118
Ma tijtlascamatica Toteco
1 ¡Xijpaquilismacaca TOTECO pampa yaya nelía cuali!
Itlaicnelijcayo amo quema tlamis.
2 Nochi anisraelitame xijhueyimatica Toteco huan xiquijtoca:
“Itlaicnelijcayo Toteco amo quema tlamis.”
3 Nochi antotajtzitzi catli aniixhuihua Aarón nojquiya xiquijtoca:
“TOTECO itlaicnelijcayo amo quema tlamis.”
4 Nochi amojuanti catli anquitlepanitaj TOTECO xiquijtoca:
“TOTECO itlaicnelijcayo amo quema tlamis.”
5 Quema nimotequipachohuayaya,
nijtzajtzili TOTECO,
huan yaya nechnanquili huan nechmanahui.
6 TOTECO itztoc nohuaya para nechpalehuis,
yeca ayacmo nimajmahui,
niyon amo niquimacasi catli huelis nechchihuilise masehualme.
7 TOTECO itztoc nonechca.
Yaya nechpalehuis.
¡Huan temachtli niquitas catli nijnequi ma ininpanti nocualancaitacahua!
8 Más cuali nimotemachis ipan TOTECO huan amo ipan se tlacatl.
9 Más cuali nimomanahuis ipan TOTECO huan amo ipan se hueyi tlanahuatijquetl.
10 Masque nochi masehualme tlen nochi tlalme ma nechyahualoca para nechhuilanase,
na niquintzontlamiltis ica ichicahualis TOTECO.
11 Quena, masque nechyahualose huan nechhuilanase,
pero na niquintlanis pampa nijhuica itequiticayo TOTECO.
12 Nocualancaitacahua hualajque nopani quen sayolime,
huan cualanque chicahuac quen tlitl catli quitlatía nochi huitztli.
Pero na niquintzontlamilti ica itequiticayo TOTECO.
13 Nocualancaitacahua quichijque campica para nechmictise,
pero TOTECO yaya nechpalehui.
14 TOTECO nechpixtoc imaco,
huan yeca nihuica para ya pampa nechchijtoc ma nitlatlani.
15 Ipan ininchajchaj catli monejnemiltíaj xitlahuac iixpa TOTECO tlahuejchihuaj huan huicaj ica paquilistli,
pampa TOTECO quinmaquixtía huan quichihua huejhueyi tlamantli.
16 Ichicahualis TOTECO nelía hueyi huan quichihua huejhueyi tlamantli.
17 Amo nimiquis.
Pero niitztos para nitepohuilis nochi catli TOTECO quichijtoc.
18 Toteco nechtlatzacuilti chicahuac,
pero amo nechtemactili para ma nimiqui.
19 Xijtlapoca ipuertajyo itiopa TOTECO,
pampa nijnequi nicalaquis para nijtlascamatis TOTECO.
20 Ipan ni puerta calaquij para yohuij hasta iixpa TOTECO,
huan nopona calaquise nochi catli tlatzejtzeloltique iixpa.
21 Nijhueyimatis noTeco Dios, huan nijtlascamatilis miyac,
pampa nechtlacaquili huan nechmaquixti tlen nocualancaitacahua.
22 Calchihuani quihuejcamajcajque se hueyi tetl catli amo quinejque quitequihuise,
pero ama nopa hueyi tetl eltoc catli más monequi para yas calnacastla huan ipan quiquetzase nopa cali.
23 Nochi ya ni quichijtoc TOTECO huan yejyectzi nesi.
24 Inin nopa tonali catli TOTECO quichijqui.
Ma tipactoca ipan ni tonali.
25 Nijtlajtlanía TOTECO ama ma techmaquixti tojuanti tlen tocualancaitacahua.
Techpalehui ama para titlatlanise.
26 ¡Ma TOTECO mitztiochihua ta catli tihuala ica itequiticayo [118:26 O ica itoca.]!
Timitztiochihuaj hasta campa ichaj TOTECO.
27 TOTECO yaya Dios, huan yaya techtlahuilía.
Nijhualiquilis notlacajcahualis huan nijtlalis ipan itlaixpa para nijmacas.
28 Pampa yaya noTeco Dios, yeca nijtlascamati huan nijhueyimati.
29 ¡Xijtlascamatica TOTECO pampa yaya nelía cuali!
Itlaicnelijcayo amo quema tlamis.