quichijtoya huejhueyi tlamantli ipan tlali Egipto,
22 huan ipan nopa hueyi atl catli itoca Chichiltic.
23 Huajca Toteco quiijto para quintzontlamiltisquía,
pero Moisés catli Toteco quitlapejpenijtoya motlajcoquetzqui,
huan quitlajtlani Toteco para amo ma quintzontlamilti ica ihueyi cualancayo.
24 Teipa nopa israelitame amo quinejque calaquise ipan nopa tlali catli nelía cuali,
pampa amo quineltocaque para Toteco quinmocuitlahuisquía.
25 Huan ipan ininchajchaj pejque quiejelnamiquij TOTECO huan amo quitlacaquilijque catli quinilhuiyaya ma quichihuaca.
26 Yeca Toteco Dios momatlananqui huan tlatestigojquetzqui para quintzontlamiltisquía ipan nopa huactoc tlali.
27 Quiijto para ininconehua quinsemanasquía huan quintitlanisquía,
ipan sequinoc tlalme para ma itztotij quen sequinoc altepetl ehuani.
28 Nojquiya ipan tlali Peor tohuejcapan tatahua mosansejcotilijque ininhuaya catli quihueyichihuayayaj Baal,
huan hasta quinmacaque tlacajcahualistli mijcatzitzi.
29 Huan ica ya ni quicualancamacaque Toteco.
Yeca Toteco quititlanqui se hueyi cocolistli ininpani huan miyac mijque.
30 Huan Finees moneltlali huan motlananqui,
huan quinmicti nopa masehualme catli ica inintlajtlacolhua quichijtoyaj ma huala nopa cocolistli.
Huan ica ya nopa moquetzqui nopa cocolistli.
31 Huan ni cuali tlamantli quichijqui para Finees ma quielnamictoca para nochipa quen se tlacatl catli cuali.
32 Nojquiya campa atl Meriba,
nopa israelitame quicualancamacaque Toteco.
Quena, por inijuanti, Toteco cualanqui ica Moisés.
33 Pampa quichijque ma cualani Moisés,
huan ma camanaltitiquisa ica catli amo monequiyaya.
34 Huan nojquiya nopa israelitame amo quintzontlamiltijque nochi nopa altepeme,
ipan nopa tlalme catli TOTECO quinnahuatijtoya ma quisosoloca.
35 San achi más mosansejcotilijque ininhuaya catli amo quitlepanitayayaj Toteco,
huan nojquiya quichijque catli inijuanti momajtoyaj quichihuaj.
36 Quinhueyimatque ininteteyohua,
huan mohuejcatlalijque tlen Toteco,
huan ica ya nopa mopolojque.
37 Hasta quinmictijque ininconehua quen se tlacajcahualistli para iajacahua Amocualtlacatl.
38 Huan pampa quinmictijque ininconehua catli amo tleno quichijtoyaj para quinmacase nopa teteyome tlen tlali Canaán,
quinenpolojque nopa tlali ica inieso.
39 Huan inijuanti nojquiya monenpolojque ica nochi tlamantli fiero catli quichijque.
Pampa quema quinhueyichihuayayaj teteyome,
Toteco Dios quinitayaya quen elisquía momecatiyayaj ica seyoc catli amo ininnamic.
40 Yeca TOTECO tlahuel cualanqui ica imasehualhua,
huan ayacmo quinejqui quinitas.
41 Huan quintemactili ininmaco inincualancaitacahua catli ehuayayaj ipan nopa tlalme catli amo quitlepanitayayaj Toteco,
para nopa masehualme ma quinnahuatica.
42 Huan quena, inincualancaitacahua quintlaijiyohuiltijque
huan tlahuel quincocojque pampa itztoyaj ininmaco.
43 Miyac huelta Toteco quinmanahui,
pero inijuanti quisenhuiquiliyayaj moyoltetilíaj ica ya.
Yeca teipa quicahuili ma motzontlamiltica por inintlajtlacolhua.
44 Pero masque ya nopa quichihuayayaj,
Toteco quintlacaquiliyaya quema quitzajtziliyayaj,
huan quinpalehuiyaya quema masehualme quintlaijiyohuiltiyayaj.
45 Quena, quielnamiquiyaya nochi catli quintlajtolcahuilijtoya para quinchihuilis.
Yeca quintlasojtlac huan moyolcuepqui pampa tlahuel quinicneliyaya.
46 Huan hasta quichijqui para inincualancaitacahua catli quintlaijiyohuiltiyayaj,
ma nojquiya quintlasojtlaca.
47 ¡TOTECO Dios, techmaquixti tlen tocualancaitacahua!
Sempa techsentili tlen campa hueli tlalme para tihuelise timitztlascamatise ta catli titlatzejtzeloltic,
huan para huelis tipaquise huan timitzhueyimatise.
48 Ma tijpaquilismacaca TOTECO Dios para nochipa,
yaya catli toTeco tiisraelitame.
Nochi imasehualhua ma quiijtoca:
“¡Quej nopa ma eli! ¡Paquilistli!”